ສະພາບຂອງຄຣິສຕະຈັກໃນປັດຈຸບັນນີ້
ບັນດາຄຣິສຕະຈັກໃນປັດຈຸບັນນີ້
ບາບີໂລນເປັນ "ແມ່ຂອງຍິງໂສເພນີທັງຫຼາຍ." ລູກສາວທັງຫຼາຍຂອງຄຣິສຕະຈັກໂຣມັນຄາໂຕລິກແມ່ນບັນດາຄຣິສຕະຈັກໂປຣແຕສແຕນທີ່ຢຶດຕິດກັບຫຼັກຄຳສອນ ແລະ ເຮັດຕາມແບບຢ່າງຂອງຄຣິສຕະຈັກໂຣມັນຄາໂຕລິກໂດຍການຍອມປະຖິ້ມຄວາມຈິງ ເພື່ອສ້າງຄວາມສຳພັນກັບໂລກ. {GC 382.3}
ບັນດາຄຣິສຕະຈັກໂປຣແຕສແຕນທັງຫຼາຍໄດ້ຕິດຕາມແບບຢ່າງຂອງຄຣິສຕະຈັກໂຣມັນຄາໂຕລິກ ໂດຍການສ້າງຄວາມສຳພັນກັບ "ບັນດາກະສັດທົ່ວແຜ່ນດິນໂລກ" ພວກເຂົາເຮັດເຊັ່ນນີ້ໂດຍການເພີ່ມອິດທິພົນຂອງພວກເຂົາໃຫ້ເໜືອລັດຖະບານ ຫຼື ໂດຍການສະແຫວງຫາການຍອມຮັບຂອງຝ່າຍໂລກ. {GC 383.1}
ບັນດາຜູ້ປົກຄອງ, ນັກການເມືອງ, ທະນາຍຄວາມ, ແພດ, ນັກທຸລະກິດ ຕ່າງພາກັນເຂົ້າຮ່ວມເປັນສະມາຊິກໃນຄຣິສຕະຈັກ ເພື່ອສ້າງຄວາມນັບຖື, ຄວາມວາງໃຈທາງສັງຄົມ ແລະ ຄວາມກ້າວໜ້າຂອງຜົນປະໂຫຍດຂອງພວກເຂົາໃນທາງຝ່າຍໂລກ. ແຕ່ພວກເຂົາເຫຼົ່ານັ້ນບໍ່ໄດ້ມີຄວາມເຊື່ອຢ່າງແທ້ຈິງ ແລະ ພວກເຂົາໄດ້ຈູງໃຈຄົນໃນຄຣິສຕະຈັກອອກຈາກມາດຕະຖານຂອງພຣະຄຳພີ. ບັນດາຄຣິສຕະຈັກໂປຣແຕສແຕນທັງຫຼາຍໂດດເດັ່ນໃນຮູບລັກສະນະພາຍນອກ ແຕ່ພວກເຂົາປາສະຈາກຄວາມຈິງ. {GC 386.1}
ບັນດາຄຣິສຕະຈັກໂປຣແຕສແຕນທີ່ປະຖິ້ມຄວາມເຊື່ອໄດ້ເຮັດໃຫ້ "ປະຊາຊາດທັງປວງມົວເມົາເຫລົ້າອະງຸ່ນແຫ່ງການລ່ວງປະເວນີຂອງມັນ" ຄືກັນກັບຄຣິສຕະຈັກໂຣມັນຄາໂຕລິກ. ດັ່ງນັ້ນ ພວກເຂົາຈຶ່ງເຕັມໄປດ້ວຍບັນດາຫຼັກຄຳສອນຜິດ. ມິດຕະພາບທີ່ພວກເຂົາມີກັບໂລກຈຶ່ງເຮັດໃຫ້ຄວາມເຊື່ອ ແລະ ຄວາມຈິງໃຈຂອງພວກເຂົາບິດເບືອນ. ດັ່ງນັ້ນ ຫຼັກຄຳສອນຂອງພວກເຂົາຈຶ່ງຂັດແຍ້ງກັບຫຼັກຄຳສອນຂອງພຣະຄຳຂອງພຣະເຈົ້າ. (ພຣະນິມິດ 14:8 TNCV). {GC 388.2}
ໃນຫຼັກຄຳສອນຜິດຂອງຄຣິສຕະຈັກໂປຣແຕສແຕນທີ່ມັກສອນນັ້ນກໍຄື ອາດຈະມີໃນຊ່ວງພັນປີທີ່ມີຄວາມສະຫງົບສຸກ ແລະ ມີການພັດທະນາ. ພວກເຂົາຍັງສອນອີກວ່າ ຈິດວິນຍານຂອງມະນຸດບໍ່ມີວັນຕາຍ. ນອກຈາກນີ້ ຍັງມີຫຼັກຄຳສອນຜິດທີ່ເປັນອັນຕະລາຍຢ່າງຮ້າຍແຮງ ແລະ ຂະຫຍາຍຢ່າງແຜ່ຫຼາຍນັ້ນກໍຄື ພວກເຂົາສັນນິຖານວ່າ ພຣະບັນຍັດຂອງພຣະເຈົ້າຖືກຍົກເລີກແລ້ວຢູ່ທີ່ໄມ້ກາງແຂນ ແລະ ມີຄວາມເຊື່ອຜິດວ່າ ມື້ທີໜຶ່ງໃນສັບປະດາແມ່ນວັນບໍຣິສຸດ ແທນທີວັນຊະບາໂຕໃນພຣະບັນຍັດຂໍ້ສີ່. {4SP 235.3}
ແຕ່ເມື່ອມີຄົນມາສອນຄວາມຈິງຕາມພຣະຄຳພີ ກໍມີອາຈານຫຼາຍຄົນທີ່ຄິດວ່າຕົນເອງເກັ່ງພຣະຄຳພີ ພວກເຂົາປະຕິເສດຄວາມຈິງຕາມພຣະຄຳພີນັ້ນ ແລະ ມາເວົ້າສິ່ງເຫຼົ່ານັ້ນວ່າບໍ່ແມ່ນຄວາມຈິງ. ສະນັ້ນ ຈຶ່ງເຮັດໃຫ້ປະຊາຊົນບໍ່ສົນໃຈກັບຄວາມຈິງທີ່ມາຈາກພຣະຄຳພີ. ຖ້າບໍ່ເປັນຍ້ອນວ່າ ໂລກນີ້ຖືກມົວເມົາໄປດ້ວຍເຫຼົ້າອະງຸ່ນແຫ່ງບາບີໂລນ ອາດຈະມີຄົນເປັນຈໍານວນຫຼວງຫຼາຍໄດ້ສໍານຶກຜິດ ແລະ ກັບໃຈໃໝ່ເມື່ອພວກເຂົາໄດ້ຍິນກ່ຽວກັບຄວາມຈິງໃນພຣະຄໍາຂອງພຣະເຈົ້າ. ຄວາມຊົ່ວຮ້າຍຂອງໂລກນີ້ຈຶ່ງຮ້າຍແຮງຫຼາຍ ເພາະວ່າຄຣິສຕະຈັກໂປຣແຕສແຕນບໍ່ໄດ້ນຳພາປະຊາຊົນໄປໃນທາງແຫ່ງຄວາມຈິງ. {4SP 235.4}
ພຣະເຈົ້າໄດ້ສົ່ງຂ່າວສານໃຫ້ປະຊາຊົນຂອງພຣະອົງທີ່ຈະຊ່ວຍໃຫ້ພວກເຮົາເຫັນເຖິງຄວາມຊົ່ວຮ້າຍທີ່ແຍກພວກເຮົາອອກຈາກພຣະຄຸນຂອງພຣະອົງ. ພວກເຮົາຄວນສຶກສາໃຫ້ດີ ແລະ ເອົາໃຈໃສ່ໃນຂ່າວສານເຫຼົ່ານັ້ນ.
“ເຮົາໄດ້ປະຖິ້ມເລ່ຫຼ່ຽມຕ່າງໆທີ່ໜ້າອັບອາຍໄປໝົດແລ້ວ ເຮົາບໍ່ເຮັດກົນອຸບາຍ ແລະ ບໍ່ໄດ້ປອມແປງພຣະກິດຕິຄຸນຂອງພຣະເຈົ້າ ແຕ່ໂດຍສຳແດງຄວາມສັດຊື່ ເຮົາສະເໜີຕົວເຮົາໃຫ້ກັບຈິດສຳນຶກຜິດຊອບຂອງຄົນທັງປວງຢູ່ຊ້ອງພຣະພັກພຣະເຈົ້າ.” (2 ໂກຣິນໂທ 4:2 TH1971).
ອ້າງອີງຈາກປຶ້ມ "ພຣະຄຳພີ" 2 ໂກຣິນໂທ 4:2; ພຣະນິມິດ 14:8.
ອ້າງອີງຈາກປຶ້ມ "ປາຍທາງແຫ່ງຄວາມຫວັງ" (ສະບັບພາສາໄທ) {ວັກ 382.3; 383.1; 386.1; 388.2} ແລະ ປຶ້ມ “The Spirit of Prophecy Volume 4” {4SP 235.3,4} ຂຽນໂດຍ ທ່ານ ນາງ ເອເລັນ ຈີ. ໄວທ
ສຽງຮ້ອງອັນດັງ
ໃນພຣະທຳພຣະນິມິດບົດທີ 18 ທູດສະຫວັນໄດ້ຮ້ອງປະກາດດ້ວຍສຽງອັນດັງວ່າ: "ບາບີໂລນມະຫານະຄອນ ຫຼົ້ມຈົມແລ້ວ ຫຼົ້ມຈົມແລ້ວ ກາຍເປັນບ່ອນອາໄສຂອງຜີປີສາດ ເປັນບ່ອນຄຸມຂັງຂອງຜີສົກກະປົກທຸກຢ່າງ ແລະ ເປັນຄອກຂອງນົກທຸກຊະນິດທີ່ບໍ່ສະອາດ ແລະ ໜ້າລັງກຽດ. ເພາະວ່າປະຊາຊາດທັງປວງໄດ້ດື່ມເຫຼົ້າອະງຸ່ນແຫ່ງຄວາມໂກດຮ້າຍໃນການລ່ວງປະເວນີຂອງນະຄອນນັ້ນ ແລະບັນດາກະສັດເທິງແຜ່ນດິນໂລກໄດ້ລ່ວງປະເວນີກັບນະຄອນນັ້ນ ແລະພໍ່ຄ້າທັງຫຼາຍແຫ່ງແຜ່ນດິນໂລກກໍໄດ້ຮັ່ງມີຂຶ້ນດ້ວຍຊັບອັນຟຸ່ມເຟືອຍຂອງນະຄອນນັ້ນ." (ພຣະນິມິດ 18:2, 3 KJV)
ຂ່າວສານຂອງທູດສະຫວັນອົງທີສາມຢູ່ໃນພຣະທຳພຣະນິມິດບົດທີ 18 ແມ່ນສຽງຮ້ອງອັນດັງ. ສຽງຮ້ອງອັນດັງເປັນຂ່າວສານສຸດທ້າຍທີ່ຈະມອບໃຫ້ແກ່ຊາວໂລກ ຂ່າວສານນີ້ຮຽກຮ້ອງໃຫ້ປະຊາຊົນອອກຈາກບາບີໂລນ ເພາະວ່າມັນເຕັມໄປດ້ວຍຄວາມບາບ ແລະ ການຕໍ່ສູ້ພຣະເຈົ້າ. ພວກເຮົາໄດ້ສຶກສາແລ້ວວ່າ ບາບີໂລນເປັນຕົວແທນຂອງຄຣິສຕະຈັກໂຣມັນຄາໂຕລິກ ແລະບັນດາຄຣິສຕະຈັກໂປຣແຕສແຕນທັງຫຼາຍໄດ້ຮ່ວມຕົວເຂົ້າກັບພວກເຂົາເປັນໜຶ່ງດຽວ. ແຕ່ດ້ວຍຄວາມຮັກ ແລະ ຄວາມເມດຕາຂອງພຣະເຈົ້າອັນບໍ່ມີທີ່ສິ້ນສຸດ ພຣະອົງຈຶ່ງເອີ້ນປະຊາຊົນໃຫ້ອອກມາຈາກບັນດາຄຣິສຕະຈັກເຫຼົ່ານັ້ນ ແລະ ມາເຂົ້າຮ່ວມກັບປະຊາຊົນຂອງພຣະອົງ ເພື່ອວ່າຈະບໍ່ໄດ້ຖືກບັນດາຄຣິສຕະຈັກເຫຼົ່ານັ້ນ ຊັກຊວນໃຫ້ຫຼົງໄປໃນທາງທີ່ຜິດ.
