Embedded Files
ຂ່າວສານເຖິງຄຣິສຕະຈັກໃນປັດຈຸບັນ
ຂ່າວສານເຖິງຄຣິສຕະຈັກໃນປັດຈຸບັນ
"ຈົ່ງຂຽນໄປຍັງທູດສະຫວັນຂອງພຣະເຈົ້າ ໃນຄຣິສຕະຈັກທີ່ເມືອງເລົາດີເຊຍວ່າ: ນີ້ເປັນຖ້ອຍຄຳຂອງພຣະອົງທີ່ເປັນອາແມນ ພຣະອົງຜູ້ເປັນພະຍານຜູ້ສັດຊື່ ແລະ ຍຸຕິທຳ. ພຣະອົງເປັນຕົ້ນກຳເນີດແຫ່ງສິ່ງສາລະພັດທີ່ພຣະເຈົ້າຊົງສ້າງໄວ້ຊົງກ່າວດັ່ງນີ້ວ່າ ເຮົາຮູ້ຈັກການກະທຳຂອງເຈົ້າ ເຮົາຮູ້ວ່າເຈົ້າ ບໍ່ເຢັນບໍ່ຮ້ອນ. ເຮົາປາຖະໜາເຫຼືອເກີນ ຢາກໃຫ້ເຈົ້າເຢັນ ຫຼື ຮ້ອນ. ເພາະເຈົ້າພຽງແຕ່ອຸ່ນໆ ບໍ່ເຢັນບໍ່ຮ້ອນ. ດັ່ງນັ້ນ ເຮົາຈຶ່ງຈະຄາຍເຈົ້າອອກຈາກປາກຂອງເຮົາ ເພາະເຈົ້າເວົ້າວ່າ 'ຂ້ອຍຮັ່ງມີເປັນດີແລ້ວ ຂ້ອຍບໍ່ຕ້ອງການສິ່ງໃດໆອີກ' ແຕ່ເຈົ້າບໍ່ຮູ້ວ່າ ເຈົ້າເປັນຄົນທຸກໄຮ້ເຂັນໃຈ ແລະ ເປັນຄົນໜ້າສົງສານສ່ຳໃດ, ເປັນຄົນຂັດສົນ, ເປັນຄົນຕາບອດ ແລະ ເປືອຍກາຍຢູ່" (ພຣະນິມິດ 3:14-17)
ຂ່າວສານທີ່ປະກາດໃຫ້ແກ່ຄຣິສຕະຈັກເມືອງເລົາດີເຊຍ ເປັນຂ່າວສານທີ່ພິເສດສຳລັບປະຊາຊົນຂອງພຣະເຈົ້າໃນປັດຈຸບັນນີ້. ນອກຈາກນີ້ ຂ່າວສານທີ່ປະກາດໃຫ້ແກ່ຄຣິສຕະຈັກເມືອງເລົາດີເຊຍ ຍັງເປັນພາບແຫ່ງຄວາມຈິງທີ່ສະແດງໃຫ້ເຫັນເຖິງສະພາບຝ່າຍຈິດວິນຍານຂອງຄຣິສຕະຈັກທີ່ຍັງເຫຼືອຢູ່ໃນຍຸກສຸດທ້າຍ ແລະ ເປັນຄຳຕັກເຕືອນສຸດທ້າຍຂອງພຣະເຢຊູທີ່ມີຕໍ່ປະຊາຊົນຂອງພຣະອົງທີ່ຍັງເຫຼືອຢູ່ ກ່ອນປະຕູພຣະກະລຸນາຈະປິດ.
ພວກເຮົາເອີ້ນຕົນເອງວ່າ ຄຣິສຕຽນ ແລະ ເປັນຜູ້ຕິດຕາມພຣະເຢຊູ. ແຕ່ພຣະເຢຊູແນມເບິ່ງຜູ້ຕິດຕາມຂອງພຣະອົງດ້ວຍຄວາມບໍ່ພໍໃຈໃນການກະທຳຂອງພວກເຮົາ. ພຣະອົງຊົງເຫັນການກະທຳຂອງພວກເຮົາທີ່ບໍ່ຮ້ອນ ແລະ ບໍ່ເຢັນ ແຕ່ເປັນພຽງອຸ່ນໆ. ສະນັ້ນ ສະພາບຄວາມຮ້ອນ, ຄວາມອຸ່ນ ແລະ ຄວາມເຢັນໝາຍຄວາມວ່າຫຍັງ? ສະພາບຄວາມຮ້ອນໝາຍເຖິງການຮ້ອນຮົນໃນພຣະເຈົ້າ ເຊິ່ງພວກເຮົາມີຄວາມສົນໃຈໃນເລື່ອງພຣະເຈົ້າ ແລະ ວຽງກງານຂອງພຣະອົງຢ່າງເຕັມລົ້ນ ເຊິ່ງຈະສະແດງອອກໃນວຽກງານຂອງພວກເຮົາ. ສະພາບຄວາມອຸ່ນໆ ໝາຍເຖິງການຂາດຄວາມຮ້ອນຮົນ, ການບໍ່ສົນໃຈໃນຄວາມຮູ້ສຶກ, ພໍໃຈໃນສິ່ງທີ່ຕົນເອງເປັນຢູ່ ໂດຍບໍ່ໄດ້ລະນຶກເຖິງສິ່ງທີ່ຕົນເອງຄວນຈະປັບປຸງແກ້ໄຂ. ແຕ່ຄວາມເຢັນໝາຍຄວາມວ່າແນວໃດ? ມັນບໍ່ໄດ້ໝາຍຄວາມວ່າ ເຮົາຢູ່ໃນສະພາບຄວາມບາບຄືກັນກັບໂລກ ເພາະພຣະເຢຊູບໍ່ຕ້ອງການໃຫ້ພວກເຮົາເປັນທັງຮ້ອນທັງເຢັນ ຖ້າຄວາມເຢັນໝາຍເຖິງຄວາມຊົ່ວຮ້າຍຂອງໂລກ. ສະນັ້ນ ຄວາມເຢັນຕ້ອງໝາຍເຖິງສິ່ງອື່ນ. ມັນສະແດງໃຫ້ເຫັນເຖິງຄວາມຮູ້ສຶກຂອງຈິດວິນຍານທີ່ເປັນຢູ່ຍັງບໍ່ພຽງພໍ ແລະ ເມື່ອພວກເຮົາມີຄວາມຮູ້ສຶກທີ່ບໍ່ພຽງພໍທາງຈິດວິນຍານ ພຣະເຈົ້າສາມາດເຂົ້າມາ ແລະ ຊ່ວຍພວກເຮົາໄດ້ ເຊິ່ງບໍ່ຄືກັນກັບຜູ້ທີ່ເປັນພຽງອຸ່ນໆ ທີ່ຮູ້ສຶກພໍໃຈກັບສະພາບຝ່າຍຈິດວິນຍານຂອງເຂົາ.
"ສະນັ້ນ ເຮົາຈຶ່ງແນະນຳເຈົ້າໃຫ້ຊື້ຄຳທີ່ຫຼອມບໍຣິສຸດແລ້ວຈາກເຮົາ ເຊິ່ງເປັນຄຳແທ້ເພື່ອເຈົ້າຈະໄດ້ເປັນຄົນຮັ່ງມີ ແລະ ຈົ່ງຊື້ເສື້ອຜ້າຂາວນຸ່ງຫົ່ມ ເພື່ອປົກປິດຮ່າງກາຍອັນໜ້າອັບອາຍຂອງເຈົ້າ ແລະ ຈົ່ງຊື້ຢາໃສ່ຕາຂອງເຈົ້າ ເພື່ອເຈົ້າຈະໄດ້ເຫັນຮຸ່ງ" (ພຣະນິມິດ 3:18)
ພຣະເຢຊູຂໍໃຫ້ພວກເຮົາຊື້ຫຼາຍຢ່າງຈາກພຣະອົງ. ທຳອິດ ພຣະອົງຕ້ອງການໃຫ້ເຮົາຊື້ຄຳທີ່ຫຼອມໃນໄຟ. ຄຳໝາຍເຖິງຄວາມເຊື່ອ ແລະ ຄວາມຮັກ. ແລ້ວພຣະອົງຍັງແນະນຳໃຫ້ພວກເຮົາຊື້ເສື້ອຜ້າຂາວນຸ່ງຫົ່ມ. ເສື້ອຜ້າຂາວໝາຍເຖິງຄວາມຊອບທຳຂອງພຣະເຢຊູ ທີ່ຈະປະດັບຢູ່ໃນອຸປະນິໄສ. ຄວາມບໍຣິສຸດຂອງຫົວໃຈ, ຄວາມບໍຣິສຸດຂອງແຮງຈູງໃຈຈະສະແດງໃຫ້ເຫັນຄຸນລັກສະນະພິເສດຂອງທຸກຄົນຜູ້ທີ່ກຳລັງລ້າງເສື້ອຜ້າຂອງເຂົາ ແລະ ເຮັດໃຫ້ມັນຂາວໃນເລືອດຂອງລູກແກະ. ພຣະອົງຍັງບອກພວກເຮົາອີກໃຫ້ຊື້ຢາໃສ່ຕາ. ຢາໃສ່ຕາແມ່ນຄວາມເຂົ້າໃຈແທ້ຈິງຂອງຝ່າຍຈິດວິນຍານ(ພຣະວິນຍານບໍຣິສຸດ) ເຊິ່ງມາຈາກພຣະເຈົ້າເທົ່ານັ້ນ ເພາະສິ່ງທາງຝ່າຍຈິດວິນຍານຕ້ອງໄດ້ຮັບການແນມເຫັນທາງຝ່າຍຈິດວິນຍານ. {7BC 965.1}
ຂ່າວສານຂອງພຣະເຢຊູທີ່ສົ່ງໄປຍັງຄຣິສຕະຈັກເລົາດີເຊຍແມ່ນມີຄວາມສຳຄັນຫຼາຍ ແລະ ເມື່ອປະຊາຊົນຂອງພຣະເຈົ້າໄດ້ເຊື່ອຟັງຄຳຕັກເຕືອນເຫຼົ່ານັ້ນແລ້ວ ເຫດການຂອງຄຳພະຍາກອນຈະເກີດຂຶ້ນຢູ່ໃນຄຣິສຕະຈັກ ແລະ ທົ່ວໂລກ. ຂ່າວສານນີ້ຈະເຮັດໃຫ້ເກີດການຝັດຮ່ອນຢູ່ໃນຄຣິສຕະຈັກ. ຜູ້ທີ່ບໍ່ເຕັມໃຈຍອມຈຳນົນຕໍ່ພຣະເຈົ້າ ແລະ ບໍ່ເຊື່ອຟັງຕາມຄຳແນະນຳຂອງຂ່າວສານທີ່ສົ່ງໄປຍັງຄຣິສຕະຈັກເລົາດີເຊຍ ຈະຖືກຝັດຮ່ອນອອກຈາກຄຣິສຕະຈັກຂອງພວກເຂົາ. ຜູ້ທີ່ຍັງເຫຼືອຢູ່ ໄດ້ເຊື່ອຟັງຄຳແນະນຳຂອງຂ່າວສານນີ້ ແລະ ໄດ້ນຳໄປປະຕິບັດຢູ່ໃນຊີວິດປະຈຳວັນຂອງພວກເຂົາ ແລ້ວພວກເຂົາກໍຈະໄດ້ຮັບຝົນປາຍລະດູ. ດ້ວຍການຖອກເທພຣະວິນຍານບໍຣິສຸດຈາກຝົນປາຍລະດູ ພວກເຂົາພ້ອມທີ່ຈະອອກໄປ ແລະ ປະກາດຂ່າວສານຄັ້ງສຸດທ້າຍດ້ວຍສຽງຮ້ອງອັນດັງໃຫ້ແກ່ໂລກ. (ພຣະນິມິດ 18) {EW 270}