ຂ່າວສານນີ້ຈະໄດ້ປະກາດຫຼັງຈາກທີ່ປະຊາຊົນຂອງພຣະເຈົ້າໄດ້ຮັບພຣະວິນຍານບໍຣິສຸດ ເໝືອນກັນກັບພວກອັກຄະສາວົກທີ່ເປັນຜູ້ປະກາດພຣະຄຳທີ່ມີອຳນາດມາຈາກພຣະເຈົ້າພາຍຫຼັງທີ່ພວກເຂົາໄດ້ຮັບພຣະວິນຍານບໍຣິສຸດໃນວັນເພັນເຕຄໍສະເຕ. ດັ່ງນັ້ນ ປະຊາຊົນຂອງພຣະເຈົ້າຈະໄດ້ຮັບຣິດອຳນາດ ແລະຄວາມກ້າຫານທີ່ມາຈາກພຣະວິນຍານບໍຣິສຸດ ພວກເຂົາຈະອອກໄປ ແລະ ປະກາດຂ່າວສານຂອງທູດສະຫວັນອົງທີສາມຢູ່ໃນພຣະທຳພຣະນິມິດບົດທີ 18 ຢູ່ທົ່ວໂລກ. ແລ້ວເປັນຫຍັງ ປະຊາຊົນຂອງພຣະເຈົ້າຈຶ່ງຍັງບໍ່ໄດ້ປະກາດຂ່າວສານຂອງສຽງຮ້ອງອັນດັງ? ເພາະວ່າ ພວກເຂົາຍັງບໍ່ທັນໄດ້ຊຳລະໃຈຂອງພວກເຂົາໃຫ້ບໍຣິສຸດເພື່ອຈະກຽມຮັບພຣະວິນຍານບໍຣິສຸດ. ພວກເຮົາຜູ້ທີ່ຮູ້ຄວາມຈິງແລ້ວຈະຕ້ອງກຽມຄວາມພ້ອມຢ່າງຮີບດ່ວນເພື່ອຮັບພຣະວິນຍານບໍຣິສຸດ ເພື່ອພວກເຮົາຈະໄດ້ເຮັດວຽກທີ່ພຣະເຈົ້າໄດ້ມອບໝາຍໃຫ້ພວກເຮົາເຮັດ ໂດຍຜ່ານທາງຂ່າວສານຂອງສຽງຮ້ອງອັນດັງ.
ອ້າງອີງຈາກປຶ້ມ "ພຣະຄຳພີ" ພຣະນິມິດ 18:2-4
ອ້າງອີງຈາກປຶ້ມ "ປາຍທາງແຫ່ງຄວາມຫວັງ" (ສະບັບພາສາໄທ) ບົດທີ 21 {ວັກ 382} ຂຽນໂດຍ ທ່ານ ນາງ ເອເລັນ ຈີ. ໄວທ
ຈຸດປະສົງຂອງສັດຮ້າຍ
ຫຼາຍຄົນເວົ້າວ່າ ພວກເຮົາບໍ່ສາມາດວິພາກວິຈານການກະທຳຂອງຄຣິສຕະຈັກໂຣມັນຄາໂຕລິກໃນອະດີດທີ່ຜ່ານມາ. ພວກເຂົາເຂົ້າຂ້າງການກະທຳອັນໂຫດຮ້າຍຂອງຄຣິສຕະຈັກໂຣມັນຄາໂຕລິກດ້ວຍການເມີນເສີຍຄວາມມືດໃນອະດີດທີ່ຜ່ານມາ ແລະພວກເຂົາເຊື່ອວ່າໃນສະໄໝນີ້ຄຣິສຕະຈັກໂຣມັນຄາໂຕລິກໄດ້ປ່ຽນແປງແລ້ວ. ແຕ່ພວກເຂົາບໍ່ໄດ້ລະນຶກວ່າ ປັດຈຸບັນຄຣິສຕະຈັກໂຣມັນຄາໂຕລິກຍັງເປັນເໝືອນເດີມຄືກັນກັບໃນອະດີດ. ທັງຫຼັກຄຳສອນ ແລະ ການກະທຳຂອງພວກເຂົາຍິ່ງບໍ່ສອດຄອງກັບພຣະຄຳຂອງພຣະເຈົ້າຫຼາຍກວ່າໃນອະດີດອີກ. ຊາວໂປຣແຕສແຕນບອກກ່ຽວກັບອະນາຄົດຂອງຄຣິຕະຈັກໂຣມັນຄາໂຕລິກໄດ້. ຢູ່ໃນພຣະຄຳພຣະນິມິດ ແລະ ພຣະຄຳດານີເອນໄດ້ພະຍາກອນຫຼາຍສິ່ງກ່ຽວກັບຄຣິສຕະຈັກໂຣມັນຄາໂຕລິກ ແລະມັນກໍເກີດຂຶ້ນແທ້ຢູ່ໃນອະດີດທີ່ຜ່ານມານັ້ນ. ສະນັ້ນ ພວກເຮົາສາມາດເຊື່ອໄດ້ວ່າ ສິ່ງທີ່ໄດ້ພະຍາກອນໄວ້ວ່າມັນຈະເກີດຂຶ້ນ ມັນກໍຈະເກີດຂຶ້ນເຊັ່ນກັນ. ຄຣິສຕະຈັກໂຣມັນຄາໂຕລິກກຳລັງຕຽມຕົວກັບມາຄວບຄຸມໂລກ, ສ້າງການກົດຂີ່ຂົ່ມເຫັງຂຶ້ນມາໃໝ່ອີກຄັ້ງ ແລະກຳຈັດທຸກສິ່ງທີ່ໂປຣແຕສແຕນໄດ້ເຮັດພັດທະນາໄວ້. {GC 565.4, GC 563.2}
ຄຣິສຕະຈັກໂຣມັນຄາໂຕລິກຍັງຄົງດຳເນີນການບິດເບືອນເລື່ອງພຣະເຈົ້າຄືກັນກັບຢູ່ໃນອະດີດ. ພວກເຂົາສອນສິ່ງທີ່ບໍ່ຖືກຕ້ອງກ່ຽວກັບພຣະເຈົ້າ ເຊິ່ງເຮັດໃຫ້ພຣະເຈົ້າເສື່ອມເສຍກຽດ. ພວກເຂົາໄດ້ຕັ້ງຫຼັກຄຳສອນໄວ້ ເພື່ອບອກໃຫ້ຄົນສອງປະເພດເຊິ່ງສາມາດຫຼອກລວງໄດ້ເກືອບໝົດທົ່ວໂລກ ຄືຫຼັກຄຳສອນສຳລັບຜູ້ທີ່ຕ້ອງການລອດພົ້ນໂດຍການກະທຳຄວາມດີ ແລະຫຼັກຄຳສອນສຳລັບຜູ້ທີ່ຕ້ອງການລອດພົ້ນຈາກຄວາມບາບອັນຈອມປອມຂອງພວກເຂົາ.
ຄຣິສຕະຈັກໂຣມັນຄາໂຕລິກຍັງຄົງດຳເນີນການສອນຫຼັກຄຳສອນຜິດຄືກັນກັບໃນອະດີດທີ່ຜ່ານມາ. ໃນບັນດາຫຼັກຄຳສອນຜິດບາງຢ່າງຍັງສອນວ່າ ຕ້ອງເຮັດຄຸນຄວາມດີຈຶ່ງຈະໄດ້ຮັບຄວາມລອດ, ຈິດວິນຍານເປັນອຳມະຕະ(ບໍ່ມີວັນຕາຍ) ແລະຍັງຄົງນະມັດສະການໃນວັນອາທິດທີ່ໄດ້ຕັ້ງຂຶ້ນມານັ້ນ. ທ່ານຄິດວ່າ ຄຣິສຕະຈັກໂຣມັນຄາໂຕລິກໄດ້ມີການປ່ຽນແປງແລ້ວບໍ? ບໍ່! ມັນບໍ່ໄດ້ປ່ຽນແປງ. ແລະຄິດວ່າຄຣິສຕະຈັກໂຣມັນຄາໂຕລິກໄດ້ເຂົ້າໃກ້ຊິດໃນຫຼັກຄຳສອນຂອງພຣະຄຳພີຫຼາຍກວ່າໃນອະດີດທີ່ຜ່ານມາບໍ? ບໍ່! ມັນບໍ່ໄດ້ເຂົ້າໃກ້ຊິດເລີຍ. ຄຣິສຕະຈັກໂຣມັນຄາໂຕລິກຍັງຄົງດຳເນີນການສອນຫຼັກຄຳສອນຜິດຄືກັນກັບໃນອະດີດທີ່ຜ່ານມາ.