"ຝ່າຍເຮົາ ເຮົາຮັກຜູ້ໃດ ເຮົາກໍຕິຕຽນຂ້ຽນສອນຜູ້ນັ້ນ. ເຫດສະນັ້ນ ຈົ່ງມີໃຈຮ້ອນຮົນ ແລະ ກັບໃຈເສຍໃໝ່. ເບິ່ງແມ! ເຮົາຢືນເຄາະຢູ່ທີ່ປະຕູ ຖ້າຜູ້ໃດໄດ້ຍິນສຽງຂອງເຮົາ ແລະ ໄຂປະຕູ ເຮົາຈະເຂົ້າໄປຫາຜູ້ນັ້ນ ແລະ ຈະຮ່ວມຮັບປະທານອາຫານກັບຜູ້ນັ້ນ ແລະ ຜູ້ນັ້ນຈະຮ່ວມຮັບປະທານອາຫານກັບເຮົາ. ຜູ້ໃດມີໄຊຊະນະ ເຮົາຈະໃຫ້ຜູ້ນັ້ນນັ່ງກັບເຮົາເທິງບັນລັງຂອງເຮົາ ເໝືອນກັບທີ່ເຮົາມີໄຊຊະນະແລ້ວ ແລະ ໄດ້ນັ່ງກັບພຣະບິດາເຈົ້າຂອງເຮົາເທິງຣາຊະບັນລັງຂອງພຣະອົງ" (ພຣະນິມິດ 3:19-21)
ທຸກໆຄຳເຕືອນ, ການຕຳໜິ ແລະ ການຂໍຮ້ອງຈາກພຣະຄຳຂອງພຣະເຈົ້າ ຫຼື ຜ່ານທາງບັນດາຜູ້ສົ່ງຂ່າວສານຂອງພຣະອົງແມ່ນເປັນການເຄາະຢູ່ທີ່ປະຕູຂອງຫົວໃຈ; ມັນແມ່ນສຽງຂອງພຣະເຢຊູທີ່ຂໍເຂົ້າໄປ. ທຸກໆຄັ້ງທີ່ພວກເຮົາບໍ່ສົນໃຈໃນສຽງເຄາະ ຄວາມຕັ້ງໃຈຂອງພວກເຮົາທີ່ຈະເປີດໃຫ້ພຣະອົງເຂົ້າໃນໃຈຂອງພວກເຮົາກໍຈະອອ່ນແອລົງ. ຖ້າສຽງຂອງພຣະເຢຊູບໍ່ໄດ້ຮັບການເອົາໃຈໃສ່ໃນຄັ້ງທຳອິດທີ່ເຮົາໄດ້ຍິນ ການເອີ້ນຂອງພຣະອົງກໍຈະມິດງຽບໄປຍ້ອນສຽງອື່ນໆທີ່ເຂົ້າມາຢູ່ໃນຈິດໃຈຂອງພວກເຮົາເຊັ່ນວ່າ: ກິດຈະກຳ ແລະ ຄວາມວຸ່ນວາຍຂອງທຸລະກິດທາງຝ່າຍໂລກຈະດຶງດູດຄວາມສົນໃຈຂອງພວກເຮົາ ແລ້ວການວາງໃຈໃນທາງຂອງພຣະເຢຊູກໍຈະສູນຫາຍໄປ, ຫົວໃຈຈະໄດ້ຮັບການອິດທິພົນຈາກພຣະເຈົ້ານ້ອຍລົງ ແລະ ລືມວ່າມີເວລາສັ້ນໆໃນການຕຽມຈິດວິນຍານສໍາລັບສະຫວັນ. ດັ່ງຂໍ້ພຣະຄຳພີທີ່ໄດ້ກ່າວໄວ້ວ່າ: "ແຕ່ເຂົາມີຄວາມກັງວົນເຖິງຊີວິດນີ້, ການຢາກຮັ່ງຢາກມີ, ຕະຫຼອດທັງຄວາມຕ້ອງການທຸກສິ່ງທຸກຢ່າງ ໄດ້ເຂົ້າມາຫຸ້ມຮັດພຣະທຳໄວ້ ພຣະທຳຈຶ່ງບໍ່ເກີດຜົນ" {ມາຣະໂກ 4:19}. {OHC 352.3}
ປະຕູຫົວໃຈຂອງຫຼາຍຄົນມີເຄື່ອງຮົກຫຼາຍ ຈຶ່ງບໍ່ສາມາດໃຫ້ພຣະເຢຊູເຂົ້າໄປໄດ້. ເຄື່ອງຮົກໃນໃຈສຳລັບບາງຄົນອາດຈະເປັນການຜິດກັນ ຫຼື ບໍ່ເຂົ້າໃຈກັນກັບຄົນອື່ນ, ບາງຄົນອາດຈະມີອາລົມຊົ່ວຮ້າຍ, ມີຄວາມຈອງຫອງ, ມີຄວາມໂລບ ແລະ ອື່ນໆເປັນຕົ້ນ; ແລະ ບາງຄົນອາດຈະຮັກໂລກ ເຊິ່ງມັນໄດ້ກີດຂວາງປະຕູຫົວໃຈຂອງພວກເຂົາ. ທຸກສິ່ງເຫຼົ່ານີ້ຈະຕ້ອງໄດ້ເອົາອອກໄປສາກ່ອນ ພວກເຮົາຈຶ່ງຈະສາມາດເປີດປະຕູ ແລະ ຕ້ອນຮັບເອົາພຣະເຢຊູເຂົ້າມາໄດ້. {OHC 352.4}
ພຣະສັນຍາມີຄວາມສຳຄັນຫຼາຍຊ່ຳໃດ "ເຮົາຈະເຂົ້າໄປຫາຜູ້ນັ້ນ ແລະ ຈະຮ່ວມຮັບປະທານອາຫານກັບຜູ້ນັ້ນ ແລະ ຜູ້ນັ້ນຈະຮ່ວມຮັບປະທານອາຫານກັບເຮົາ." ໂອ, ຄວາມຮັກ, ຄວາມຮັກອັດສະຈັນຂອງພຣະເຈົ້າ! ຈາກຄວາມເປັນອຸ່ນໆ ແລະ ຄວາມບາບຂອງພວກເຮົາທັງໝົດ ພຣະອົງຊົງກ່າວວ່າ: "ຈົ່ງກັບມາຫາເຮົາ ແລະ ເຮົາຈະກັບໄປຫາເຈົ້າ ແລະ ຈະຮັກສາຄວາມສັດຊື່ຂອງເຈົ້າ." {OHC 352.5}
ໜ້າທີ່ຂອງພວກເຮົາຄືການເປີດປະຕູຫົວໃຈ ແລະ ເຊີນພຣະເຢຊູໃຫ້ເຂົ້າມາ. ພຣະອົງກຳລັງເຄາະເພື່ອທີ່ຈະເຂົ້າໄປ... ເຈົ້າຈະເປີດປະຕູຫົວໃຈຂອງເຈົ້າບໍ? {OHC 352.6}
ອ້າງອີງຈາກປຶ້ມ "ພຣະຄຳພີ" ພຣະນິມິດ 3:14-21; ພຣະນິມິດ ບົດທີ 18.
ອ້າງອີງຈາກປຶ້ມ “Bible Commentary Volume 7” {7BC 965.1} ແລະ ປຶ້ມ “Early Writings” {EW270} ແລະ ປຶ້ມ “Our High Calling” {OHC 352.3-6} ຂຽນໂດຍ ທ່ານ ນາງ ເອເລັນ ຈີ. ໄວທ
ການຟື້ນຟູສະໄໝໃໝ່
ການຟື້ນຟູສະໄໝໃໝ່
ການຟື້ນຟູທີ່ແທ້ຈິງແມ່ນປະກອບດ້ວຍພຣະວິນຍານບໍຣິສຸດຂອງພຣະເຈົ້າຢູ່ຕະຫຼອດ ແລະ ຂ່າວສານແມ່ນມີອຳນາດເໜືອຜູ້ທີ່ຟັງ. ພວກເຂົາຖືກເອີ້ນໃຫ້ຄົ້ນຫາຫົວໃຈທີ່ລົງເລິກ ແລະ ຖ່ອມຕົວລົງ. ປະຊາຊົນຈະສຳນຶກໄດ້ວ່າ ພວກເຂົາເປັນຄົນບາບ ແລະ ຖືກນຳພາໃຫ້ໄປສູ່ການກັບໃຈໃໝ່. ທັງຜູ້ຊາຍ ແລະ ແມ່ຍິງໄດ້ໃຊ້ເວລາກັບພຣະເຈົ້າດ້ວຍການອະທິຖານເພື່ອຄວາມລອດຂອງພວກເຂົາ. ພວກເຂົາເຊື່ອ, ພວກເຂົາຮັບບັບຕິສະມາ ແລະ ພວກເຂົາໄດ້ກາຍມາເປັນຄົນໃໝ່ໃນພຣະເຢຊູ. ພວກເຂົາໄດ້ປະຖິ້ມຄວາມປາຖະໜາຂອງພວກເຂົາ; ແລະ ຍ້ອນຄວາມເຊື່ອ ພວກເຂົາຈຶ່ງໄດ້ຕິດຕາມພຣະເຢຊູເພື່ອທີ່ຈະສະທ້ອນພຣະລັກສະນະຂອງພຣະອົງ ແລະ ຊຳລະລ້າງພວກເຂົາເອງໃຫ້ບໍຣິສຸດເໝືອນດັ່ງທີ່ພຣະອົງຊົງບໍຣິສຸດ. ເລື່ອງພຣະເຈົ້າທີ່ພວກເຂົາເຄີຍບໍ່ມັກ ປັດຈຸບັນພວກເຂົາມັກ ແລະ ຄວາມຜິດບາບທີ່ພວກເຂົາເຄີຍມັກ ປັດຈຸບັນພວກເຂົາກຽດຊັງ. ຄົນທີ່ຢູ່ອ້ອມຂ້າງຂອງພວກເຂົາໄດ້ເຫັນການປ່ຽນແປງໃນຊີວິດຂອງພວກເຂົາ ແລະ ເຂົາເຈົ້າກໍປະຫຼາດໃຈ. ນີ້ແມ່ນຜົນຂອງພຣະວິນຍານທີ່ແທ້ຈິງຂອງພຣະເຈົ້າ.
ແຕ່ປັດຈຸບັນນີ້ ມີການຟື້ນຟູຫຼາຍຢ່າງທີ່ບໍ່ມີພຣະວິນຍານຂອງພຣະເຈົ້າ. ການຟື້ນຟູຈອມປອມເຫຼົ່ານີ້ສາມາດສ້າງຄວາມສົນໃຈໄດ້ຢ່າງຫຼວງຫຼາຍ ແລະ ປະຊາຊົນຫຼາຍຄົນອາດຍອມຮັບການກັບໃຈໃໝ່ ແລະ ເຂົ້າຮ່ວມໃນຄຣິສຕະຈັກເປັນຈຳນວນຫຼາຍ. ແຕ່ນີ້ບໍ່ແມ່ນສັນຍານວ່າມັນເປັນການຟື້ນຟູທີ່ແທ້ຈິງ. ການຟື້ນຟູທີ່ຈອມປອມເຫຼົ່ານີ້ມັກຈະດຶງດູດຄວາມສົນໃຈໄປຍັງການຈິນຕະນາການຄວາມຮູ້ສຶກຂອງອາລົມ ແລະ ຄວາມເພິ່ງພໍໃຈກັບການຮັກສິ່ງທີ່ແປກໃໝ່ ແລະ ໜ້າຕື່ນເຕັ້ນ. ແຕ່ສ່ວນໜ້ອຍທີ່ຈະສອນເຖິງຄວາມຈິງໃນພຣະຄຳພີ, ພຣະບັນຍັດຂອງພຣະເຈົ້າຈຶ່ງຖືກທຳລາຍ ແລະ ບໍ່ມີຄວາມສົນໃຈໃນການຮຽນຮູ້ພຣະປະສົງຂອງພຣະເຈົ້າ. ບັນດາຜູ້ທີ່ຟື້ນຟູຈອມປອມເຫຼົ່ານີ້ຈະບໍ່ປະຖິ້ມຄວາມພາກພູມໃຈຂອງຕົນເອງ ແລະ ຈະບໍ່ປະຖິ້ມຄວາມຮັກຂອງພວກເຂົາທີ່ມີຕໍ່ສິ່ງຂອງໃນໂລກນີ້. ພວກເຂົາຈະບໍ່ເຕັມໃຈໃນການສຳນຶກຜິດບາບ, ຈະບໍ່ປະຖິ້ມຄວາມບາບ ແລະ ຈະບໍ່ປະຕິເສດຕົນເອງເພື່ອທີ່ຈະຕິດຕາມພຣະເຢຊູ.
ອີກບໍ່ດົນ ພຣະເຈົ້າຈະນຳເອົາການຟື້ນຟູຈິດວິນຍານຂອງສາສະໜາແບບດັ່ງເດີມມາ ເຊິ່ງບໍ່ເຄີຍເຫັນມາກ່ອນນັບຕັ້ງແຕ່ສະໄໝຂອງອັກຄະສາວົກ. ດັ່ງນັ້ນ ຫຼາຍຄົນຈະໄດ້ຮັບການປ່ຽນແປງ ແລະ ເຂົ້າຮ່ວມກັບປະຊາຊົນຂອງພຣະເຈົ້າ. ແຕ່ຊາຕານຕ້ອງການທີ່ຈະຂັດຂວາງວຽກງານຂອງພຣະເຈົ້າ ແລະ ມັນຈະນຳການຟື້ນຟູຈອມປອມເຂົ້າມາກ່ອນ ກ່ອນການຟື້ນຟູແທ້ຈິງ. ປະຊາຊົນຫຼວງຫຼາຍຈະເຂົ້າຮ່ວມການຟື້ນຟູຈອມປອມຂອງຊາຕານ ແລະ ພວກເຂົາຈະຄິດວ່າ ພຣະເຈົ້າກຳລັງຢູ່ກັບພວກເຂົາ. ແຕ່ນີ້ຈະເປັນວຽກງານຂອງຊາຕານ ທີ່ມັນຈະໃຊ້ລັກສະນະສາສະໜາແບບນີ້ເພື່ອພະຍາຍາມຊັກຊວນຄົນທົ່ວທັງໂລກ. {GC 464.1}
ອ້າງອີງຈາກປຶ້ມ "ປາຍທາງແຫ່ງຄວາມຫວັງ" (ສະບັບພາສາໄທ) {ວັກ 464.1} ຂຽນໂດຍ ທ່ານ ນາງ ເອເລັນ ຈີ. ໄວທ
ຝົນປາຍລະດູ
ຝົນປາຍລະດູ
ຝົນປາຍລະດູທີ່ຈະເກີດຂຶ້ນອີກບໍ່ດົນ ຈະມີລັກສະນະຄ້າຍຄືກັນກັບຝົນຕົ້ນລະດູທີ່ເຄີຍເກີດຂຶ້ນໃນວັນເພັນເຕຄໍສະເຕ. ດັ່ງ "ຝົນຕົ້ນລະດູ" ທີ່ຖອກເທພຣະວິນຍານບໍຣິສຸດໃນການເລີ່ມຕົ້ນປະກາດຂ່າວປະເສີດ ເພື່ອເຮັດໃຫ້ເມັດພືດທີ່ມີຄ່ານັ້ນງອກອອກມາ ສະນັ້ນ "ຝົນປາຍລະດູ" ຈະຊົງໂຜດປະທານມາໃຫ້ໃນຊ່ວງທ້າຍ ເພື່ອເກັບກ່ຽວຜົນທີ່ກຳລັງສຸກ. "ຈົ່ງໃຫ້ພວກເຮົາພະຍາຍາມຮູ້ຈັກອົງພຣະຜູ້ເປັນເຈົ້າ. ພຣະອົງຈະມາຫາພວກເຮົາຢ່າງແນ່ນອນຕອນຮຸ່ງເຊົ້າ ແລະ ແນ່ແທ້ ດັ່ງຝົນລະດູໃບໄມ້ປົ່ງທີ່ຕົກລົງໃສ່ຜືນແຜ່ນດິນໂລກ" (ໂຮເສອາ 6:3) "ຊາວພູເຂົາຊີໂອນເອີຍ, ຈົ່ງຊົມຊື່ນຍິນດີເຖີດ, ຈົ່ງຊົມຊື່ນຍິນດີສຳລັບສິ່ງທີ່ພຣະອົງໄດ້ກະທຳນັ້ນ ສຳລັບພວກເຈົ້າ ພຣະອົງເທຝົນລົງຕາມທີ່ພວກເຈົ້າຕ້ອງການ ໃຫ້ຝົນຕົ້ນລະດູ ແລະ ປາຍລະດູຄືແຕ່ກ່ອນ" (ໂຢເອນ 2:23) "ພຣະເຈົ້າຊົງກ່າວວ່າ ໃນຄາວສຸດທ້າຍນັ້ນ ເຮົາຈະຖອກເທພຣະວິນຍານຂອງເຮົາລົງໃສ່ມະນຸດທັງປວງ. ລູກຊາຍ ແລະ ລູກຍິງຂອງພວກເຈົ້າຈະທຳນວາຍ ຊາຍໜຸ່ມຂອງພວກເຈົ້າຈະເຫັນນິມິດ ແລະ ພວກຊາຍເຖົ້າຂອງພວກເຈົ້າຈະຝັນເຫັນ." "ແລ້ວກໍຈະເປັນດັ່ງນີ້ ຄືບຸກຄົນໃດທີ່ຮ້ອງອອກພຣະນາມຂອງອົງພຣະຜູ້ເປັນເຈົ້າ ກໍຈະລອດພົ້ນ" (ກິດຈະການ 2:17, 21) {GC 611.2}
ພາລະກິດອັນຍິ່ງໃຫຍ່ຂອງການປະກາດຂ່າວປະເສີດຈະບໍ່ປິດລົງດ້ວຍການສຳແດງອຳນາດຂອງພຣະເຈົ້າທີ່ໜ້ອຍກວ່າໃນສະໄໝຂອງການເລີ່ມຕົ້ນພາລະກິດການປະກາດໃນວັນເພັນເຕຄໍສະເຕ. ຄຳພະຍາກອນເລື່ອງການຖອກເທຂອງຝົນຕົ້ນລະດູໄດ້ສຳເລັດເມື່ອເລີ່ມປະກາດຂ່າວປະເສີດ ແລ້ວຄວາມສຳເລັດນີ້ ກໍຈະເປັນຈິງອີກຄັ້ງເມື່ອຝົນປາຍລະດູໄດ້ຖອກເທລົງມາໃນຊ່ວງສຸດທ້າຍຂອງວຽກງານການປະກາດຂ່າວປະເສີດ. ນີ້ແມ່ນ "ເວລາແຫ່ງຄວາມພັກຜ່ອນຢ່ອນໃຈ" ທີ່ອັກຄະສາວົກເປໂຕຫວັງຄອຍຖ້າເມື່ອທ່ານກ່າວວ່າ "ດັ່ງນັ້ນ ຈົ່ງຖິ້ມໃຈເກົ່າເອົາໃຈໃໝ່ ໂດຍຫັນຄືນມາຫາພຣະເຈົ້າ ເພື່ອພຣະອົງຈະອະໄພບາບກຳໃຫ້ພວກທ່ານ ເພື່ອເວລາແຫ່ງຄວາມພັກຜ່ອນຢ່ອນໃຈຈະໄດ້ມາຈາກພຣະພັກຂອງອົງພຣະຜູ້ເປັນເຈົ້າ ເພື່ອພຣະອົງຈະໄດ້ຊົງໃຊ້ພຣະຄຣິດ ເຊິ່ງຊົງກຳນົດໄວ້ແລ້ວນັ້ນ ໃຫ້ມາເພື່ອທ່ານທັງຫຼາຍ ຄືພຣະເຢຊູເຈົ້າ." (ກິດຈະການ 3:19, 20) {GC 611.3}
ເມື່ອບັນດາຜູ້ຮັບໃຊ້ຂອງພຣະເຈົ້າເຕັມໄປດ້ວຍພຣະວິນຍານບໍຣິສຸດ ພວກເຂົາຈະຮີບຮ້ອນໄປປະກາດຂ່າວປະເສີດຂອງສະຫວັນ ຈາກສະຖານທີ່ບ່ອນໜຶ່ງ ໄປຍັງສະຖານທີ່ບ່ອນອື່ນ. ຂ່າວຄຳເຕືອນນີ້ຈະຖືກປະກາດອອກໄປທົ່ວໂລກດ້ວຍສຽງຂອງຄົນເປັນຈຳນວນຫຼວງຫຼາຍ, ຈະມີການອັດສະຈັນເກີດຂຶ້ນ, ຄົນເຈັບປ່ວຍຈະຫາຍຈາກໂຣກພະຍາດ, ໝາຍສຳຄັນ ແລະ ການອັດສະຈັນຈະຕິດຕາມຜູ້ເຊື່ອທັງຫຼາຍ. ແຕ່ຊາຕານຈະເຮັດການອັດສະຈັນເຊັ່ນກັນແຕ່ເປັນການອັດສະຈັນທີ່ຫຼອກລວງ ຈົນເຮັດໃຫ້ໄຟຕົກຈາກຟ້າລົງສູ່ແຜ່ນດິນໂລກຕໍ່ໜ້າຕໍ່ຕາມະນຸດ. (ພຣະນິມິດ 13:13) ສະນັ້ນ ຜູ້ທີ່ອາໄສຢູ່ເທິງແຜ່ນດິນໂລກຈະຕ້ອງເລືອກຈຸດຢືນຂອງພວກເຂົາລະຫວ່າງຈະຢູ່ຝ່າຍພຣະເຈົ້າ ຫຼື ຈະຢູ່ຝ່າຍຊາຕານ. {GC 612.1}
ກ່ອນທີ່ຝົນປາຍລະດູຈະຕົກ ຄວາມຈິງເລື່ອງພຣະເຈົ້າຈະແຜ່ຂະຫຍາຍໄປຍັງຜູ້ຄົນເປັນຈຳນວນຫຼວງຫຼາຍໂດຍການແຈກຍາຍປື້ມຕ່າງໆ ແລະ ປະຊາຊົນຈະໄດ້ຮຽນຮູ້ກ່ຽວກັບຄວາມຈິງ. ເມື່ອພຣະວິນຍານບໍຣິສຸດຂອງພຣະເຈົ້າສະເດັດລົງມາ ພຣະອົງຈະສົ່ງອິດທິພົນຕໍ່ຈິດໃຈຂອງປະຊາຊົນທີ່ເຄີຍໄດ້ຍິນ ແລະ ໄດ້ອ່ານເລື່ອງຄວາມຈິງ. ແລ້ວພວກເຂົາຈະຕັດສິນໃຈຕິດຕາມພຣະເຢຊູ, ພວກເຂົາຈະບໍ່ຢ້ານຄຳເວົ້າຂອງໝູ່ເພື່ອນ, ຍາດຕິພີ່ນ້ອງ ແລະ ເພື່ອນບ້ານຂອງພວກເຂົາ.
ຝົນປາຍລະດູບໍ່ພຽງແຕ່ຊ່ວຍພວກເຂົາປະກາດຂ່າວປະເສີດຄັ້ງສຸດທ້າຍເທົ່ານັ້ນ ແຕ່ຍັງຈະຕຽມຕົວພວກເຂົາເພື່ອປະເຊີນໜ້າກັບເວລາຂອງບັນຫາໃນລະຫວ່າງການບັງຄັບໃຊ້ກົດໝາຍວັນອາທິດ ແລະ ຕຽມຕົວພວກເຂົາເພື່ອສາມາດດຳລົງຊີວິດໃຫ້ບໍຣິສຸດຫຼັງຈາກທີ່ພຣະເຢຊູສິ້ນສຸດຈາກການເປັນຜູ້ໄກ່ເກ່ຍຢູ່ໃນສະຖານສັກສິດຂອງການລົບລ້າງບາບທີ່ໄດ້ກັບໃຈໃໝ່ແລ້ວ.
ແຕ່ພວກເຮົາຈະໄດ້ຮັບຝົນປາຍລະດູແນວໃດ? ເພື່ອທີ່ຈະສາມາດຕ້ອນຮັບຝົນປາຍລະດູ ຫຼື ຮັບພຣະວິນຍານບໍຣິສຸດຂອງພຣະເຈົ້າໄດ້ ພວກເຮົາຈະຕ້ອງຕຽມຫົວໃຈຂອງພວກເຮົາໃຫ້ພ້ອມໂດຍການເອົາຊະນະເໜືອທຸກໆສິ່ງທີ່ມັນຢູ່ອ້ອມຮອບຕົວຂອງພວກເຮົາເຊັ່ນ: ຄວາມອວດອົ່ງ, ຄວາມເຫັນແກ່ຕົວ, ການຮັກສິ່ງຂອງໃນໂລກນີ້ ແລະ ທຸກໆຄຳເວົ້າ ແລະ ການກະທຳທີ່ຜິດ. ສະນັ້ນ ພວກເຮົາຄວນເຂົ້າໃກ້ຊິດອົງພຣະຜູ້ເປັນເຈົ້າໃຫ້ຫຼາຍຂຶ້ນ ແລະ ຕັ້ງໃຈສະແຫວງຫາການຕຽມຕົວທີ່ສຳຄັນນັ້ນ ເພື່ອທີ່ພວກເຮົາຈະສາມາດຢືນຕໍ່ສູ້ໄດ້ໃນວັນຂອງອົງພຣະຜູ້ເປັນເຈົ້າ. ຂໍໃຫ້ທຸກຄົນຈື່ໄວ້ວ່າ ພຣະເຈົ້າຊົງເປັນຜູ້ບໍຣິສຸດ ແລະ ບໍ່ມີຜູ້ໃດຈະສາມາດອາໄສຢູ່ຕໍ່ໜ້າພຣະອົງໄດ້ ນອກສະຈາກຜູ້ບໍຣິສຸດເທົ່ານັ້ນ.
ອ້າງອີງຈາກປຶ້ມ "ພຣະຄຳພີ" ກິດຈະການ 2:17, 21; 3:19, 20.