ບັດນີ້ ຄຣິສຕະຈັກໂຣມັນຄາໂຕລິກໄດ້ນຳສະເໜີພາບລັກທີ່ດີໃຫ້ຊາວໂລກໄດ້ເຫັນ ໂດຍໃຊ້ຄຳຂໍໂທດຫຸ້ມຫໍ່ປິດບັງຄວາມໂຫດຮ້າຍທີ່ຄຣິສຕະຈັກໂຣມັນຄາໂຕລິກເຄີຍເຮັດໃນອະດີດ. ຄຣິສຕະຈັກໂຣມັນຄາໂຕລິກໄດ້ສວມໃສ່ເສື້ອຜ້າລັກສະນະຄືພຣະເຢຊູ ແຕ່ຄຣິສຕະຈັກໂຣມັນຄາໂຕລິກຍັງບໍ່ເຄີຍປ່ຽນແປງ. ຫຼັກການທັງໝົດຂອງລະບອບສັນຕະປາປາທີ່ປາກົດໃນຍຸກອະດີດກໍຍັງປາກົດໃນຍຸກປັດຈຸບັນ. ຫຼັກຄຳສອນຕ່າງໆທີ່ຖືກຄົ້ນຄິດຂຶ້ນມາໃນສະໄໝຍຸກມືດນັ້ນກໍຍັງຄົງນັບຖືຢູ່. ຈົ່ງຢ່າໃຫ້ຜູ້ໃດຫຼອກລວງຕົນເອງ. ລະບອບການປົກຄອງຂອງສັນຕະປາປາທີ່ບັດນີ້ຊາວໂປຣແຕສແຕນພ້ອມທີ່ຈະໃຫ້ກຽດນັ້ນ ຍັງຄົງເປັນເໝືອນເດີມເຊັ່ນດຽວກັບທີ່ເຄີຍປົກຄອງໂລກໃນສະໄໝຂອງການປະຕິຮູບສາສະໜາ ເຊິ່ງປະຊາຊົນຂອງພຣະເຈົ້າໄດ້ລຸກຂຶ້ນເອົາຊີວິດຂອງຕົນເຂົ້າແລກເພື່ອເປີດເຜີຍຄວາມຊົ່ວຂອງຄຣິສຕະຈັກໂຣມັນຄາໂຕລິກ. ຄຣິສຕະຈັກໂຣມັນຄາໂຕລິກຍັງຄົງຄອບຄອງດ້ວຍຄວາມຍິ່ງຈອງຫອງ ແລະທະນົງຕົວເໝືອນເດີມເຊິ່ງຄອບຄອງກະສັດ ແລະເຈົ້າຊາຍທັງຫຼາຍ ແລະຍັງອ້າງສິດທິຂອງພຣະເຈົ້າ. ປັດຈຸບັນ ຈິດວິນຍານອັນໂຫດຮ້າຍ ແລະ ການໃຊ້ອຳນາດອັນປ່າເຖື່ອນຂອງຄຣິສຕະຈັກໂຣມັນຄາໂຕລິກບໍ່ໄດ້ໝ້ອຍລົງໃນຕອນສະໄໝທີ່ຄຣິສຕະຈັກໂຣມັນຄາໂຕລິກໄດ້ກົດຂີ່ຂົ່ມເຫັງເສລີພາບຂອງມະນຸດ ແລະໄດ້ຂ້າບັນດາຜູ້ຮັບໃຊ້ຂອງພຣະເຈົ້າອົງສູງສຸດ. {GC 571.1}
ລະບອບການປົກຄອງຂອງສັນຕະປາປາໄດ້ເປັນໄປຕາມຄຳພະຍາກອນທີ່ເປີດເຜີຍໄວ້ວ່າຄຣິສຕະຈັກໂຣມັນຄາໂຕລິກຈະເປັນ ນັ້ນແມ່ນການປະຖິ້ມຄວາມເຊື່ອໃນຄໍາສອນຂອງພຣະຄໍາພີໃນເວລາຕໍ່ມາ (2 ເທຊະໂລນິກ 2:3,4). ການທຳທ່າສະແດງໃຫ້ມີລັກສະນະທີ່ດີເປັນຫຼັກການສ່ວນໜຶ່ງຂອງຄຣິສຕະຈັກໂຣມັນຄາໂຕລິກທີ່ຈະເຮັດໃຫ້ຈຸດປະສົງຂອງຄຣິສຕະຈັກໂຣມັນຄາໂຕລິກປະສົບຜົນສຳເລັດ. ແຕ່ພາຍໃຕ້ຫຼາຍສີໃນຄາບຂອງໂຕກິ້ງກາກນັ້ນ ຄຣິສຕະຈັກໂຣມັນຄາໂຕລິກໄດ້ປິດບັງພິດຮ້າຍຂອງງູ. ພວກເຮົາຈະຍອມຮັບອຳນາດ ເຊິ່ງມີປະຫວັດຂຽນດ້ວຍເລືອດຜູ້ຮັບໃຊ້ຂອງພຣະເຈົ້າມາເປັນເວລາ 1000 ປີໃຫ້ມາເປັນສ່ວນໜຶ່ງຂອງຄຣິສຕະຈັກຂອງພຣະເຢຊູໃນປັດຈຸບັນນີ້ບໍ? {GC 571.2}
ພວກເຮົາເຫັນວ່າຢູ່ໃນບົດກ່ອນໜ້ານີ້ ຫຼັກຄຳສອນ ແລະ ຈິດວິນຍານຂອງຄຣິສຕະຈັກໂຣມັນຄາໂຕລິກຍັງບໍ່ປ່ຽນແປງ ແລະຈະບໍ່ປ່ຽນແປງເລີຍ. ສະນັ້ນ ເປັນຫຍັງ ຄຣິສຕະຈັກໂປຣແຕສແຕນຈຶ່ງຂໍໂທດທີ່ເຄີຍສະແດງຄວາມຄິດເຫັນວ່າ ຄຣິສຕະຈັກໂຣມັນຄາໂຕລິກແມ່ນມີຄວາມຜິດ? ມັນເປັນຍ້ອນພວກເຂົາໄດ້ສູນເສຍເປົ້າໝາຍທີ່ຈະປະຕິບັດຕາມພຣະເຈົ້າຢ່າງສັດຊື່ບໍ່? ຖ້າສຶກສາພຣະຄຳພີດ້ວຍການອະທິຖານຢ່າງຈິງຈັງຈະສະແດງໃຫ້ຊາວໂປຣແຕສແຕນເຫັນລັກສະນະທີ່ແທ້ຈິງຂອງລະບອບການປົກຄອງຂອງສັນຕະປາປາ ແລະຈະເປັນສາເຫດໃຫ້ພວກເຂົາກຽດຊັງ ແລະຫຼີກໜີອອກຈາກຄຣິສຕະຈັກໂຣມັນຄາໂຕລິກໄດ້. ແຕ່ວ່າພວກເຂົາຫຼາຍຄົນບໍ່ສຶກສາພຣະຄຳພີຢ່າງສັດຊື່ ແລະດ້ວຍການອະທິຖານຢ່າງຈິງຈັງ. ສະນັ້ນ ພວກເຂົາຈຶ່ງຖືກຈັບເປັນເຫຍື່ອໂດຍກົນອຸບາຍຂອງຊາຕານ. (GC 571.4)
ປັດຈຸບັນ ໂປຣແຕສແຕນເຮັດເຊັ່ນດຽວກັນກັບຄຣິສຕະຈັກໂຣມັນຄາໂຕລິກທີ່ໄດ້ເຮັດຢູ່ໃນອະດີດທີ່ຜ່ານມາ. ພວກເຂົາຊັກຊວນກັນເພື່ອຈະມີອິດທິພົນຕໍ່ລັດຖະບານ ໂດຍການເຮັດເຊັ່ນນັ້ນ ພວກເຂົາໄດ້ເປີດປະຕູຫົນທາງໃຫ້ແກ່ລະບອບການປົກຄອງຂອງສັນຕະປາປາໃຫ້ເຂົ້າມາມີອຳນາດສູງສຸດໃນປະເທດອາເມຣິກາ. ແລະສິ່ງໜຶ່ງທີ່ໃຫ້ຄວາມສຳຄັນຫຼາຍຕໍ່ກຸ່ມເຄື່ອນໄຫວເຫຼົ່ານີ້ຈຸດປະສົງຫຼັກນັ້ນກໍຄື ການບັງຄັບໃຊ້ກົດໝາຍວັນອາທິດ ເຊິ່ງເປັນປະເພນີທີ່ກຳເນີດມາຈາກຄຣິສຕະຈັກໂຣມັນຄາໂຕລິກ ແລະຄຣິສຕະຈັກໂຣມັນຄາໂຕລິກໄດ້ອ້າງວ່າ ການຮັກສາວັນອາທິດນີ້ແມ່ນສັນຍາລັກອຳນາດຂອງເຂົາ. {GC 573.1}
ອ້າງອີງຈາກປຶ້ມ "ພຣະຄຳພີ" ພຣະນິມິດ 18:2-4; 2 ເທສະໂລນິກ 2:3,4
ອ້າງອີງຈາກປຶ້ມ "ປາຍທາງແຫ່ງຄວາມຫວັງ" (ສະບັບພາສາໄທ) {ວັກ 563.2-573.1} ຂຽນໂດຍ ທ່ານ ນາງ ເອເລັນ ຈີ. ໄວທ
ການຮ່ວມມືກັນ
“ຫົວໆໜຶ່ງຂອງສັດຮ້າຍເບິ່ງເໝືອນຖືກຟັນປານຕາຍ ແຕ່ບາດແຜທີ່ຖືກຟັນນັ້ນຮັກສາຫາຍແລ້ວ. ຄົນທັງໂລກຕິດຕາມສັດຮ້າຍນັ້ນໄປດ້ວຍຄວາມອັດສະຈັນໃຈ.” (ພຣະນິມິດ 13:3). TKJV
“ມັນໃຊ້ອຳນາດຂອງສັດຮ້າຍໂຕເດີມນັ້ນຢ່າງຄົບຖ້ວນຕໍ່ໜ້າສັດຮ້າຍໂຕເດີມນັ້ນ ມັນເຮັດໃຫ້ໂລກ ແລະ ຄົນທີ່ຢູ່ໃນໂລກບູຊາສັດຮ້າຍໂຕເດີມນັ້ນທີ່ມີບາດແຜປານຕາຍ ແຕ່ຮັກສາຫາຍແລ້ວ.” (ພຣະນິມິດ 13:12). TKJV
“ມັນລໍ້ລວງຄົນທັງຫຼາຍທີ່ຢູ່ໃນໂລກດ້ວຍການອັດສະຈັນນັ້ນ ເຊິ່ງມັນມີອຳນາດເຮັດທ່າມກາງສາຍຕາຂອງສັດຮ້າຍໂຕເດີມນັ້ນ ແລະ ມັນສັ່ງໃຫ້ຄົນທັງຫຼາຍທີ່ຢູ່ໃນໂລກສ້າງຮູບຈຳລອງໃຫ້ແກ່ສັດຮ້າຍທີ່ຖືກຟັນດ້ວຍດາບ ແຕ່ຍັງມີຊີວິດຢູ່ນັ້ນ.” (ພຣະນິມິດ 13:14). TKJV
ບາດແຜທີ່ເກີດຂຶ້ນກັບສັດຮ້າຍໂຕນັ້ນໝາຍເຖິງຄຣິສຕະຈັກໂຣມັນຄາໂຕລິກທີ່ສູນເສຍອຳນາດຂອງມັນ. ຄຣິສຕະຈັກໂຣມັນຄາໂຕລິກໄດ້ເລີ່ມສູນເສຍອຳນາດໃນຊ່ວງຕົ້ນປີ 1500. ໃນປີ 1517 ທ່ານ ມາຕິນ ລູເທີ ໄດ້ຕິດ 95 ຂໍ້ຄວາມຢູ່ທີ່ປະຕູຂອງໂບດວິນແທນເບີກທີ່ປະເທດເຢຍລະມັນ. 95 ຂໍ້ຄວາມເຫຼົ່ານີ້ໄດ້ສະແດງໃຫ້ເຫັນເຖິງຄວາມຜິດພາດທີ່ຄຣິສຕະຈັກໂຣມັນຄາໂຕລິກໄດ້ສອນ ແລະຊີ້ໃຫ້ເຫັນວ່າພຣະຄຳພີເທົ່ານັ້ນທີ່ເປັນມາດຕະຖານຂອງຄວາມຈິງ. ຫຼັງຈາກນັ້ນ ຕາຂອງປະຊາຊົນກໍຖືກເປີດໃຫ້ເຫັນເຖິງຫຼັກຄຳສອນປອມທີ່ຄຣິສຕະຈັກໂຣມັນຄາໂຕລິກໄດ້ສອນ ແລະພວກເຂົາໄດ້ເສຍຄວາມເຊື່ອໝັ້ນໃນຄຣິສຕະຈັກໂຣມັນຄາໂຕລິກທີ່ວ່າສາມາດຊ່ວຍພວກເຂົາໃຫ້ລອດພົ້ນໄດ້. ຫຼາຍຄົນໄດ້ຫັນໄປຫາພຣະເຈົ້າອົງແທ້ຈິງ ແລະ ຄຳສອນຂອງພຣະຄຳພີ. ແຕ່ຄຣິສຕະຈັກໂຣມັນຄາໂຕລິກຍັງດຳເນີນການບັງຄັບຕົນເອງໃຫ້ຢູ່ໃນທ່າມກາງທຸລະກິດຂອງບັນດາກະສັດ ແລະ ບັນດາປະເທດຕ່າງໆ ຈົນເຮັດໃຫ້ປະເທດຝຣັ່ງບໍ່ພໍໃຈໃນຕົວຂອງສັນຕະປາປາ ແລ້ວພວກເຂົາໄດ້ຈັບສັນຕະປາປາໄປຂັງໄວ້ໃນຄຸກໃນປີ 1798. ດັ່ງນັ້ນ ຄຣິສຕະຈັກໂຣມັນຄາໂຕລິກຈຶ່ງໄດ້ສູນເສຍອິດທິພົນຂອງຕົນເກືອບໝົດໃນທະວີບຢູຣົບ ແລະດັ່ງທີ່ພຣະຄຳພີໄດ້ກ່າວໄວ້ວ່າ ສັດຮ້າຍໄດ້ຮັບ "ບາດແຜ".
ແຕ່ພຣະຄຳພີໄດ້ທຳນວາຍໄວ້ວ່າ ບາດແຜຈະຫາຍດີ (ພຣະນິມິດ 13:3, 12). ເພື່ອທີ່ຈະເຮັດໃຫ້ຄຣິສຕະຈັກໂຣມັນຄາໂຕລິກສາມາດກັບມາຟື້ນຟູອຳນາດຂອງມັນຢ່າງເຕັມທີ່ໃນທົ່ວໂລກໄດ້ ພວກເຂົາຕ້ອງຟື້ນຟູປະຊາກອນຂອງພວກເຂົາທີ່ໄດ້ສູນເສຍໄປໃນໄລຍະຂອງການປະຕິຮູບ ແລະຟື້ນຟູການຄວບຄຸມຂອງພວກເຂົາໃຫ້ເໜືອກວ່າອຳນາດຂອງພົນລະເມືອງ.
ໃນອະດີດທີ່ຜ່ານມາ ຊາວໂປຣແຕສແຕນໄດ້ສອນລູກຫຼານຂອງພວກເຂົາວ່າ ການສະແຫວງຫາຄວາມປອງດອງກັບຄຣິສຕະຈັກໂຣມັນຄາໂຕລິກນັ້ນເປັນການບໍ່ສັດຊື່ຕໍ່ພຣະເຈົ້າ. ແຕ່ຕອນນີ້ ຄວາມຮູ້ສຶກຂອງຊາວໂປຣແຕສແຕນທີ່ສະແດງອອກນັ້ນ ຊ້ຳພັດແຕກຕ່າງຈາກສະໄໝກ່ອນຫຼາຍ. ປັດຈຸບັນ ຊາວໂປຣແຕສແຕນໄດ້ລືມຄວາມໂຫດຮ້າຍຂອງຄຣິສຕະຈັກໂຣມັນຄາໂຕລິກໃນອະດີດ ແລະ ພວກເຂົາໄດ້ນິຍົມສາສະໜາຄາໂຕລິກຫຼາຍກ່ວາໃນອະດີດທີ່ຜ່ານມາ. ໃນບັນດາປະເທດເຫຼົ່ານັ້ນທີ່ຄຣິສຕະຈັກໂຣມັນຄາໂຕລິກເຄີຍໂຈມຕີຊາວໂປຣແຕສແຕນ ດຽວນີ້ຄຣິສຕະຈັກໂຣມັນຄາໂຕລິກໄດ້ໃຊ້ວິທີສ້າງຄວາມຫງົບສຸກ ເພື່ອທີ່ຈະມີອິດທິພົນໃນປະເທດເຫຼົ່ານັ້ນອີກຄັ້ງ. ສະນັ້ນ ຊາວໂປຣແຕສແຕນໃນປະເທດເຫຼົ່ານັ້ນຈຶ່ງມີຄວາມຄິດວ່າ ພວກເຮົາກໍບໍ່ໄດ້ແຕກຕ່າງກັນຫຼາຍໃນປະເດັນສຳຄັນຕ່າງໆດັ່ງທີ່ເຄີຍຄິດໄວ້ໃນອະດີດ. ແລະດຽວນີ້ ພວກເຂົາມີຄວາມຄິດອີກວ່າ ຖ້າພວກເຮົາຍິນຍອມກັນພຽງເລັກນ້ອຍໃນສ່ວນຂອງພວກເຮົາ ຈະນຳພາພວກເຮົາໄປສູ່ຄວາມເຂົ້າໃຈກັນກັບຄຣິສຕະຈັກໂຣມັນຄາໂຕລິກໄດ້ດີຂຶ້ນ. ສ່ວນບັນດາຜູ້ທີ່ປົກປ້ອງລະບອບການປົກຄອງຂອງສັນຕະປາປາກໍອ້າງວ່າ ຄຣິສຕະຈັກຂອງພວກເຂົາຖືກໃສ່ຮ້າຍປ້າຍສີມາຕະຫຼອດ ແລະອ້າງອີກວ່າ ເປັນເລື່ອງບໍ່ຍຸຕິທຳທີ່ຈະຕັດສິນຄຣິສຕະຈັກໃນມື້ນີ້ດ້ວຍການປົກຄອງຂອງໂບດໃນຊ່ວງຫຼາຍສັດຕະວັດຂອງຄວາມບໍ່ຮູ້ ແລະ ຄວາມມືດ. ພວກເຂົາແກ້ຕົວໃຫ້ກັບຄວາມໂຫດຮ້າຍທີ່ໜ້າຢ້ານຂອງຄຣິສຕະຈັກໂຣມັນຄາໂຕລິກວ່າ ມັນເປັນຜົນມາຈາກຄວາມປ່າເຖື່ອນຂອງປະເພນີໃນຍຸກສະໄໝນັ້ນ. {GC 563.1,2}
ທ່ານນາງເອເລັນ ຈີ. ໄວທ ໄດ້ທຳນາຍວ່າ "ຊາວໂປແຕສແຕນຂອງສະຫະລັດອາເມຣິກາຈະນຳໜ້າໃນການຍືນມືຜ່ານສ່ອງຫວ່າງເພື່ອທີ່ຈະຈັບມືກັບລັດທິເຊື່ອຜີ; ພວກເຂົາຈະຂ້າມເຫວ ເພື່ອຈັບມືກັບອຳນາດຂອງຄຣິສຕະຈັກໂຣມັນຄາໂຕລິກ; ແລະພາຍໃຕ້ອິດທິຜົນຂອງການລວມຕົວຂອງສາມສະຫະພາບນີ້ ປະເທດນີ້ຈະປະຕິບັດຕາມຂັ້ນຕອນຂອງຄຣິສຕະຈັກໂຣມັນຄາໂຕລິກໃນການຢຽບຢາມສິດທິຂອງຈິດໃຈ (ເສລີພາບໃນການເລືອກ) ຂອງປະຊາຊົນ." {GC 588}
ອ້າງອີງຈາກປຶ້ມ "ພຣະຄຳພີ" ພຣະນິມິດ 13:3,12,14
ອ້າງອີງຈາກປຶ້ມ "ປາຍທາງແຫ່ງຄວາມຫວັງ" (ສະບັບພາສາໄທ) {ວັກ 563.1,2; 588} ຂຽນໂດຍ ທ່ານ ນາງ ເອເລັນ ຈີ. ໄວທ
ຮ່ວມກັນເປັນໜຶ່ງ
"ຍິງໂສເພນີຄົນສຳຄັນທີ່ນັ່ງຢູ່ເທິງແມ່ນ້ຳຫຼວງຫຼາຍ ຄືຍິງທີ່ບັນດາກະສັດທົ່ວແຜ່ນດິນໂລກໄດ້ລ່ວງປະເວນີນຳ." (ພຣະນິມິດ 17:1, 2 TH1971)
ຄຣິສຕະຈັກໂຣມັນຄາໂຕລິກໄດ້ດຳເນີນການຢ່າງຕໍ່ເນື່ອງເພື່ອທີ່ຈະເພີ່ມຄວາມນິຍົມຂອງຕົນຢູ່ທົ່ວໂລກ ແລະ ຢູ່ທ່າມກາງປະຊາຊົນທົ່ວໄປ. ປັດຈຸບັນ ຄຣິສຕະຈັກໂຣມັນຄາໂຕລິກແມ່ນໄດ້ຄຣິສຕະຈັກໂປຣແຕສແຕນສ່ວນຫຼາຍມາຢູ່ຝ່າຍຂອງພວກເຂົາ. ເວລານີ້ ຄຣິສຕະຈັກໂຣມັນຄາໂຕລິກພະຍາຍາມທີ່ຈະໄດ້ຮັບອິດທິພົນຢູ່ໃນທ່າມກາງຄົນທີ່ມີອິດທິພົນ, ບຸກຄົນຂອງລັດຖະບານໃນປະເທດ ແລະ ຜູ້ນຳຂອງປະເທດ. ດ້ວຍເຫດນີ້ ຈຶ່ງຈະຟື້ນຟູອຳນາດທາງດ້ານພົນລະເມືອງ ເພື່ອທີ່ຈະສາມາດບັງຄັບໃຊ້ຂໍ້ຄຳສັ່ງຂອງມັນຢູ່ທ່າມກາງປະຊາຊົນທົ່ວໂລກ. ພຣະຄຳພີໄດ້ກ່າວໄວ້ວ່າ: "ຫົວໆໜຶ່ງຂອງສັດຮ້າຍເບິ່ງເໝືອນຖືກຟັນປານຕາຍ ແຕ່ບາດແຜທີ່ຖືກຟັນນັ້ນຮັກສາຫາຍແລ້ວ ຄົນທັງໂລກຕິດຕາມສັດຮ້າຍນັ້ນໄປດ້ວຍຄວາມອັດສະຈັນໃຈ." ແລະເຊັ່ນດຽວກັນກັບ "ບັນດາຄົນທີ່ຢູ່ໃນແຜ່ນດິນໂລກຈະບູຊາສັດຮ້າຍນັ້ນ ຄືຄົນທັງປວງທີ່ບໍ່ມີຊື່ຈົດໄວ້ໃນທະບຽນແຫ່ງຊີວິດຂອງລູກແກະຜູ້ຖືກຂ້າຕັ້ງແຕ່ທຳອິດສ້າງໂລກ" (ພຣະນິມິດ 13:3, 8).