ອ້າງອີງຈາກປຶ້ມ "ປາຍທາງແຫ່ງຄວາມຫວັງ" (ສະບັບພາສາໄທ) {ວັກ 611.2,3; 612.1} ຂຽນໂດຍ ທ່ານ ນາງ ເອເລັນ ຈີ. ໄວທ
ການຝັດຮ່ອນຄຣິສຕະຈັກ
ການຝັດຮ່ອນຄຣິສຕະຈັກ
"ເຮົາຈະອອກຄຳສັ່ງ ແລະ ຈະຝັດຮ່ອນພວກອິດສະຣາເອນ ດັ່ງຝັດຮ່ອນເຂົ້າຢູ່ໃນກະດົ້ງ. ເຮົາຈະຝັດຮ່ອນພວກເຂົາໃນທ່າມກາງຊົນຊາດທັງຫຼາຍ ເພື່ອເອົາຜູ້ທີ່ບໍ່ມີຄຸນຄ່າທຸກຄົນອອກໄປ" (ອາໂມດ 9:9)
"ພຣະວິນຍານກ່າວໄວ້ຢ່າງຈະແຈ້ງວ່າ ໃນຍຸກສຸດທ້າຍຈະມີບາງຄົນປະຖິ້ມຄວາມເຊື່ອ ພວກເຂົາຈະເຊື່ອຟັງບັນດາດວງວິນຍານຜີຊົ່ວຮ້າຍທີ່ຫຼອກລວງມະນຸດ ແລະ ຄຳສັ່ງສອນຂອງພວກຜີມານຮ້າຍ" (1 ຕີໂມທຽວ 4:1)
"ເຫດສະນັ້ນ ຄົນທີ່ຄິດວ່າ ຕົນຕັ້ງໝັ້ນຄົງດີແລ້ວ ຈົ່ງລະວັງຕົວໃຫ້ດີ ຢ້ານວ່າຈະລົ້ມລົງ" (1 ໂກຣິນໂທ 10:12)
ເວລາຂອງການຝັດຮ່ອນແມ່ນເວລາຂອງຜູ້ທີ່ເອີ້ນຕົນວ່າ ເປັນຄຣິສຕຽນ, ມີຄວາມເຊື່ອໃນພຣະເຈົ້າ, ໃນຄວາມຈິງ ແລະ ວຽກງານຂອງພຣະອົງຈະຖືກທົດລອງ. ຢູ່ໃນພຣະຄຳພີ ສິ່ງນີ້ໄດ້ຖືກປຽບທຽບກັບການຫຼອມໂລຫະໃຫ້ບໍຣິສຸດ ຫຼື ການຝັດຮ່ອນເມັດເຂົ້າ ເພື່ອທີ່ຈະເອົາສ່ວນທີ່ເປັນຂີ້ແກບອອກ. ຄຣິສຕະຈັກຂອງພຣະເຈົ້າຕ້ອງໄດ້ຮັບການຊຳລະໃຫ້ບໍຣິສຸດກ່ອນທີ່ພຣະອົງຈະສະເດັດກັບມາ. ສະນັ້ນ ຈະມີການຝັດຮ່ອນເກີດຂຶ້ນໃນຄຣິສຕະຈັກ ເພື່ອແຍກຄົນອະທຳອອກຈາກຄົນຊອບທຳ ຄືກັບການແຍກເມັດເຂົ້າດີອອກຈາກເມັດເຂົ້າລີບ(ຂີ້ແກບ). ຈາກນັ້ນ ລົມຈະພັດເອົາສິ່ງທັງໝົດໄປ ໂດຍບໍ່ມີຮ່ອງຮອຍໃຫ້ເຫັນອີກເລີຍ. ດ້ວຍວິທີການຝັດຮ່ອນຄຣິສຕະຈັກຂອງພຣະເຈົ້າ ພຣະອົງຈະຊົງມີປະຊາກອນທີ່ບໍຣິສຸດ ແລະ ສັດຊື່ ເພື່ອຕຽມຕົວພ້ອມຕ້ອນຮັບການສະເດັດກັບມາຄັ້ງທີສອງຂອງພຣະອົງ.
ທ່ານນາງເອເລັນ ຈີ. ໄວທ ເປັນຜູ້ປະກາດພຣະຄຳຂອງພຣະເຈົ້າໄດ້ຮັບນິມິດກ່ຽວກັບການຝັດຮ່ອນປະຊາຊົນຂອງພຣະອົງ. ທ່ານນາງເອເລັນ ຈີ. ໄວທ ໄດ້ຖາມສາເຫດຂອງການຝັດຮ່ອນນັ້ນ ແລະ ເພິ່ນໄດ້ຮັບການເປີດເຜີຍໃຫ້ເຫັນວ່າ: ຈະເກີດຈາກຄຳພະຍານຕົງໆທີ່ອອກມາຈາກຄຳແນະນຳຂອງພຣະເຈົ້າ ທີ່ໃຫ້ກັບປະຊາຊົນເລົາດີເຊຍ. (ພຣະນິມິດ 3:14-22) ເລື່ອງນີ້ຈະເກີດຜົນໃນຫົວໃຈຂອງຜູ້ຮັບໃຊ້ ແລະ ຈະນຳພວກເຂົາກັບໃຈຢ່າງແທ້ຈິງ ແລະ ເທຄວາມຈິງທີ່ຕົງໆອອກມາ. ຄຳພະຍານນີ້ຈະເຮັດໃຫ້ເກີດມີການສຳນຶກໃນຄວາມຜິດບາບ ແລະ ກັບໃຈຢ່າງແທ້ຈິງ. ຜູ້ທີ່ຮັບຄຳພະຍານນີ້ຈະຖືຮັກສາໄວ້ ແລະ ຈະໄດ້ຮັບການຊຳລະຈິດໃຈກັບຊີວິດໃຫ້ບໍຣິສຸດ. ໃນທາງກົງກັນຂ້າມ ຄົນທີ່ຍອມຮັບຄຳພະຍານຕົງໆນີ້ບໍ່ໄດ້ ພວກເຂົາກໍຈະຕໍ່ຕ້ານຄຳພະຍານນີ້ ແລະ ຈະເຮັດໃຫ້ເກີດການຝັດຮ່ອນຂຶ້ນໃນທ່າມກາງປະຊາຊົນຂອງພຣະເຈົ້າ.
ທ່ານນາງເອເລັນ ຈີ. ໄວທ ໄດ້ເຫັນປະຊາກອນຂອງພຣະເຈົ້າຖືກຝັດຮ່ອນຢ່າງໜັກ. ບາງຄົນອອກຈາກຄຣິສຕະຈັກ ຍ້ອນເຊື່ອຫຼັກຄຳສອນທີ່ຜິດ, ບາງຄົນອອກໄປ ຍ້ອນມີຄວາມຮູ້ເລື່ອງພຣະເຈົ້າໜ້ອຍ ແລະ ຊາຕານຫຼອກລວງໄດ້ງ່າຍ, ບາງຄົນອອກໄປ ຍ້ອນບໍ່ເຊື່ອຜູ້ປະກາດພຣະຄຳຂອງພຣະເຈົ້າ, ບາງຄົນອອກໄປ ຍ້ອນທົນຕໍ່ຄຳວິຈານບໍ່ໄດ້, ບາງຄົນອອກໄປ ຍ້ອນເຫັນຜູ້ນຳເຮັດບໍ່ຖືກ, ຄົນອື່ນໆຈະເມີນເສີຍ ແລະ ບໍ່ພັກດັນຕໍ່ສູ້ຄວາມມືດທີ່ຢູ່ອ້ອມຮອບຕົວຂອງເຂົາ.
ໃນທ່າມການປະຊາຊົນຂອງພຣະເຈົ້າ ບັນດາຜູ້ທີ່ຈະບໍ່ຖືກຝັດຮ່ອນອອກຈາກຄຣິສຕະຈັກແມ່ນຜູ້ທີ່ຈະພິຈາລະນາຕົວຂອງພວກເຂົາເອງ ແລະ ພວກເຂົາຈະເປັນທຸກໃນຈິດໃຈ ແລະ ຮ້ອງຂໍຕໍ່ພຣະເຈົ້າຄືກັນກັບດາວິດ ພວກເຂົາຈະອະທິຖານວ່າ: "ຂ້າແດ່ພຣະເຈົ້າ ຂໍຊົງໂຜດກວດກາເບິ່ງຂ້ານ້ອຍ ແລະ ຮູ້ຈິດໃຈຂອງຂ້ານ້ອຍ, ຂໍຊົງໂຜດທົດສອບເບິ່ງຂ້ານ້ອຍ ແລະ ຄົ້ນເບິ່ງຄວາມນຶກຄິດຂອງຂ້ານ້ອຍໄດ້" (ເພງສັນລະເສີນ 139:23) ໃນທາງກົງກັນຂ້າມ ຄົນອື່ນໆທີ່ບໍ່ໄດ້ລະມັດລະວັງຕົວ ແລະ ບໍ່ໄດ້ສົນໃຈ ພວກເຂົາຈະບໍ່ໄດ້ພະຍາຍາມທີ່ຈະຕໍ່ຕ້ານຄວາມມືດຂອງບັນດາພັກພວກຂອງຊາຕານທີ່ຢູ່ອ້ອມຮອບຕົວຂອງພວກເຂົາ. ໃນທີ່ສຸດ ພວກເຂົາຈະອອກໄປຈາກຄຣິສຕະຈັກ ແລະ ສູນຫາຍໄປ.
ອ້າງອີງຈາກປຶ້ມ "ປາຍທາງແຫ່ງຄວາມຫວັງ" (ສະບັບພາສາໄທ) {ວັກ 611.2,3; 612.1} ຂຽນໂດຍ ທ່ານ ນາງ ເອເລັນ ຈີ. ໄວທ
ເກີດຫຍັງຂຶ້ນ ຫຼັງຈາກເສຍຊີວິດແລ້ວ?
ເກີດຫຍັງຂຶ້ນ ຫຼັງຈາກເສຍຊີວິດແລ້ວ?
ຊາຕານໄດ້ນຳພາຄົນເປັນຈຳນວນຫຼວງຫຼາຍເຊື່ອໃນຫຼັກຄຳສອນຜິດທີ່ວ່າ ເມື່ອຍາດຕິພີ່ນ້ອງທີ່ຮັກຂອງພວກເຂົາເສຍຊີວິດໄປແລ້ວ ຮ່າງກາຍຂອງພວກເຂົາຕາຍ ແຕ່ວິນຍານຂອງພວກເຂົາຍັງມີຊີວິດຢູ່. ແຕ່ພຣະຄໍາພີໄດ້ສອນວ່າ "ຜູ້ທີ່ຕາຍໄປແລ້ວກໍບໍ່ຮູ້ຫຍັງເລີຍ" (ປັນຍາຈານ 9:5) ຊາຕານ ແລະ ພັກພວກຂອງມັນມັກຈະປາກົດຕົວຢູ່ຕໍ່ໜ້າມະນຸດໃນຮູບຮ່າງຍາດຕິພີ່ນ້ອງຂອງພວກເຂົາ ສະນັ້ນ ຈຶ່ງປົກປິດຕົວຕົນຂອງພວກມັນ. ຄົນເປັນຈຳນວນຫຼວງຫຼາຍຖືກນຳໄປສູ່ຫຼັກຄວາມເຊື່ອໃນກົນອຸບາຍນີ້ ແລະ ເຊື່ອຢ່າງແທ້ຈິງວ່າ ວິນຍານທີ່ປາກົດແກ່ພວກເຂົານັ້ນແມ່ນວິນຍານຂອງຄົນທີ່ຕາຍໄປແລ້ວ. ແລະ ເມື່ອວິນຍານເຫຼົ່ານັ້ນໄດ້ປາກົດໃນຮູບແບບຂອງຍາດຕິພີ່ນ້ອງທີ່ຕາຍໄປແລ້ວ ຄົນເປັນຈຳນວນຫຼວງຫຼາຍກໍເຊື່ອຄຳແນະນຳຂອງຍາດຕິພີ່ນ້ອງຂອງພວກເຂົາທີ່ຕາຍໄປແລ້ວນັ້ນໄດ້ຢ່າງງ່າຍດາຍ ໂດຍບໍ່ໄດ້ລະນຶກເຖິງວ່າພວກເຂົາກຳລັງຖືກຫຼອກລວງຢູ່.