ທ່ານນາງເອເລັນ ຈີ. ໄວທ ເຊິ່ງເປັນຜູ້ປະກາດພຣະຄຳຂອງພຣະເຈົ້າໄດ້ກ່າວໄວ້ວ່າ: "ເມື່ອຜູ້ນຳທີ່ມີຊື່ສຽງຂອງຄຣິສຕະຈັກທັງຫຼາຍໃນປະເທດອາເມຣິກາຮ່ວມມືກັນ ໂດຍໃຊ້ຫຼັກຄຳສອນອັນດຽວກັນເປັນເຄື່ອງມືຢຶດໝັ້ນ ພວກເຂົາຈະໃສ່ອິດທິພົນຕໍ່ລັດຖະບານໃນການອອກກົດໝາຍບັງຄັບໃຫ້ເຮັດຕາມຄຳສັ່ງຂອງພວກເຂົາ ແລະ ໃຫ້ສະໜັບສະໜູນສະຖາບັນຂອງພວກເຂົາ. ເມື່ອນັ້ນ ໂປຣແຕສແຕນໃນປະເທດອາເມຣິກາຈະສ້າງຮູບຈຳລອງຂອງອຳນາດຂອງຄຣິສຕະຈັກໂຣມັນຄາໂຕລິກຂຶ້ນ ແລະ ຈະກຳນົດໂທດໃຫ້ແກ່ພົນລະເມືອງຜູ້ທີ່ບໍ່ເຫັນດີດ້ວຍ ເຊິ່ງຈະເກີດຂຶ້ນແນ່ນອນ ຢ່າງຫຼີກໜີບໍ່ໄດ້." {GC 445.1}
ພວກເຮົາເຫັນວ່າ ໃນປີທີ່ຜ່ານມາລັດຖະບານຂອງສະຫະລັດອາເມຣິກາໄດ້ໃຫ້ຄວາມເຄົາລົບຫຼາຍຂຶ້ນແກ່ສັນຕະປາປາ. ໃນປີ 2015 ສັນຕະປາປາເຟຣນຊີສ ໄດ້ໄປຢ້ຽມຢາມສະຫະລັດອາເມຣິກາ. ລາວໄດ້ຮັບການຕ້ອນຮັບຈາກປະທານາທິບໍດີ ທ່ານ ບາຣັກ ໂອບາມາ. ເຖິງແມ່ນວ່າ ມີສັນຕະປາປາຫຼາຍຄົນທີ່ເຄີຍໄປຢ້ຽມຢາມສະຫະລັດອາເມຣິກາ ແຕ່ຄັ້ງນີ້ເປັນຄັ້ງທີ່ສຳຄັນທີ່ສຸດ ສັນຕະປາປາເຟຣນຊີສເປັນຄົນທຳອິດໃນປະຫວັດສາດທີ່ມີໂອກາດໄດ້ສົນທະນາກັບລັດຖະສະພາຂອງສະຫະລັດອາເມຣິກາ. ມັນໄດ້ສະແດງໃຫ້ເຫັນວ່າ ຄວາມຮູ້ສຶກຂອງນັກການເມືອງທີ່ມີຕໍ່ສັນຕະປາປາໄດ້ມີການປ່ຽນແປງໄປຫຼາຍ ເຊິ່ງແຕກຕ່າງຈາກບັນພະບຸລຸດຂອງພວກເຂົາທີ່ໄດ້ມາຍັງປະເທດອາມາຣິກາ ເພື່ອສະແຫວງຫາອິດສະລະພາບອອກຈາກການປົກຄອງຂອງສັນຕະປາປາທາງດ້ານສາສະໜາ ແລະ ການເມືອງ.
ຂ່າວປະຈຸບັນໄດ້ສະແດງໃຫ້ເຫັນວ່າ ຄວາມນິຍົມຂອງສັນຕະປາປາແມ່ນໄດ້ເພີ່ມຂຶ້ນຢ່າງຫຼວງຫຼາຍ ພາຍໃນປີທີ່ຜ່ານມາຢູ່ທ່າມກາງບັນດາຜູ້ນຳຂອງໂລກ. ສັນຕະປາປາຍັງໄດ້ເຂົ້າພົບ ແລະ ໃຫ້ຄຳແນະນຳແກ່ພວກເຂົາໃນທຸລະກິດຕ່າງໆຂອງປະເທດ ຫຼື ຂອງໂລກ. ດັ່ງນັ້ນ ພວກເຮົາໄດ້ເຫັນວ່າ ສັນຕະປາປາບໍ່ພຽງແຕ່ໄດ້ຮັບອຳນາດທາງດ້ານພົນລະເມືອງໃນປະເທດອາເມຣິກາເທົ່ານັ້ນ ແຕ່ໃນຫຼາຍພາກສ່ວນຂອງໂລກອີກດ້ວຍ.
ອ້າງອີງຈາກປຶ້ມ "ພຣະຄຳພີ" ພຣະນິມິດ 17:1,2; 13:3,8
ອ້າງອີງຈາກປຶ້ມ "ປາຍທາງແຫ່ງຄວາມຫວັງ" (ສະບັບພາສາໄທ) ບົດທີ 25 {ວັກ 445.1} ຂຽນໂດຍ ທ່ານ ນາງ ເອເລັນ ຈີ. ໄວທ
ຫຼັກຄຳສອນຜິດສອນຕັ້ງແຕ່ອະດີດ
ເມື່ອຄຣິສຕະຈັກໂຣມັນຄາໂຕລິກໄດ້ຮັບອິດທິພົນໃນໂລກອີກຄັ້ງ ພຣະຄຳພີໄດ້ກ່າວວ່າ ມັນຈະເຮັດໃຫ້ໂລກ "ມົວເມົາດ້ວຍເຫຼົ້າອະງຸ່ນແຫ່ງການລ່ວງປະເວນີຂອງນາງ” (ພຣະນິມິດ 17:2) ເຫຼົ້າອະງຸ່ນຂອງບາບີໂລນແມ່ນຫຼັກຄຳສອນຜິດຂອງຄຣິສຕະຈັກໂຣມັນຄາໂຕລິກ. ພວກເຂົາອ້າງວ່າ ເປັນຜູ້ຕິດຕາມພຣະເຢຊູ, ພວກເຂົາເຮັດເຄື່ອງໝາຍໄວ້ທີ່ຄຣິສຕະຈັກຂອງພວກເຂົາດ້ວຍໄມ້ກາງແຂນ ແລະພວກເຂົາໃສ່ໄມ້ກາງແຂນຢູ່ຄໍຂອງພວກເຂົາ ແຕ່ພວກເຂົາບໍ່ໄດ້ປະຕິບັດຕາມຄຳສອນທີ່ແທ້ຈິງຂອງພຣະເຢຊູ ແລະພຣະຄຳພີ.
ຄຣິສຕະຈັກໂຣມັນຄາໂຕລິກແມ່ນມາຈາກການຮ່ວມຕົວກັນລະຫວ່າງສາສະໜາຮູບເຄົາຣົບ ແລະ ສາສະໜາຄຣິສຕຽນ. ພວກເຂົາໄດ້ນຳປະເພນີທີ່ຄ້າຍຄືສາສະໜາຮູບເຄົາຣົບມາປະຕິບັດຢູ່ໃນຄຣິສຕະຈັກຂອງພວກເຂົາ ດ້ວຍການກະທຳເຊັ່ນນີ້ ພວກເຂົາໄດ້ບິດເບືອນພຣະລັກສະນະຂອງພຣະເຈົ້າ ແລະຫຼັງຈາກນັ້ນ ພວກເຂົາກໍໃຊ້ການບັງຄັບປະຊາຊົນໃຫ້ຍອມຮັບເອົາຫຼັກຄຳສອນຂອງພວກເຂົານອກເໜືອຈາກພຣະຄຳພີ.