ການປອມແປງນັ້ນເຮັດໄດ້ຢ່າງແນບນຽນ; ທັງໜ້າຕາ, ຄຳເວົ້າ, ສຽງທີ່ລຶ້ງເຄີຍຖືກຈຳລອງມາຢ່າງໜ້າອັດສະຈັນ. ຄົນເປັນຈຳນວນຫຼວງຫຼາຍຮູ້ສຶກສະບາຍໃຈ ແລະ ໝັ້ນໃຈວ່າ ຄົນທີ່ພວກເຂົາຮັກມີຄວາມສຸກໃນສະຫວັນ ແລະ ໂດຍປາສະຈາກຄວາມລະແວງເຖິງໄພອັນຕະລາຍ ພວກເຂົາໄດ້ປ່ອຍໃຫ້ຫູຟັງ "ບັນດາດວງວິນຍານຜີຊົ່ວຮ້າຍທີ່ຫຼອກລວງມະນຸດ ແລະ ຄຳສັ່ງສອນຂອງພວກຜີມານຮ້າຍ" (1 ຕີໂມທຽວ 4:1) {GC 552.1}
ບາງຄັ້ງວິນຍານເຫຼົ່ານີ້ໄດ້ຄາດເດົາເຫດການທີ່ຈະເກີດຂຶ້ນໃນອະນາຄົດໄດ້ ແລະ ເມື່ອມັນເກີດຂຶ້ນຕາມການຄາດເດົາ ຄວາມເຊື່ອຂອງປະຊາຊົນທີ່ມີໃນວິນຍານຊົ່ວຮ້າຍເຊິ່ງປອມຕົວເປັນວິນຍານຂອງຍາດຕິພີ່ນ້ອງຂອງພວກເຂົານັ້ນກໍຈະເພີ່ມຂຶ້ນ. ແຕ່ພຣະເຈົ້າເຕືອນເຮົາວ່າ ເມື່ອເວລາຂອງຍຸກສຸດທ້າຍໃກ້ຈະສິ້ນສຸດ ພວກວິນຍານທີ່ຊົ່ວຮ້າຍເຫຼົ່ານັ້ນຈະປາກົດຕົວເພີ່ມຂຶ້ນໃນຮູບຮ່າງຂອງຍາດຕິພີ່ນ້ອງທີ່ຕາຍໄປແລ້ວ, ໃນຮູບຮ່າງຂອງພວກອັກຄະສາວົກ ແລະ ໃນຮູບຮ່າງຂອງຄົນຊອບທຳອື່ນໆ ແລະ ຈະເວົ້າສິ່ງທີ່ກົງກັນຂ້າມໃນພຣະຄຳພີ. ບັນດາວິນຍານຫຼອກລວງເຫຼົ່ານີ້ທີ່ປອມຕົວເປັນພວກອັກຄະສາວົກຖືກນຳມາໃຊ້ ເພື່ອຂັດຄ້ານສິ່ງທີ່ພວກເຂົາຂຽນພາຍໃຕ້ການຊົງດົນໃຈຂອງພຣະວິນຍານບໍຣິສຸດໃນສະໄໝທີ່ພວກເຂົາຍັງມີຊີວິດຢູ່ໃນໂລກ. ບັນດາວິນຍານຫຼອກລວງເຫຼົ່ານີ້ທີ່ປອມຕົວເປັນພວກອັກຄະສາວົກຈະປະຕິເສດພຣະຄຳພີທີ່ມາຈາກພຣະເຈົ້າ ແລະ ດ້ວຍເຫດນີ້ ຈຶ່ງທຳລາຍພື້ນຖານແຫ່ງຄວາມຫວັງຂອງຄຣິສຕຽນ ແລະ ດັບແສງສະຫວ່າງທີ່ສ່ອງທາງໄປສູ່ສະຫວັນ. {GC 557.1}
ຄົນເຫຼົ່ານັ້ນພາດໂອກາດທີ່ຈະສັງເກດເຫັນຄຳພະຍານໃນພຣະຄຳພີທີ່ກ່າວກ່ຽວກັບເລື່ອງການອັດສະຈັນທີ່ຊາຕານ ແລະ ຕົວແທນຂອງມັນໄດ້ເຮັດ. ຍ້ອນການຊ່ວຍເຫຼືອຂອງຊາຕານ ນັກມາຍາກົນຂອງກະສັດເອຢິບຈຶ່ງສາມາດຮຽນແບບການອັດສະຈັນຂອງພຣະເຈົ້າໄດ້. ເປົາໂລໄດ້ເວົ້າວ່າ ກ່ອນການສະເດັດມາຄັ້ງທີສອງຂອງພຣະເຢຊູ ຈະມີເຫດການທີ່ຄ້າຍຄືກັນ ເຊິ່ງສະແດງໃຫ້ເຫັນເຖິງອຳນາດຂອງຊາຕານ. ກ່ອນການສະເດັດກັບມາຂອງອົງພຣະຜູ້ເປັນເຈົ້າຈະມີ "ການດົນບັນດານຂອງຊາຕານ ພ້ອມດ້ວຍຣິດອຳນາດທຸກຢ່າງ ແລະ ດ້ວຍໝາຍສຳຄັນກັບການອັດສະຈັນທີ່ຫຼອກລວງ ແລະ ອຸບາຍອັນຊົ່ວຮ້າຍທຸກຢ່າງ" (2 ເທສະໂລນິກ 3:9,10) ແລະອັກຄະສາວົກໂຢຮັນບັນລະຍາຍເຖິງອຳນາດການຈະເຮັດສິ່ງອັດສະຈັນທີ່ຈະສະແດງອອກໃນຍຸກສຸດທ້າຍວ່າ "ມັນໄດ້ສຳແດງໝາຍສຳຄັນອັນຍິ່ງໃຫຍ່ ຈົນເຮັດໃຫ້ໄຟຕົກຈາກຟ້າ ລົງສູ່ແຜ່ນດິນໂລກຕໍ່ໜ້າຕໍ່ຕາມະນຸດ. ມັນຫຼອກລວງຄົນທັງຫຼາຍທີ່ຢູ່ໃນໂລກດ້ວຍໝາຍສຳຄັນ ທີ່ຊົງຍອມໃຫ້ມັນເຮັດ" (ພຣະນິມິດ 13:13,14) ມະນຸດຈະຖືກຫຼອກລວງດ້ວຍການອັດສະຈັນຕ່າງໆ ທີ່ບັນດາຕົວແທນຂອງຊາຕານມີອຳນາດເຮັດ ບໍ່ແມ່ນຍ້ອນສິ່ງທີ່ພວກເຂົາທຳທ່າເຮັດ. {GC 553.2}
ນອກຈາກນີ້ ພຣະເຈົ້າຍັງຊົງຫ້າມບໍ່ໃຫ້ມີການສື່ສານກັບຄົນທີ່ຕາຍໄປແລ້ວ. ໃນສະໄໝຂອງຊາວເຮັບເຣີນັ້ນໄດ້ມີຄົນທີ່ອ້າງວ່າ ພວກເຂົາສາມາດສື່ສານກັບຄົນຕາຍໄດ້ ເຊິ່ງຄືກັນກັບໃນປັດຈຸບັນນີ້. ແຕ່ "ວິນຍານທີ່ລຶ້ງເຄີຍ" ເໝືອນກັບພວກທີ່ມາຢ້ຽມຢາມຈາກໂລກອື່ນໆໄດ້ຖືກເອີ້ນຂຶ້ນມາ ເຊິ່ງພຣະຄຳພີໄດ້ປະກາດວ່າ "ວິນຍານເຫຼົ່ານັ້ນເປັນຜີມານຮ້າຍ" (ຈົດບັນຊີ 25:1-3; ເພງສັນລະເສີນ 106:28; 1 ໂກຣິນໂທ 10:20; ພຣະນິມິດ 16:14) ການເຮັດວຽກສື່ສານກັບວິນຍານທີ່ລຶ້ງເຄີຍເຫຼົ່ານັ້ນໄດ້ຖືກປະກາດວ່າ ເປັນສິ່ງທີ່ໜ້າລັງກຽດຕໍ່ໜ້າພຣະເຈົ້າ ແລະ ຖືກຫ້າມຢ່າງເຄັ່ງຄັດພາຍໃຕ້ການລົງໂທດແຫ່ງຄວາມຕາຍ. (ລະບຽບເລວີ 19:31; 20:27)
ສະນັ້ນ ສາສະໜາຜີແມ່ນວິທີໜຶ່ງທີ່ຊາຕານໃຊ້ຫຼາຍທີ່ສຸດເພື່ອນຳພາປະຊາຊົນເທິງແຜ່ນດິນໂລກຍ່າງອອກໄປຈາກພຣະເຈົ້າ.
ອ້າງອີງຈາກປຶ້ມ "ປາຍທາງແຫ່ງຄວາມຫວັງ" (ສະບັບພາສາໄທ) {ວັກ 552.1; 557.1; 553.2} ຂຽນໂດຍ ທ່ານ ນາງ ເອເລັນ ຈີ. ໄວທ
ການປອມຕົວຂອງຊາຕານ
ການປອມຕົວຂອງຊາຕານ
"ພຣະຄຳພີທຸກຕອນໄດ້ຮັບການຊົງບັນດານໃຈຈາກພຣະເຈົ້າ ແລະ ເປັນປະໂຫຍດໃນການສອນ, ການກ່າວຕັກເຕືອນວ່າກ່າວ, ການປັບປຸງແກ້ໄຂໃຫ້ຖືກຕ້ອງ ແລະ ການອົບຮົມໃນທາງຊອບທຳ, ເພື່ອຄົນຂອງພຣະເຈົ້າຈະບັນລຸຜົນສຳເລັດ ແລະ ຈັດຕຽມໄວ້ພ້ອມສຳລັບການດີທຸກຢ່າງ" (2 ຕີໂມທຽວ 3:16, 17)
ນັບຕັ້ງແຕ່ເລີ່ມມີຄວາມບາບ ຊາຕານກໍໄດ້ຄົ້ນຄິດການປອມແປງຫຼາຍຢ່າງຂຶ້ນມານັບບໍ່ຖ້ວນ. ມີວິທີໃດແດ່ທີ່ຈະປົກປ້ອງພວກເຮົາອອກຈາກການຫຼອກລວງເຫຼົ່ານີ້? ກົດຂໍ້ງ່າຍໆທີ່ພຣະຄຳພີໄດ້ປະທານໃຫ້ນັ້ນແມ່ນຫຍັງ? ມີພຽງທາງດຽວເທົ່ານັ້ນຄື "ຈົ່ງໄປຄົ້ນເບິ່ງກົດບັນຍັດ ແລະ ຄຳພະຍານ! ຖ້າພວກເຂົາບໍ່ໄດ້ເວົ້າຕາມນີ້ ພວກເຂົາກໍບໍ່ໄດ້ມີແສງສະຫວ່າງຂອງຮຸ່ງເຊົ້າຢູ່ເລີຍ" (ເອຊາຢາ 8:20 TNCV) ຂໍ້ນີ້ໝາຍຄວາມວ່າ ຖ້າຫຼັກຄຳສອນບໍ່ສອດຄ່ອງກັບພຣະຄຳພີກໍໝາຍຄວາມວ່າ ມັນບໍ່ແມ່ນຄວາມຈິງ.
ແຕ່ພວກເຮົາຈະຕ້ອງລະມັດລະວັງໃຫ້ຫຼາຍຂຶ້ນ ຊາຕານມັກຈະປອມແປງຄວາມຈິງ ໂດຍການໃຊ້ຂໍ້ພຣະຄຳພີໄປໃນທາງທີ່ຜິດ. ບາງຄັ້ງມັນເອົາພຽງຂໍ້ໜຶ່ງ ຫຼື ປະໂຫຍກໜຶ່ງ ແລະ ປ່ຽນຄວາມໝາຍຂອງມັນພໍທີ່ຈະບໍ່ຄືກັບສ່ວນທີ່ເຫຼືອຂອງພຣະຄຳທີ່ຊົງກ່າວໄວ້. ພວກເຮົາຕ້ອງໄດ້ສຶກສາພຣະຄຳພີດັ່ງນີ້ "ສຳລັບກົດເກນຈະຕ້ອງເປັນໄປຕາມກົດເກນ ປະໂຫຍກຕໍ່ປະໂຫຍກ ປະໂຫຍກຕໍ່ປະໂຫຍກ; ໜ້ອຍໜຶ່ງຢູ່ນີ້ ແລະ ໜ້ອຍໜຶ່ງຢູ່ນັ້ນ" (ເອຊາຢາ 28:10) ແລະ ພຣະຄຳພີຍັງກ່າວໄວ້ວ່າ ບໍ່ຕ້ອງສຶກສາ "ໃນຖ້ອຍຄຳເຊິ່ງປັນຍາຂອງມະນຸດໄດ້ສອນໄວ້ ແຕ່ດ້ວຍຖ້ອຍຄຳເຊິ່ງພຣະວິນຍານບໍຣິສຸດໄດ້ຊົງສັ່ງສອນ ເຊິ່ງປຽບທຽບສິ່ງທີ່ຢູ່ຝ່າຍຈິດວິນຍານກັບສິ່ງເຊິ່ງເປັນຂອງຈິດວິນຍານ" (1 ໂກຣິນໂທ 2:13)
ມີເທື່ອໜຶ່ງທີ່ຊາຕານໄດ້ໃຊ້ພຣະທຳເພງສັນລະເສີນ 91:11,12 ເພື່ອມາລໍ້ລວງພຣະເຢຊູໃຫ້ກະໂດດລົງຈາກເທິງຍອດພຣະວິຫານ. (ມັດທາຍ 4:6,7) ພຣະເຢຊູຊົງຮູ້ວ່າ ຊາຕານໄດ້ເອົາຂໍ້ພຣະຄຳພີເຫຼົ່ານີ້ໄປໃຊ້ໃນທາງທີ່ຜິດ ແຕ່ພຣະອົງຊົງຮູ້ໄດ້ແນວໃດ? ເພາະວ່າ ສິ່ງທີ່ຊາຕານກ່າວມານັ້ນໄດ້ຂັດແຍ້ງກັບພຣະທຳພຣະບັນຍັດສອງ 6:16.
ນັ້ນເປັນເຫດຜົນທີ່ບໍ່ຄວນໃຊ້ຂໍ້ພຣະຄຳພີພຽງຂໍ້ໜຶ່ງ ຫຼື ປະໂຫຍກໜຶ່ງ ເພື່ອພິສູດບາງສິ່ງ. ຄຳສອນຂອງພຣະຄຳພີທີ່ສຳຄັນມີການອະທິບາຍຢູ່ຫຼາຍໆບ່ອນໃນພຣະຄຳພີ ເພື່ອຊ່ວຍໃຫ້ພວກເຮົາເຂົ້າໃຈຂໍ້ພຣະຄຳພີໄດ້ຫຼາຍຂຶ້ນ. ຖ້າວ່າພວກເຮົາບໍ່ເຂົ້າໃຈສິ່ງທີ່ພຣະຄຳພີໄດ້ສອນໄວ້ທັງໝົດ ມັນກໍເປັນການງ່າຍທີ່ພວກເຮົາຈະຫຼົງເຂົ້າໃຈຜິດບາງຄຳສອນຂອງພຣະຄຳພີ. ດັ່ງທີ່ພຣະເຢຊູໄດ້ກ່າວວ່າ: "ພວກເຈົ້າຫຼົງຜິດແລ້ວ ເພາະພວກເຈົ້າບໍ່ຮູ້ຈັກພຣະຄຳພີ ຫຼື ຣິດເດດອຳນາດຂອງພຣະເຈົ້າ" (ມັດທາຍ 22:29)
ທຸກໆການປອມແປງຂອງຊາຕານແມ່ນເປັນຄວາມຜິດທີ່ອັນຕະລາຍຫຼາຍ. ມີຈັກຄົນແລ້ວທີ່ຈົບລົງໃນເສັ້ນທາງການທຳລາຍລ້າງຂອງຊາຕານ? ພຣະເຢຊູໄດ້ກ່າວວ່າ: "ຈົ່ງເຂົ້າໄປທາງປະຕູຄັບແຄບ ເພາະປະຕູເຂົ້າໄປນະຣົກກໍກວ້າງ ແລະ ທາງທີ່ນຳໄປສູ່ທີ່ນັ້ນກໍງ່າຍ ແລະ ຄົນທີ່ເດີນໄປຕາມທາງນັ້ນກໍມີຫຼວງຫຼາຍ. ແຕ່ປະຕູທີ່ນຳໄປສູ່ຊີວິດກໍຄັບແຄບ ແລະ ທາງທີ່ນຳໄປສູ່ທີ່ນັ້ນກໍຍາກ ແລະ ຄົນທີ່ພົບທາງນັ້ນກໍມີໜ້ອຍ" (ມັດທາຍ 7:13,14) ພຣະຄຳພີເປັນເໝືອນແຜນທີ່ທີ່ຊີ້ໃຫ້ເຫັນການປອມແປງທັງໝົດຂອງຊາຕານ ແລະ ສຳແດງໃຫ້ພວກເຮົາເຫັນທາງດຽວທີ່ໄປເຖິງສະຫວັນ. "ຖ້ອຍຄຳຂອງພຣະອົງເປັນແສງໂຄມນຳທາງໃຫ້ຂ້ານ້ອຍ ແລະ ແສງແຈ້ງສຳລັບທາງເດີນໃຫ້ຂ້ານ້ອຍ" (ເພງສັນລະເສີນ 119:105)
ຊາຕານຮູ້ດີວ່າ ພຣະຄຳພີຈະສຳແດງໃຫ້ພວກເຮົາເຫັນເຖິງບັນດາການກະທຳຜິດ ແລະ ການປອມແປງທີ່ມັນໄດ້ນຳເຂົ້າມາ. ສະນັ້ນ ມັນຈຶ່ງປົກປິດພຣະຄຳພີໄວ້ໃຫ້ຫ່າງຈາກພວກເຮົາ. ໃນອະດີດ ມັນເປັນຕົ້ນເຫດເຮັດໃຫ້ພຣະຄຳພີຫຼາຍເຫຼັ້ມຖືກທຳລາຍ. ແຕ່ປັດຈຸບັນນີ້ ມັນມີກົນລະຍຸດທີ່ແຕກຕ່າງກັນ ມັນພະຍາຍາມເຮັດໃຫ້ພວກເຮົາຫຍຸ້ງຢູ່ກັບວຽກງານ ຫຼື ຢຶດຕິກັບສິ່ງອື່ນໆ ແລະ ດ້ວຍເຫດນັ້ນ ພວກເຮົາຈຶ່ງລະເລີຍການສຶກສາພຣະຄຳພີ. ຈິດໃຈຂອງພວກເຮົາຢຶດຕິຢູ່ກັບໂທລະພາບ, ມືຖື, ງານລ້ຽງ, ການຊື້-ຂາຍ, ວຽກງານ ແລະ ສິ່ງອື່ນໆຢ່າງຫຼວງຫຼາຍມາແທນທີ່ພຣະຄຳພີ.
ມີໜຶ່ງວິທີຂອງຊາຕານທີ່ນິຍົມເພື່ອນຳພາປະຊາຊົນໃຫ້ອອກຫ່າງຈາກການສຶກສາພຣະຄຳພີ ຄືນຳພວກເຂົາໄປເພິ່ງພາໃນບັນດາອາຈານສາສະໜາຂອງພວກເຂົາ. ມີຫຼາຍຄົນບໍ່ໄດ້ໃຊ້ເວລາເພື່ອອ່ານພຣະຄຳພີ ເພາະພວກເຂົາເຊື່ອວ່າສິ່ງທີ່ອາຈານສາສະໜາຂອງພວກເຂົາສອນນັ້ນຕ້ອງແມ່ນຄວາມຈິງ. ພຣະເຢຊູເອີ້ນອາຈານສາສະໜາເຫຼົ່ານັ້ນວ່າ "ພວກຜູ້ນຳຕາບອກ." ແລ້ວຈະເກີດຫຍັງຂຶ້ນກັບບັນດາຜູ້ທີ່ເພິ່ງພາຄວາມຄິດເຫັນຂອງຄົນອື່ນມາແທນທີ່ພຣະຄຳຂອງພຣະເຈົ້າ? ພຣະເຢຊູໄດ້ກ່າວກັບບັນດາອາຈານທີ່ເຄັ່ງຄັດສາສະໜາໃນສະໄໝຂອງພຣະອົງວ່າ: "ພວກເຂົາເປັນຄົນຕາບອດນຳຄົນຕາບອດ ແລະ ເມື່ອຄົນຕາບອດຈູງຄົນຕາບອດໄປ ເຂົາທັງສອງກໍຕົກລົງໃນຂຸມ" (ມັດທາຍ 15:14)
ຊາຕານມີຫຼາຍວິທີທາງເພື່ອຫຼອກລວງພວກເຮົາ. ດັ່ງນັ້ນ ພວກເຮົາຕ້ອງມີພຣະວິນຍານບໍຣິສຸດເພື່ອບໍ່ໃຫ້ຖືກຫລອກລວງ. "ດ້ວຍວ່າ ຜູ້ໃດໜໍ ອາດຮູ້ຄວາມຄິດຂອງມະນຸດໄດ້ ເວັ້ນໄວ້ແຕ່ຈິດວິນຍານທີ່ຢູ່ພາຍໃນມະນຸດຜູ້ນັ້ນ ໃນທຳນອງດຽວກັນ ບໍ່ມີຜູ້ໃດຮູ້ພຣະໄທພຣະເຈົ້າ ແຕ່ແມ່ນພຣະວິນຍານຂອງພຣະເຈົ້າເທົ່ານັ້ນ ທີ່ຮູ້ທຸກສິ່ງກ່ຽວກັບພຣະເຈົ້າ." ແລະ "ແຕ່ມະນຸດທີ່ມີຈິດໃຈທຳມະດາຈະຮັບສິ່ງເຫຼົ່ານັ້ນ ເຊິ່ງເປັນຂອງພຣະວິນຍານຂອງພຣະເຈົ້າກໍບໍ່ໄດ້ ເພາະພວກເຂົາເຫັນວ່າ ສິ່ງເຫຼົ້ານີ້ເປັນເລື່ອງໂງ່ສຳລັບຕົນ ແລະ ບໍ່ສາມາດເຂົ້າໃຈ ເພາະວ່າ ທີ່ຈະເຂົ້າໃຈສິ່ງເຫຼົ່ານັ້ນໄດ້ ກໍຕ້ອງອາໄສພຣະວິນຍານ" (1 ໂກຣິນໂທ 2:11,14) ແລ້ວພວກເຮົາຈະໄດ້ຮັບການຊ່ວຍເຫຼືອຈາກພຣະວິນຍານບໍຣິສຸດໄດ້ແນວໃດ? ພຣະເຈົ້າຊົງສັນຍານໄວ້ວ່າ ຈະປະທານພຣະວິນຍານບໍຣິສຸດໃຫ້ແກ່ຜູ້ທີ່ຂໍຈາກພຣະອົງ. (ລູກາ 11:13) ນັ້ນເປັນເຫດຜົນທີ່ພວກເຮົາຄວນອະທິຖານຢູ່ສະເໝີກ່ອນທີ່ພວກເຮົາຈະສຶກສາພຣະຄຳພີ. ມີພຽງພຣະວິນຍານບໍຣິສຸດເທົ່ານັ້ນທີ່ສາມາດຊ່ວຍພວກເຮົາໃຫ້ເຂົ້າໃຈຄວາມໝາຍຂອງຂໍ້ຢູ່ໃນພຣະຄຳພີ ແລະ ປ້ອງກັນພວກເຮົາອອກຈາກການໃຊ້ຂໍ້ເຫຼົ່ານັ້ນໄປໃນທາງທີ່ຜິດ. ກ່ອນທີ່ຈະເປີດພຣະຄຳພີ ຄຳອະທິຖານຂອງພວກເຮົາຄວນຈະເປັນ "ຂໍຊົງໂຜດເປີດຕາຂອງຂ້ານ້ອຍ ເພື່ອຂ້ານ້ອຍຈະໄດ້ເຫັນຄວາມຈິງອັນອັດສະຈັນຢູ່ໃນກົດບັນຍັດນັ້ນ" (ເພງສັນລະເສີນ 119:18) ແລະ "ພຣະວິນຍານບໍຣິສຸດເຈົ້າ ຜູ້ທີ່ພຣະບິດາເຈົ້າຈະໃຊ້ມາໃນນາມຂອງເຮົາ ອົງນັ້ນແຫລະ ຈະສັ່ງສອນພວກເຈົ້າທຸກສິ່ງ ແລະ ຈະເຕືອນໃຫ້ພວກເຈົ້າລະນຶກເຖິງທຸກສິ່ງ ເຊິ່ງເຮົາໄດ້ບອກພວກເຈົ້າແລ້ວນັ້ນ" (ໂຢຮັນ 14:16)
ພຣະຄຳພີແມ່ນເຄື່ອງປ້ອງກັນຢ່າງປອດໄພທີ່ຕໍ່ຕ້ານການປອມແປງຂອງຊາຕານ. ພວກເຮົາຈະບໍ່ຖືກຫຼອກລວງ ຖ້າພວກເຮົາເອົາພຣະຄຳພີເປັນຄູ່ມືນຳທາງຂອງພວກເຮົາເທົ່ານັ້ນ. ທ່ານຈະຕັດສິນໃຈໃຊ້ເວລາອະທິຖານ ແລະ ສຶກສາພຣະຄຳຂອງພຣະເຈົ້າທຸກໆມື້ບໍ?
ອ້າງອີງຈາກບົດຮຽນ "My Bible First” Junior/Teen Lessons, Year C, No. 50.