ໜຶ່ງໃນຫຼັກຄຳສອນທີ່ບໍ່ຖືກຕ້ອງເຫຼົ່ານີ້ແມ່ນຄວາມຄິດທີ່ວ່າ ນາລົກມີຢູ່ຈິງ. ສັນຕະປາປາໄດ້ນຳຫຼັກຄຳສອນທີ່ບໍ່ຖືກຕ້ອງເຫຼົ່ານີ້ມາໃຊ້ ເພື່ອສ້າງຄວາມຢ້ານກົວໃຫ້ກັບຜູ້ທີ່ເຊື່ອງ່າຍ ແລະ ເຊື່ອໃນເລື່ອງງົມງວາຍ. ໂດຍຫຼັກຄຳສອນນີ້ທີ່ເວົ້າວ່າ ມີສະຖານທີ່ທໍລະມານແຫ່ງໜຶ່ງ ເຊິ່ງໃນນັ້ນພວກວິນຍານທີ່ຍັງມີຄວາມຜິດບໍ່ເຖິງຂັ້ນຕົກນາລົກ ຕ້ອງໄປຮັບໂທດສຳລັບບາບຂອງພວກເຂົາ ແລະເມື່ອວິນຍານເຫຼົ່ານັ້ນລອດພົ້ນຈາກຄວາມບໍ່ບໍຣິສຸດແລ້ວ ພວກເຂົາກໍຈະຖືກຮັບຂຶ້ນໄປໃນສະຫວັນ. {GC 58.3}
ຍັງມີເລື່ອງປຸງແຕ່ງຂຶ້ນມາອີກ ຄືຫຼັກຄຳສອນເລື່ອງໃບບຸນລ້າງບາບ. ການອະໄພຄວາມບາບຢ່າງສົມບູນຄື ຄວາມບາບທັງໃນອາດີດ, ປະຈຸບັນ ແລະອະນາຄົດ ແລະຈະລອດພົ້ນຈາກຄວາມເຈັບປ່ວຍທັງປວງ ແລະໂທດທີ່ຈະຕ້ອງໄດ້ຮັບ. ໃນອະດີດ ເລື່ອງໃບບຸນລ້າງບາບເຫຼົ່ານີ້ໄດ້ໃຫ້ສັນຍາກັບທຸກຄົນທີ່ເຂົ້າຮ່ວມກັບສັນຕະປາປາໃນການເຮັດສົງຄາມ ເພື່ອຂະຫຍາຍອຳນາດໃນການລົງໂທດສັດຕູຂອງສັນຕະປາປາ ຫຼື ໃນການທຳລາຍລ້າງຜູ້ທີ່ກ້າປະຕິເສດການມີອຳນາດສູງສຸດຝ່າຍຈິດວິນຍານຂອງລາວ. ປະຊາຊົນຍັງຖືກສອນວ່າ ໂດຍການຈ່າຍເງິນໃຫ້ຄຣິສຕະຈັກ ພວກເຂົາຈະຊ່ວຍຕົນເອງໃຫ້ພົ້ນຈາກບາບ ແລະ ຍັງປົດປ່ອຍວິນຍານຂອງໝູ່ເພື່ອນທີ່ຕາຍໄປແລ້ວ ເຊິ່ງຖືກຂັງຢູ່ໃນເປວໄຟແຫ່ງການທໍລະມານນັ້ນໄດ້. ໂດຍວິທີເຊັ່ນນີ້ ຄຣິສຕະຈັກໂຣມັນຄາໂຕລິກໄດ້ເຕີມເງິນເຂົ້າໃນທະນາຄານຂອງເຂົາ ແລະ ຄົງຄວາມສະຫງ່າງາມ, ຄວາມຟຸ່ມເຟືອຍ ແລະ ຄວາມຊົ່ວຊ້າຂອງການເຮັດຕົວເປັນຜູ້ແທນຂອງພຣະເຈົ້າຜູ້ທີ່ບໍ່ມີບ່ອນຈະວາງຫົວລົງ. {GC 59.1}
ຈົນເຖິງທຸກມື້ນີ້ ຄຣິສຕະຈັກໂຣມັນຄາໂຕລິກຍັງໃຫ້ໃບບຸນລ້າງບາບເພື່ອສົ່ງເສີມປະຊາຊົນໃຫ້ເຂົ້າຮ່ວມກິດຈະກຳບາງຢ່າງທາງດ້ານເທດສະການ. ດັ່ງນັ້ນ ຈຶ່ງເປັນການກະກຽມປະຊາຊົນເພື່ອເຮັດຕາມຄຳສັ່ງຂອງພວກເຂົາອີກຄັ້ງໜຶ່ງ. ນອກຈາກນີ້ ພວກເຂົາຍັງໄດ້ສອນປະຊາຊົນວ່າ ປະຊາຊົນສາມາດໄດ້ຮັບຄວາມລອດໂດຍການກະທຳຄຸນຄວາມດີ ຫຼື ຈ່າຍເງິນໃຫ້ໂບດ. ຫຼັກຄຳສອນເຫຼົ່ານີ້ ແມ່ນກົງກັນຂ້າມຈາກຫຼັກຄຳສອນຂອງພຣະຄຳພີ.
ຊາຕານພະຍາຍາມຢ່າງຕໍ່ເນື່ອງໃນການບິດເບືອນລັກສະນະຂອງພຣະເຈົ້າ, ຄວາມເຂົ້າໃຈຂອງມະນຸດກ່ຽວກັບຄວາມບາບ ແລະ ປະເດັນທີ່ສຳຄັນໃນການຂັດແຍ້ງທີ່ຍິ່ງໃຫຍ່ລະຫວ່າງພຣະເຈົ້າ ແລະ ຊາຕານ. ຊາຕານໄດ້ໃຫ້ມະນຸດມີຄວາມຄິດຂໍ້ແກ້ຕົວເພື່ອໃຫ້ເຮັດບາບໄດ້. ໃນເວລາດຽວກັນ ຊາຕານຍັງໄດ້ປູກຝັງແນວຄິດທີ່ຜິດກ່ຽວກັບພຣະເຈົ້າ ເພື່ອວ່າມະນຸດຈະຄິດເຫັນພຣະເຈົ້າດ້ວຍຄວາມຢ້ານກົວ ແລະ ຄວາມກຽດຊັງ ແທນທີ່ຈະເຫັນພຣະເຈົ້າດ້ວຍຄວາມຮັກ.
ອ້າງອີງຈາກປຶ້ມ "ພຣະຄຳພີ" ພຣະນິມິດ 17:2
ອ້າງອີງຈາກປຶ້ມ "ປາຍທາງແຫ່ງຄວາມຫວັງ" (ສະບັບພາສາໄທ) ບົດທີ 35 {ວັກ 58.3; 59.1} ຂຽນໂດຍ ທ່ານ ນາງ ເອເລັນ ຈີ. ໄວທ
ຫຼັກຄຳສອນຜິດສອນໃນປັດຈຸບັນ
ໃນພຣະທຳກິດຈະການ 20:28-30 ກ່າວວ່າ: "ທ່ານທັງຫຼາຍຈົ່ງລະວັງຕົວເອງໃຫ້ດີ ແລະ ຮັກສາຝູງແກະທີ່ພຣະວິນຍານບໍລິສຸດໄດ້ຊົງຕັ້ງພວກທ່ານໄວ້ໃຫ້ເປັນຜູ້ດູແລ ເພື່ອບຳລຸງລ້ຽງຄຣິສຕະຈັກຂອງພຣະເຈົ້າທີ່ພຣະອົງຊົງໄຖ່ມາດ້ວຍພຣະໂລຫິດຂອງພຣະອົງເອງ. ເຮົາຮູ້ຢູ່ວ່າເມື່ອເຮົາຈາກໄປແລ້ວ ຈະມີໝາໄນຕົວຮ້າຍເຂົ້າມາໃນທ່າມກາງພວກທ່ານ ມັນຈະບໍ່ເວັ້ນຊີວິດຂອງຝູງແກະ. ໃນທ່າມກາງພວກທ່ານຈະມີບາງຄົນເວົ້າປີ້ນຄວາມຈິງ ເພື່ອຊັກຊວນເອົາຄົນເຊື່ອຖືໃຫ້ຫຼົງໄປຕາມເຂົາ."
ໃນທາງກົງກັນຂ້າມ ຄຣິສຕະຈັກໂປຣແຕສແຕນຫຼາຍໂບດໄດ້ມີຫຼັກຄຳສອນຜິດ ເຖິງແມ່ນວ່າ ບາງຫຼັກຄຳສອນຈະແຕກຕ່າງຈາກຫຼັກຄຳສອນຂອງຄຣິສຕະຈັກໂຣມັນຄາໂຕລິກກໍຕາມ ແຕ່ຫຼັກຄຳສອນເຫຼົ່ານັ້ນກໍມີອັນຕະລາຍບໍ່ໜ້ອຍກວ່າຫຼັກຄຳສອນຂອງຄາໂຕລິກ. ຄຳສອນທີ່ຜິດຢ່າງໃຫຍ່ອັນໜຶ່ງທີ່ຄຣິສຕະຈັກໂປຣແຕສແຕນໄດ້ສອນນັ້ນກໍຄືວ່າ ພຣະຄຸນຂອງພຣະເຈົ້າພຽງພໍແລ້ວ. ສະນັ້ນ ພວກເຂົາກໍເຮັດເປັນເມີນເຊີຍ ຫຼື ບໍ່ສົນໃຈທີ່ຈະຊຳລະຕົນເອງໃຫ້ບໍຣິສຸດ. ແຕ່ພຣະຄຳພີສອນວ່າ ພວກເຮົາຕ້ອງເປັນຄົນບໍຣິສຸດ. (1 ເປໂຕ 1:16) ຄຣິສຕະຈັກໂປຣແຕສແຕນເຫຼົ່ານີ້ໄດ້ສອນວ່າ ພຣະເຈົ້າປຽມລົ້ນໄປດ້ວຍຄວາມຮັກ ແລະ ພຣະອົງຈະບໍ່ລົງໂທດຄົນບາບຍ້ອນຄວາມຜິດບາບອັນເລັກນ້ອຍທີ່ພວກເຂົາໄດ້ກະທຳ. ສະນັ້ນ ການປະຕິບັດຕາມພຣະບັນຍັດທັງໝົດຂອງພຣະເຈົ້າຈຶ່ງຖືກລະເລີຍ.