ການເຂົ້າສູ່ຄວາມຂັດແຍ້ງ
ການເຂົ້າສູ່ຄວາມຂັດແຍ້ງ
ເປົ້າໝາຍຂອງຊາຕານແມ່ນການລົບລ້າງພຣະບັນຍັດຂອງພຣະເຈົ້າ. ດັ່ງນັ້ນ ການຫຼອກລວງມະນຸດໃນທາງຂອງມັນ ມັນໄດ້ນຳພາພວກເຂົາລ່ວງລະເມີດພຣະບັນຍັດຂອງພຣະເຈົ້າ. ມັນໄດ້ນຳພາມະນຸດໃຫ້ບິດເບືອນຫຼັກຄຳສອນຂອງພຣະຄຳພີ. ປັດຈຸບັນ ພຣະຄຳພີມີຄຸນຄ່າໜ້ອຍຫຼາຍ ຄວາມຈິງກໍຖືກຕໍ່ຕ້ານ. ໂດຍການປະຕິເສດຮາກຖານແຫ່ງຄວາມຈິງໃນພຣະຄຳພີ ແລະ ພຣະບັນຍັດຂອງພຣະເຈົ້າ ປະຊາຊົນກໍໄດ້ປະຕິເສດພຣະເຈົ້າ. ບໍ່ມີຄວາມຜິດອັນໃດທີ່ຮ້າຍແຮງເກີນໄປກວ່າທ່າມກາງບັນດາຄຣິສຕະຈັກໂປຣແຕສແຕນທີ່ທ້າທາຍຕໍ່ອຳນາດຂອງສະຫວັນວ່າ ພຣະບັນຍັດຂອງພຣະເຈົ້າບໍ່ມີຜົນບັງຄັບໃຊ້ແລ້ວ. ບໍ່ມີປະເທດໃດທີ່ຢູ່ໄດ້ໂດຍບໍ່ມີກົດໝາຍ. ແລ້ວພຣະເຈົ້າຂອງພວກເຮົາຈະບໍ່ມີກົດໝາຍປົກຄອງສິ່ງມີຊີວິດທີ່ພຣະອົງຊົງສ້າງຂຶ້ນມານັ້ນບໍ? ຄວາມຄິດຜິດທີ່ວ່າ ພຣະບັນຍັດຂອງພຣະເຈົ້າບໍ່ມີຜົນບັງຄັບໃຊ້ນັ້ນ ມັນໄດ້ເຮັດໃຫ້ປະຊາຊົນຄິດວ່າ ບໍ່ຈຳເປັນຕ້ອງປະຕິບັດຕາມພຣະປະສົງຂອງພຣະເຈົ້າ. ຄວາມຄິດນີ້ໄດ້ເຮັດໃຫ້ສິນລະທຳໃນສັງຄົມເຊື່ອມໂຊມລົງ. ການກະທຳຊົ່ວຮ້າຍເພີ່ມຂຶ້ນ ຄວາມປອດໄພຂອງພົນລະເມືອງຖືກຮຸກຮານ. {GC 582.1,2; 584.1; 585.2}
ແລ້ວຊາຕານກໍບອກປະຊາຊົນໂດຍຜ່ານທາງຄຣິສຕະຈັກໂຣມັນຄາໂຕລິກ ແລະ ຄຣິສຕະຈັກໂປຣແຕສແຕນວ່າ ຄວາມຊົ່ວຮ້າຍທີ່ເຫັນໃນປະເທດແມ່ນເກີດຈາກການເຮັດໃຫ້ວັນອາທິດນັ້ນໝົດຄວາມສັກສິດ. ພວກເຂົາຢືນຢັນວ່າ ຖ້າມີການບັງຄັບໃຫ້ຖືຮັກສາວັນອາທິດ ມັນຈະຊ່ວຍໃຫ້ສິນລະທຳຂອງສັງຄົມດີຂຶ້ນຢ່າງຫຼວງຫຼາຍ. {GC 587.1}
ເພື່ອຫຼອກລວງປະຊາຊົນໃຫ້ຫຼາຍຂຶ້ນ ຊາຕານຈະປາກົດເປັນທູດສະຫວັນແຫ່ງຄວາມສະຫວ່າງ. ແລະ ຜ່ານທາງຄົນຮັບໃຊ້ຂອງມັນ ພວກເຂົາເຫຼົ່ານັ້ນຈະສາມາດເຮັດການອັດສະຈັກຕ່າງໆ ຄົນປ່ວຍຈະໄດ້ຮັບການຮັກສາໃຫ້ຫາຍດີ ແລະ ການກະທຳສິ່ງມະຫັດສະຈັນອື່ນໆຈະເກີດຂຶ້ນ. ພວກເຂົາເຫຼົ່ານັ້ນຈະຍອມຮັບວ່າ ມີຄວາມເຊື່ອໃນພຣະຄຳພີ ແລະ ຄຣິສຕະຈັກ ແຕ່ໃນບັ້ນປາຍ ພວກເຂົາເຫຼົ່ານັ້ນຈະທຳລາຍພຣະຄຳຂອງພຣະເຈົ້າ. ປະຊາຊົນຈະບໍ່ທັນຮູ້ຕົວເຖິງການຫຼອກລວງຂອງຊາຕານ ແລະ ພວກເຂົາຈະເຊື່ອວ່າ ພຣະວິນຍານຂອງພຣະເຈົ້າຢູ່ທ່າມກາງພວກເຂົາ. {GC588.2}
ໂດຍຜ່ານທາງຊາຕານ ແລະ ຄົນຮັບໃຊ້ຂອງມັນ ພວກມັນຈະປາກົດຕົວເປັນຜູ້ອຸປະຖຳໂລກດ້ວຍການເຮັດອັດສະຈັນຕ່າງໆ ແຕ່ຢູ່ເບື້ອງຫຼັງຂອງເຫດການທັງໝົດ ພວກມັນໄດ້ລໍ້ລວງມະນຸດຜູ້ທີ່ບໍ່ບັງຄັບຈິດໃຈຂອງຕົວເອງ ເຊິ່ງເປັນສາເຫດເຮັດໃຫ້ມະນຸດໃຊ້ເຫດຜົນຢ່າງບໍ່ຖືກຕ້ອງ ອັນຈະສົ່ງຜົນໃຫ້ເກີດການປ່ອຍຕົວໄປຕາມການຍົວະຍວນໃຈ, ການຕໍ່ສູ້ ແລະ ການນອງເລືອດ. ພວກມັນໄດ້ນຳສິ່ງເຫຼົ່ານັ້ນເປັນສາເຫດເຮັດໃຫ້ມະນຸດໄປສູ່ການສູນເສຍຄວາມຮູ້ສຶກຖືກ ແລະ ຜິດ. ດັ່ງນັ້ນ ມະນຸດຈຶ່ງຖືກນຳໄປສູ່ການກະທຳຄວາມບາບອັນໃຫຍ່ຫຼວງ. ນອກຈາກນີ້ ພວກມັນຍັງໄດ້ນຳພາມະນຸດໃຫ້ເສບຕິດໃນການເບິ່ງໂທລະພາບ, ວິດີໂອ ແລະ ລະຄອນຕ່າງໆທີ່ເຕັມໄປດ້ວຍການກະທຳຊົ່ວຮ້າຍເຊັ່ນ: ການລ່ວງປະເວນີ, ການເປັນພະຍານບໍ່ຈິງ, ການຫຼອກລວງ, ການລັກຂະໂມຍ ແລະ ອື່ນໆເປັນຕົ້ນ. ດັ່ງນັ້ນ ພວກມັນຈຶ່ງປຸກລະດົມຈິດໃຈຂອງມະນຸດໃຫ້ຄິດເຖິງແຕ່ສິ່ງທີ່ຊົ່ວຮ້າຍ ແລະ ເມື່ອເວລາຜ່ານໄປ ມະນຸດກໍເລີ່ມຝຶກຮຽນແບບຢ່າງຕາມການກະທຳຊົ່ວຮ້າຍເຫຼົ່ານັ້ນທີ່ໄດ້ເຫັນຢູ່ໃນວິດີໂອ ແລະ ຄວາມບັນເທິງອື່ນໆ. ດັ່ງນັ້ນ ຊາຕານຈຶ່ງເຮັດວຽກກັບທຸກໆຄວາມຮູ້ສຶກ ເພື່ອລໍ້ລວງມະນຸດໃຫ້ເຮັດຄວາມຊົ່ວຮ້າຍ ແລະ ທຳລາຍລ້າງພຣະບັນຍັດຂອງພຣະເຈົ້າ. {GC 589.1}
ຊາຕານຍັງໄດ້ສຶກສາກົດເກນຕ່າງໆໃນທຳມະຊາດ ເພື່ອທີ່ຈະກໍ່ໃຫ້ເກີດພາຍຸ, ຄື້ນສຶນາມິ, ນ້ຳຖ້ວມ, ພາຍຸທໍນາໂດ, ພາຍຸລູກເຫັບ, ແຜ່ນດິນໄຫວ, ໄຟໄໝ້ປ່າ ແລະ ອື່ນໆເປັນຕົ້ນ. ມັນຄຳນວນກົດເກນຕ່າງໆຂອງທຳມະຊາດ ເພື່ອທີ່ຈະນຳໄພພິບັດ ແລະ ໂຣກພະຍາດທັງຫຼາຍມາສູ່ເມືອງຕ່າງໆ ຈົນກວ່າເມືອງຈະຖືກທຳລາຍ. {GC 589.2}
ໂລກແມ່ນເຕັມໄປດ້ວຍການທຳລາຍລ້າງ, ການນອງເລືອດ ແລະ ໂຣກພະຍາດ ເຊິ່ງຊາຕານເປັນຕົ້ນເຫດ. ແຕ່ຊາຕານຈະເຮັດໃຫ້ຄົນທັງຫຼາຍເຊື່ອວ່າ ບັນດາຜູ້ຮັບໃຊ້ຂອງພຣະເຈົ້າເປັນຕົ້ນເຫດຂອງຄວາມຊົ່ວຮ້າຍທັງຫຼາຍເຫຼົ່ານີ້. ຜູ້ທີ່ບໍ່ໄດ້ຕິດຕາມພຣະເຈົ້າຈະກ່າວຫາປະຊາຊົນຂອງພຣະເຈົ້າວ່າ ເປັນຕົ້ນເຫດເຮັດໃຫ້ພຣະພິໂຣດຂອງພຣະເຈົ້າຖືກຖອກເທລົງມາ. ພວກເຂົາຈະກ່າວຫາອີກວ່າ ເປັນຍ້ອນປະຊາຊົນຂອງພຣະເຈົ້າກຳລັງລ່ວງລະເມີດວັນຊະບາໂຕວັນອາທິດ ແລະ ຖ້າວ່າວັນຊະບາໂຕວັນອາທິດຖືຮັກສາຢ່າງເຄັ່ງຄັດ ມັນກໍອາດຈະກັບຄືນສູ່ການເປັນທີ່ພໍພຣະໄທຂອງພຣະເຈົ້າ ລວມທັງຄວາມຈະເລີນຮັ່ງມີໃນໂລກນີ້ດ້ວຍ. ການສື່ສານຈາກພວກວິນຍານຈະປະກາດອອກມາວ່າ ພຣະເຈົ້າໄດ້ສົ່ງພວກເຂົາມາບອກໃຫ້ປະຊາຊົນຮູ້ວ່າ ວັນອາທິດແມ່ນວັນຊະບາໂຕ; ແລະ ພວກເຂົາຈະບອກອີກວ່າ ຄວນຈະປະຕິບັດກົດໝາຍຂອງປະເທດເໝືອນກັບກົດໝາຍຂອງພຣະເຈົ້າ. {GC 590.1}
ໃນຂະນະທີ່ຊາຕານຫາທາງທຳລາຍພຣະບັນຍັດຂອງພຣະເຈົ້າ ມັນຈະກ່າວຫາໃສ່ປະຊາຊົນຂອງພຣະເຈົ້າວ່າເປັນຜູ້ເຮັດຜິດກົດໝາຍ ເປັນຜູ້ໝິ່ນປະໝາດພຣະເຈົ້າ ແລະ ເປັນຜູ້ນຳໄພພິບັດມາສູ່ໂລກນີ້. {GC 591.1}
ພຣະເຈົ້າບໍ່ເຄີຍບັງຄັບຈິດໃຈ ແຕ່ຊາຕານບັງຄັບຈິດໃຈ. ຊາຕານພະຍາຍາມຄວບຄຸມຈິດໃຈ ໂດຍຜ່ານທາງການໃຊ້ຄວາມໂຫດຮ້າຍ, ຄວາມຢ້ານ ແລະ ການບັງຄັບ. {GC 591.2}