ການຊຳລະໃຫ້ບໍຣິສຸດທີ່ກຳລັງໄດ້ຮັບຄວາມນິຍົມໃນໂລກແຫ່ງສາສະໜານັ້ນ ຈະມີເລື່ອງຂອງວິນຍານແຫ່ງການຍົກຕົວເອງ ແລະ ການລະເລີຍພຣະບັນຍັດຂອງພຣະເຈົ້າ ເຊິ່ງເຮັດໃຫ້ເລື່ອງການຊຳລະນີ້ ກາຍເປັນສິ່ງທີ່ຜິດໄປຈາກຫຼັກຄຳສອນຂອງພຣະຄຳພີ. ຜູ້ທີ່ໃຫ້ການສະໜັບສະໜູນຫຼັກຄຳສອນນີ້ສອນວ່າ ການຊຳລະໃຫ້ບໍຣິສຸດເປັນສິ່ງທີ່ເກີດຂຶ້ນໂດຍທັນທີ່ໄດ້ມາດ້ວຍຄວາມເຊື່ອເທົ່ານັ້ນ ແລະຈະບັນລຸໄປຈົນເຖິງຄວາມບໍຣິສຸດຢ່າງສົມບູນ. "ເຊື່ອເທົ່ານັ້ນ" ພວກເຂົາເວົ້າ "ແລ້ວພຣະພອນຈະເປັນຂອງທ່ານ." ພວກເຂົາສອນວ່າ ມີພຽງຄວາມເຊື່ອເທົ່ານັ້ນກໍພຽງພໍແລ້ວ. ໃນຂະນະດຽວກັນ ພວກເຂົາປະຕິເສດອຳນາດຂອງພຣະບັນຍັດຂອງພຣະເຈົ້າ ພວກເຂົາອ້າງວ່າ ໄດ້ຮັບການປົດປ່ອຍຈາກຂໍ້ຜູກພັນຂອງການຖືຮັກສາພຣະບັນຍັດແລ້ວ. ແຕ່ຈະເປັນໄດ້ແນວໃດ ທີ່ມະນຸດຈະເປັນຜູ້ບໍຣິສຸດສອດຄອງຕາມນ້ຳພຣະໄທ ແລະພຣະລັກສະນະຂອງພຣະເຈົ້າ ໂດຍບໍ່ຕ້ອງເຂົ້າມາປະສານກັບຫຼັກການຕ່າງໆທີ່ສຳແດງໃຫ້ເຫັນເຖິງທຳມະຊາດ ແລະນ້ຳພຣະໄທຂອງພຣະອົງ ແລະທີ່ສະແດງວ່າເປັນທີ່ຊອບພຣະໄທຂອງພຣະອົງ? {GC 471.3}
ຄວາມຕ້ອງການຢາກຈະມີສາສະໜາທີ່ລຽບງ່າຍ ເຊິ່ງບໍ່ຕ້ອງໃຊ້ຄວາມພະຍາຍາມມຸ່ງໝັ້ນ, ບໍ່ຕ້ອງປະຕິເສດຕົວເອງ, ບໍ່ຕ້ອງແຍກຕົວເອງອອກຈາກຄວາມໂງ່ຂອງໂລກ ໄດ້ເຮັດໃຫ້ຫຼັກຄຳສອນທີ່ວ່າ "ເຊື່ອ ແລະ ຕ້ອງເຊື່ອເທົ່ານັ້ນ" ກາຍເປັນຫຼັກຄຳສອນທີ່ໄດ້ຮັບຄວາມນິຍົມ. ແຕ່ພຣະຄຳຂອງພຣະເຈົ້າໄດ້ບອກໄວ້ແນວໃດ? ອັກຄະສາວົກຢາໂກໂບກ່າວວ່າ: "ພີ່ນ້ອງທັງຫຼາຍຂອງເຮົາເອີຍ ຖ້າຄົນໜຶ່ງເວົ້າວ່າ ຕົນມີຄວາມເຊື່ອ ແຕ່ບໍ່ມີການປະຕິບັດ ຈະມີປະໂຫຍດຫຍັງ? ຄວາມເຊື່ອແບບນັ້ນຈະເຮັດໃຫ້ລາວພົ້ນໄດ້ບໍ?... ໂອ ຄົນໂງ່ເອີຍ ເຈົ້າຢາກຮຽນຮູ້ຫຼືວ່າ ຄວາມເຊື່ອທີ່ບໍ່ມີການປະຕິບັດນັ້ນກໍຕາຍແລ້ວ? ອັບຣາຮາມບັນພະບຸລຸດຂອງພວກເຮົາຖືກພຣະເຈົ້າຊົງຮັບວ່າເປັນຄົນຊອບທຳຕໍ່ໜ້າພະອົງ ກໍໂດຍການປະຕິບັດຂອງເພິ່ນໃນການຖວາຍອີຊາກລູກຊາຍຂອງເພິ່ນເທິງແທ່ນບູຊາ. ເຈົ້າກໍເຫັນແລ້ວວ່າ ຄວາມເຊື່ອກັບການປະຕິບັດຂອງເພິ່ນກໍໄປຄວບຄູ່ກັນ ຄວາມເຊື່ອຂອງເພິ່ນຖືກເຮັດໃຫ້ດີຄົບຖ້ວນໄດ້ກໍໂດຍການປະຕິບັດ... ເຈົ້າທັງຫຼາຍກໍເຫັນແລ້ວວ່າ ຜູ້ໃດຈະໄດ້ຊົງຖືວ່າເປັນຄົນຊອບທຳ ກໍເນື່ອງດ້ວຍຄວາມເຊື່ອທີ່ມີການປະຕິບັດ ແລະ ບໍ່ແມ່ນດ້ວຍຄວາມເຊື່ອພຽງຢ່າງດຽວ" (ຢາໂກໂບ 2:14-24).
ຄຳພະຍານຈາກພຣະຄຳຂອງພຣະເຈົ້າແມ່ນຕໍ່ຕ້ານຫຼັກຄຳສອນອັນຫຼອກລວງກ່ຽວກັບຄວາມເຊື່ອທີ່ປາສະຈາກການກະທຳ. ການອ້າງພຣະຄຸນຂອງສະຫວັນ ໂດຍບໍ່ເຮັດຕາມຂໍ້ກຳນົດທີ່ເປັນເງື່ອນໄຂເພື່ອຮັບ ຄວາມເມດຕານັ້ນ ບໍ່ແມ່ນຄວາມເຊື່ອ ແຕ່ເປັນການສົມມຸດຄິດເອົາເອງ; ເພາະຄວາມເຊື່ອທີ່ແທ້ຈິງຕ້ອງມີພື້ນຖານວາງຢູ່ເທິງພຣະສັນຍາ ແລະ ເງື່ອນໄຂຂອງພຣະຄຳພີ. {GC 472.2}
ຢ່າໃຫ້ຜູ້ໃດຫຼອກລວງຕົວເອງດ້ວຍຄວາມເຊື່ອທີ່ວ່າ ພວກເຂົາຈະເປັນຄົນບໍຣິສຸດໄດ້ໃນຂະນະທີ່ຕັ້ງໃຈລ່ວງລະເມີດພຣະບັນຍັດຂໍ້ໃດຂໍ້ໜຶ່ງຂອງພຣະເຈົ້າ. ການກະທຳຄວາມຜິດໃນສິ່ງທີ່ຮູ້ວ່າເປັນຄວາມບາບ ຈະເຮັດໃຫ້ສຽງຂອງພຣະວິນຍານທີ່ເປັນພະຍານນັ້ນມິດງຽບ ແລະເຮັດໃຫ້ຈິດວິນຍານແຍກອອກໄປຈາກພຣະເຈົ້າ. "ຄວາມບາບແມ່ນການລ່ວງລະເມີດພຣະບັນຍັດ" ແລະ "ດັ່ງນັ້ນ ຜູ້ໃດທີ່ຕັ້ງໝັ້ນຢູ່ໃນພຣະອົງ ຜູ້ນັ້ນກໍບໍ່ເຮັດບາບອີກຕໍ່ໄປ ສ່ວນຜູ້ໃດທີ່ຍັງເຮັດບາບຕາມເຄີຍ ຜູ້ນັ້ນກໍຍັງບໍ່ເຫັນພຣະອົງ ແລະ ຍັງບໍ່ຮູ້ຈັກພຣະອົງ." (1 ໂຢຮັນ 3:6). ເຖິງແມ່ນວ່າ ໃນຈົດໝາຍຂອງໂຢຮັນຈະຂຽນເຖິງຄວາມຮັກໄວ້ຢ່າງເຕັມທີ່, ແຕ່ເພິ່ນກໍບໍ່ລັງເລໃຈທີ່ຈະເປີດເຜີຍເຖິງລັກສະນະທີ່ແທ້ຈິງຂອງຄົນອີກກຸ່ມໜຶ່ງທີ່ອ້າງວ່າ ຕົນໄດ້ຮັບການຊຳລະ ແຕ່ຍັງດຳລົງຊີວິດຢູ່ໃນການລ່ວງລະເມີດພຣະບັນຍັດຂອງພຣະເຈົ້າຢູ່. "ຖ້າຄົນໃດເວົ້າວ່າ 'ຕົນຮູ້ຈັກພຣະອົງ' ແຕ່ບໍ່ໄດ້ປະພຶດຕາມກົດບັນຍັດຂອງພຣະອົງ ຄົນນັ້ນກໍເວົ້າຕົວະ ແລະ ຄວາມຈິງກໍບໍ່ມີຢູ່ໃນລາວ. ແຕ່ຜູ້ໃດກໍຕາມທີ່ປະພຶດຕາມພຣະຄຳຂອງພຣະອົງ ຜູ້ນັ້ນແຫລະ ທີ່ຮັກພຣະເຈົ້າຢ່າງຄົບຖ້ວນບໍຣິບູນໂດຍແທ້ຈິງ." (1 ໂຢຮັນ 2:4,5).
ນີ້ແມ່ນວິທີທົດລອງຄວາມເຊື່ອຂອງມະນຸດທຸກຄົນ. ພວກເຮົາບໍ່ອາດຍອມຮັບວ່າ ມະນຸດຄົນໃດເປັນຜູ້ບໍຣິສຸດ ໂດຍບໍ່ໄດ້ນຳຜູ້ນັ້ນໄປທຽບກັບຄວາມບໍຣິສຸດຂອງພຣະເຈົ້າ ເຊິ່ງເປັນພຽງມາດຕະຖານດຽວໃນສະຫວັນ ແລະ ໃນໂລກ. ຖ້າມະນຸດບໍ່ມີຄວາມຮູ້ສຶກເຖິງຄວາມສຳຄັນຂອງກົດບັນຍັດແຫ່ງສິນທຳ, ຖ້າພວກເຂົາໝິ່ນປະໝາດ ແລະ ເຮັດໃຫ້ຂໍ້ບັງຄັບຂອງພຣະເຈົ້າເບິ່ງເປັນເລື່ອງເລັກນ້ອຍ, ຖ້າຜູ້ໃດເຮັດໃຫ້ຂໍ້ເລັກນ້ອຍ ຂໍ້ໜຶ່ງໃນພຣະບັນຍັດເຫຼົ່ານີ້ເບົາລົງ ແລະ ສອນຄົນອື່ນໃຫ້ເຮັດຢ່າງນັ້ນດ້ວຍ ຜູ້ນັ້ນກໍຈະບໍ່ມີຄ່າໃນສາຍຕາຂອງສະຫວັນ ແລະ ເຮົາຈະຮູ້ວ່າ ຄຳອ້າງຂອງພວກເຂົານັ້ນປາສະຈາກຮາກຖານ. {GC 472.3}
ອ້າງອີງຈາກປຶ້ມ "ພຣະຄຳພີ" ກິດຈະການ 20:28-30; 1ເປໂຕ 1:16; ຢາໂກໂບ 2:14-24; 1ໂຢຮັນ 3:6; 2:4,5.
ອ້າງອີງຈາກປຶ້ມ "ປາຍທາງແຫ່ງຄວາມຫວັງ" (ສະບັບພາສາໄທ) {ວັກ 471.3; 472.1-3} ຂຽນໂດຍ ທ່ານ ນາງ ເອເລັນ ຈີ. ໄວທ
ວິທີການຊ່ວຍໃຫ້ລອດພົ້ນທີ່ສອດຄ່ອງຕາມພຣະຄຳພີ
ຂັ້ນຕອນທຳອິດໃນການກັບຄືນໄປຫາພຣະເຈົ້າແມ່ນການສຳນຶກຜິດໃນຄວາມບາບ. ເມື່ອຄົນບາບແນມໄປເບິ່ງພຣະບັນຍັດ ລາວກໍລະນຶກໄດ້ວ່າ ຕົວເອງມີຄວາມຜິດໃນການລ່ວງລະເມີດພຣະບັນຍັດຂອງພຣະເຈົ້າ. (1 ໂຢຮັນ 3:4; ໂຣມ 3:20) {GC 467.3}
ພຣະບັນຍັດເປີດເຜີຍໃຫ້ມະນຸດເຫັນຄວາມບາບຂອງເຂົາ ແຕ່ພຣະບັນຍັດບໍ່ໄດ້ຈັດຕຽມທາງແກ້ໄວ້ໃຫ້. ຄ່າຈ້າງຂອງຄວາມຜິດບາບກໍຄືຄວາມຕາຍ. (ໂຣມ 6:23) ສະນັ້ນ ເຂົາຈະຕ້ອງສຳນຶກຜິດໃນຄວາມບາບ ຕໍ່ພຣະເຈົ້າທີ່ໄດ້ລ່ວງລະເມີດພຣະບັນຍັດຂອງພຣະອົງ ແລະມີຄວາມເຊື່ອໃນພຣະເຢຊູຜູ້ຊົງເປັນເຄື່ອງບູຊາໄຖ່ບາບ. ດ້ວຍວິທີເຫຼົ່ານີ້ ເຂົາຈະໄດ້ຮັບ "ການຍົກໂທດບາບທີ່ໄດ້ເຮັດຜ່ານມານັ້ນ" ແລະຮັບສ່ວນໃນສະພາບຂອງພຣະເຈົ້າ. ຈາກນັ້ນ ເຂົາກໍກາຍເປັນລູກຂອງພຣະເຈົ້າ. {GC 467.4}
ຕອນນີ້ ເຂົາມີອິດສະລະໃນການລ່ວງລະເມີດພຣະບັນຍັດຂອງພຣະເຈົ້າບໍ? ເປົາໂລກ່າວວ່າ: "ຖ້າຢ່າງນັ້ນ ພວກເຮົາຈະລຶບລ້າງກົດບັນຍັດດ້ວຍຄວາມເຊື່ອບໍ? ຂໍພຣະເຈົ້າຢ່າຍອມໃຫ້ເປັນເຊັ່ນນັ້ນເລີຍ: ແຕ່ພວກເຮົາກັບເປັນຜູ້ສະໜັບສະໜູນກົດບັນຍັດອີກ." "ພວກເຮົາຜູ້ຕາຍຕໍ່ບາບກຳນັ້ນ ແລ້ວຈະສືບຕໍ່ດຳເນີນຊີວິດແບບນັ້ນໄດ້ຢ່າງໃດ?" ແລະໂຢຮັນໄດ້ກ່າວວ່າ: "ເພາະນີ້ແຫລະ ເປັນຄວາມຮັກຕໍ່ພຣະເຈົ້າ ຄືໃຫ້ເຮົາທັງຫຼາຍຖືຮັກສາບັນດາກົດບັນຍັດຂອງພຣະອົງ ແລະ ກົດບັນຍັດຂອງພຣະອົງນັ້ນກໍບໍ່ຍາກໜັກເກີນໄປ." (ໂຣມ 3:31; 6:2; 1 ໂຢຮັນ 5:3).
ເມື່ອຄົນບາບເຂົ້າມາຫາພຣະເຢຊູຜ່ານທາງການອະທິຖານ ແລະ ການສຶກສາພຣະຄຳຂອງພຣະເຈົ້າ ຫົວໃຈຂອງພວກເຂົາຈະນຳເຂົ້າໄປສູ່ຄວາມສາມັກຄີທຳກັບພຣະເຈົ້າ ເໝືອນກັບຖືກນຳເຂົ້າໄປສູ່ຄວາມສອດຄອງກັບກົດບັນຍັດຂອງພຣະອົງ. ໃນແຕ່ລະມື້, ພວກເຂົາຈະພະຍາຍາມເພື່ອໃຫ້ມີລັກສະນະທີ່ບໍຣິສຸດ. ການຊຳລະໃຫ້ບໍຣິສຸດນີ້ຈະສຳເລັດໄດ້ໂດຍຄວາມເຊື່ອໃນພຣະເຢຊູເທົ່ານັ້ນ ແລະ ໂດຍອຳນາດຂອງພຣະວິນຍານບໍຣິສຸດຂອງພຣະເຈົ້າທີ່ສະຖິດຢູ່ຮ່ວມນຳ. ຜູ້ເຊື່ອຈະບໍ່ໄດ້ຮັບຄວາມລອດດ້ວຍການກະທຳຂອງຕົນເອງ ແຕ່ຄວາມລອດແມ່ນມາຈາກພຣະເຈົ້າທີ່ປ່ຽນແປງຜູ້ນັ້ນ. ຄຣິສຕຽນຈະຮູ້ສຶກເຖິງຄວາມຍົວະຍວນໃຈຂອງບາບ ແຕ່ພວກເຂົາຈະຍັງຄົງຢຶດໝັ້ນຕໍ່ສູ້ຄວາມບາບຢູ່ສະເໝີ ນີ້ເປັນຈຸດທີ່ພວກເຂົາຕ້ອງໄດ້ອະທິຖານໃຫ້ຫຼາຍທີ່ສຸດ. ເມື່ອຄວາມອ່ອນແອຂອງມະນຸດຮ່ວມເຂົ້າກັບຄວາມເຂັ້ມແຂງຂອງພຣະເຈົ້າ ແລ້ວພວກເຂົາຈະຮ້ອງຂຶ້ນດ້ວຍຄວາມເຊື່ອວ່າ: "ແຕ່ຈົ່ງໂມທະນາຂອບພຣະຄຸນພຣະເຈົ້າ ຜູ້ຊົງປະທານໄຊຊະນະໃຫ້ແກ່ເຮົາທັງຫຼາຍ ໂດຍທາງອົງພຣະເຢຊູຄຣິສເຈົ້າຂອງພວກເຮົາ" (1 ໂກຣິນໂທ 15:57) {GC 469.3}
ພຣະຄຳພີເປີດເຜີຍໃຫ້ເຫັນຢ່າງຊັດເຈນວ່າ ຜົນຂອງການຊຳລະໃຫ້ບໍຣິສຸດນັ້ນຈະກ້າວໜ້າຂຶ້ນໄປຢ່າງຕໍ່ເນື່ອງ. ບັດນີ້ ພວກເຂົາຈະຕ້ອງ "ກ້າວໜ້າໄປສູ່ຄວາມສົມບູນແບບ" ເພື່ອທີ່ຈະເຕີບໃຫຍ່ຂຶ້ນ "ຄືເຕັມເຖິງຂະໜາດຄວາມສົມບູນຂອງພຣະຄຣິດ" (ເຮັບເຣີ 6:1; ເອເຟໂຊ 4:13). {GC 470.1}
ບັນດາຜູ້ທີ່ໄດ້ຮັບການຊຳລະໃຫ້ບໍຣິສຸດໃນພຣະຄຳພີ ຈະສະແດງໃຫ້ເຫັນເຖິງຈິດວິນຍານທີ່ອ່ອນນ້ອມຖ່ອມຕົວ, ຈະບໍ່ຍົກຕົວເອງຂຶ້ນ, ບໍ່ໂອ້ອວດກ່າວອ້າງວ່າ ຕົນເອງຫຼຸດພົ້ນຈາກຄວາມບາບແລ້ວ ແຕ່ຄຣິສຕຽນຈະພະຍາຍາມຢູ່ຕະຫຼອດເວລາເພື່ອສະທ້ອນພຣະລັກສະນະຂອງພຣະເຢຊູຢ່າງເຕັມທີ່. (1 ໂຢຮັນ 1:10) {GC 471.2}
ຂໍ້ຜິດພາດສອງຂໍ້ທີ່ຄວນລະວັງ
ຂໍ້ຜິດພາດທຳອິດທີ່ມັກຈະສອນກັນເລື້ອຍໆວ່າ ຄວາມລອດນັ້ນໄດ້ມາຈາກການກະທຳຄຸນຄວາມດີ. ແຕ່ນີ້ບໍ່ໄດ້ສອດຄ່ອງຕາມພຣະຄຳພີ. ພຣະຄຳພີກ່າວວ່າ: "ຄົນຜິວດຳປ່ຽນຜິວໜັງຂອງຕົນໄດ້ບໍ? ຫຼື ເສືອດາວຈະລຶບຈຸດຕາມຫນັງຂອງມັນໄດ້ບໍ? ຖ້າໄດ້ ຖ້າດັ່ງນັ້ນ ເຈົ້າຜູ້ເຄີຍເຮັດແຕ່ການຊົ່ວກໍຮຽນຮູ້ເຮັດການດີໄດ້." (ເຢເຣມີຢາ 13:23).
ຂໍ້ຜິດພາດທີສອງເຊິ່ງກົງກັນຂ້າມກັບຂໍ້ຜິດພາດທຳອິດນັ້ນແມ່ນການຄິດວ່າ ພວກເຮົາສາມາດລອດໄດ້ໂດຍຄວາມເຊື່ອເທົ່ານັ້ນ ແລະ ການຊຳລະລ້າງໃຫ້ບໍຣິສຸດນັ້ນແມ່ນບໍ່ຈຳເປັນ. ແຕ່ໃນພຣະຄຳພີຍັງໄດ້ຊີ້ຊັດເຈນເຖິງຂໍ້ຜິດພາດເຫຼົ່ານີ້ເຊັ່ນກັນ, "ແລະທຸກຄົນທີ່ມີຄວາມຫວັງຢ່າງນີ້ໃນພຣະອົງ ກໍຍ່ອມຊຳລະຕົນໃຫ້ບໍຣິສຸດ ເໝືອນດັ່ງທີ່ພຣະອົງຊົງບໍຣິສຸດ." (1 ໂຢຮັນ 3:3).
ອ້າງອີງຈາກປຶ້ມ "ປາຍທາງແຫ່ງຄວາມຫວັງ" (ສະບັບພາສາໄທ) {ວັກ 467:3,4; 469.3; 470.1; 471.2} ຂຽນໂດຍ ທ່ານ ນາງ ເອເລັນ ຈີ. ໄວທ