ບັນດາຜູ້ທີ່ນັບຖືວັນສະບາໂຕວັນເສົາຕາມພຣະຄຳພີ ແລະ ຮັກສາພຣະບັນຍັດຂອງພຣະເຈົ້າ ຈະຖືກກ່າວຫາວ່າເປັນສັດຕູຕໍ່ກົດໝາຍ ແລະ ກົດລະບຽບ, ເປັນຜູ້ທຳລາຍສິນລະທຳຂອງສັງຄົມ, ເປັນຜູ້ເຮັດໃຫ້ເກີດຄວາມວຸ່ນວາຍ ແລະ ຄວາມເສື່ອມໂຊມ ແລະ ເປັນຜູ້ນຳການພິພາກສາຂອງພຣະເຈົ້າລົງມາສູ່ໂລກນີ້. ຄົນຊອບທຳຈະຖືກກ່າວຫາຍ້ອນຄວາມຊົ່ວຮ້າຍທັງໝົດໃນໂລກນີ້ທີ່ເກີດຈາກຄວາມຊົ່ວຮ້າຍຂອງຄົນອື່ນໆ. ຄົນຊອບທຳທີ່ຮັກສາວັນສະບາໂຕວັນເສົາຈະຖືກກ່າວຫາວ່າ ດື້ດ້ານ ຍ້ອນພວກເຂົາຕິດຕາມສຽງຂອງໃຈສຳນຶກຜິດຊອບຂອງພວກເຂົາ. {GC 592.1}
ບັນດາຄຣິສຕະຈັກໂປຣແຕສແຕນຈະປະຕິເສດຫຼັກຖານໃນພຣະຄຳພີທີ່ວ່າ ວັນຊະບາໂຕແທ້ຈິງແມ່ນວັນເສົາ. ແລ້ວພວກເຂົາຈະພະຍາຍາມປິດປາກຜູ້ທີ່ເຊື່ອໃນວັນຊະບາໂຕວັນເສົາ. ຈາກນັ້ນ ພວກເຂົາຈະຮ່ວມມືກັບຄຣິສຕະຈັກຄາໂຕລິກໃນການບັງຄັບໃຊ້ກົດໝາຍຂອງມະນຸດແທນທີ່ພຣະບັນຍັດຂອງພຣະເຈົ້າທີ່ຊົງປະທານໃຫ້. ແລ້ວບັນດາຜູ້ນຳຄຣິສຕະຈັກ ແລະ ລັດຖະບານຈະຮ່ວມມືກັນເພື່ອໃຫ້ສິນບົນ, ຊັກຊວນ ແລະ ບັງຄັບຄົນທຸກຊົນຊັ້ນໃຫ້ຖືຮັກສາວັນຊະບາໂຕວັນອາທິດ. ສະນັ້ນ ທຸກໆຄົນຈະຕ້ອງໄດ້ຕັດສິນໃຈເລືອກຢູ່ຝ່າຍໃດຝ່າຍໜຶ່ງຂອງພວກເຂົາລະຫວ່າງຈະຢູ່ຝ່າຍພຣະເຈົ້າ ຫຼື ຈະຢູ່ຝ່າຍມະນຸດ. {GC 592.2; 592.3}
ອ້າງອີງຈາກປຶ້ມ "ປາຍທາງແຫ່ງຄວາມຫວັງ" (ສະບັບພາສາໄທ) {ວັກ 582.1-592.3} ຂຽນໂດຍ ທ່ານ ນາງ ເອເລັນ ຈີ. ໄວທ
ພຣະຄຳຂອງພຣະເຈົ້າເປັນເຄື່ອງປົກປ້ອງພວກເຮົາ
ພຣະຄຳຂອງພຣະເຈົ້າເປັນເຄື່ອງປົກປ້ອງພວກເຮົາ
"ຈົ່ງໄປຄົ້ນເບິ່ງກົດບັນຍັດ ແລະ ຄຳພະຍານ! ຖ້າພວກເຂົາບໍ່ໄດ້ເວົ້າຕາມນີ້ ພວກເຂົາກໍບໍ່ໄດ້ມີແສງສະຫວ່າງຂອງຮຸ່ງເຊົ້າຢູ່ເລີຍ" (ເອຊາຢາ 8:20 TNCV)
ພຣະເຈົ້າຊົງເອີ້ນພວກເຮົາໃຫ້ກວດກາທຸກສິ່ງດ້ວຍພຣະຄຳຂອງພຣະອົງ ເພື່ອບໍ່ໃຫ້ພວກເຮົາຖືກລໍ້ລວງ. ພຣະຄຳພີເປີດເຜີຍກົນອຸບາຍຕ່າງໆຂອງຊາຕານ ເຊິ່ງພວກເຮົາຈະບໍ່ຕົກຢູ່ໃນການລໍ້ລວງເຫຼົ່ານັ້ນ. ຊາຕານແມ່ນກຳລັງເຮັດວຽກການອັດສະຈັນ ແລະ ສິ່ງມະຫັດສະຈັນໃນໄວໆນີ້ ແລະ ຖ້າພວກເຮົາບໍ່ມີພຣະຄຳຂອງພຣະເຈົ້າເປັນພື້ນຖານແລ້ວ ພວກເຮົາຈະຖືກລໍ້ລວງ ແລະ ຄິດວ່າສິ່ງເຫຼົ່ານັ້ນແມ່ນເປັນຂອງພຣະເຈົ້າ ແຕ່ຄວາມຈິງແລ້ວແມ່ນເປັນຂອງຊາຕານ. ມີພຽງສະເພາະບັນດາຜູ້ທີ່ຮູ້ພຣະຄຳພີດີເທົ່ານັ້ນທີ່ຈະບໍ່ຖືກລໍ້ລວງຢູ່ໃນຍຸກສຸດທ້າຍ. {GC 593.1}
ພຣະເຈົ້າຊົງປະທານຄຳພະຍາກອນໃຫ້ແກ່ພວກເຮົາ ເພື່ອທີ່ຈະເປີດເຜີຍໃຫ້ພວກເຮົາເຫັນວ່າ ຈະມີຫຍັງເກີດຂຶ້ນໃນອະນາຄົດ ແລະ ການກຽມຄວາມພ້ອມທີ່ພວກເຮົາຈະຕ້ອງປະເຊີນກັນເຫດການເຫຼົ່ານີ້. ມັນເປັນສິ່ງທີ່ສຳຄັນສຳລັບພວກເຮົາທີ່ຈະຕ້ອງເອົາໃຈໃສ່ໃນສິ່ງທີ່ໄດ້ຮັບການເປີດເຜີຍ ເພື່ອວ່າພວກເຮົາຈະບໍ່ໄດ້ດຳເນີນການທີ່ຍັງບໍ່ມີຄວາມພ້ອມເທື່ອ. {GC 594.1}
ມີພຽງພຣະຄຳພີເທົ່ານັ້ນທີ່ເປັນພື້ນຖານຂອງພວກເຮົາ. ຂໍ້ຄິດເຫັນຕ່າງໆຂອງມະນຸດ, ຂໍ້ສະຫຼຸບທາງວິທະຍາສາດ ແລະ ຫຼັກຄຳສອນຂອງສາສະໜາ ເຊິ່ງເປັນທີ່ນັບຖືຂອງຄົນສ່ວນຫຼາຍ. ກ່ອນທີ່ພວກເຮົາຈະຍອມຮັບຫຼັກຄຳສອນ ຫຼື ຂໍ້ຄິດເຫັນໃດໆເຫຼົ່ານັ້ນ ພວກເຮົາຈະຕ້ອງໄດ້ຖາມພຣະຄຳພີວ່າພຣະເຈົ້າໄດ້ກ່າວວ່າຢ່າງໃດ. ເປົ້າໝາຍຂອງຊາຕານແມ່ນນຳພາປະຊາຊົນໃຫ້ແນມໄປຫາບັນດາສາດສະໜາຈານ, ອາຈານ ແລະ ຜູ້ນຳຄຣິສຕະຈັກ ເພື່ອເປັນຜູ້ຊີ້ນຳທາງໃຫ້ແກ່ປະຊາຊົນແທນທີ່ພຣະຄຳພີ. ເພາະຖ້າວ່າ ຊາຕານສາມາດນຳພາບັນດາຜູ້ນຳເຫຼົ່ານັ້ນໃຫ້ໄປສູ່ຫຼັກຄຳສອນທີ່ຜິດໄດ້ ເມື່ອນັ້ນປະຊາຊົນກໍຈະເດີນໃນທາງທີ່ຜິດ. {GC 595.1}
ຕອນທີ່ພຣະເຢຊູສະເດັດເຂົ້າມາໃນໂລກນີ້ ປະຊາຊົນຢ່າງຫຼວງຫຼາຍ ແລະ ອາຈານສອນສາສະໜາບາງຄົນໄດ້ຟັງຄຳສອນຂອງພຣະອົງດ້ວຍຄວາມຍິນດີ. ແຕ່ບັນດາຜູ້ນໍາສາສະໜາ ແລະ ຜູ້ນຳປະເທດໄດ້ປະຕິເສດຄຳສອນຂອງພຣະເຢຊູ ແລະ ຄຶງພຣະອົງໄວ້ເທິງໄມ້ກາງແຂນ. ພວກເຂົາອິດສາຄວາມນິຍົມຂອງພຣະເຢຊູ ແລະ ພວກເຂົາຢ້ານເສຍຕຳແໜ່ງຂອງພວກເຂົາ. ດັ່ງນັ້ນ ພວກເຮົາຈຶ່ງສາມາດສະຫຼຸບໄດ້ວ່າ ບັນດາຜູ້ນໍາສາສະໜາ ແລະ ລັດຖະບານຈະປະຕິເສດພຣະເຈົ້າອົງແທ້ຈິງໃນຍຸກສຸດທ້າຍ ເໝືອນກັນກັບທີ່ປະຕິເສດພຣະເຢຊູໃນສະໄໝອະດີດ. {GC 595.3}
ມີຫຼາຍຄົນທີ່ບໍ່ຢາກຟັງພຣະຄຳພີ ເຖິງແມ່ນວ່າພວກເຂົາຈະຍອມຮັບວ່າຕິດຕາມພຣະເຢຊູກໍຕາມ. ພວກເຂົາມີຫຼັກຄຳສອນ ແລະ ຄວາມຄິດຂອງພວກເຂົາເອງ. ແລະ ເມື່ອຖາມວ່າ ເປັນຫຍັງ ພວກເຂົາຈຶ່ງເຊື່ອແບບນີ້ ຫຼື ແບບນັ້ນ ພວກເຂົາເວົ້າວ່າ: "ເບິ່ງແມ້, ພວກເຮົາມີຫຼາຍຄົນກວ່າພວກເຈົ້າທີ່ເຊື່ອເຊັ່ນນີ້." {GC 596.1}
ບັນດາຜູ້ນຳຫຼາຍຄົນພະຍາຍາມບັງຄັບປະຊາຊົນໃຫ້ເຊື່ອເໝືອນກັນກັບທີ່ພວກເຂົາເຊື່ອ ແຕ່ນີ້ບໍ່ແມ່ນວິທີທີ່ພຣະເຈົ້າຊົງກະທຳ. ພຣະເຈົ້າຊົງໃຫ້ອິດສະລະພາບໃນການເລືອກທີ່ຈະເຊື່ອໃນພຣະອົງ ແລະ ຄວາມຈິງຂອງພຣະອົງ ຫຼື ເຊື່ອໃນຄຳສອນທີ່ຜິດ ແລະ ອາຈານສາສະໜາທຽມເທັດ(ຈອມປອມ). ພຣະເຈົ້າບໍ່ເຄີຍບັງຄັບໃຫ້ຜູ້ໃດເຊື່ອໃນພຣະອົງ.
ເຖິງແມ່ນວ່າ ພຣະຄຳພີຈະເຕັມໄປດ້ວຍຄຳເຕືອນເລື່ອງອາຈານສາສະໜາທຽມເທັດ ແຕ່ກໍຍັງມີປະຊາຊົນຈຳນວນຫຼວງຫຼາຍທີ່ມອບຈິດວິນຍານຂອງພວກເຂົາໃຫ້ແກ່ອາຈານສາສະໜາທຽມເທັດເຫຼົ່ານັ້ນ. ແຕ່ບັນດາອາຈານຈະບໍ່ມີທາງເຮັດຜິດເລີຍບໍ? ພວກເຂົາເປັນມະນຸດຄືກັນກັບພວກເຮົາ, ຖືກການທົດລອງຄືກັນກັບພວກເຮົາ ແລະ ເຖິງແມ່ນວ່າ ອາຈານບາງຄົນຈະສາມາດຊ່ວຍພວກເຮົາໃຫ້ເຂົ້າໃຈພຣະຄຳຂອງພຣະເຈົ້າໄດ້ດີ ແຕ່ກໍມີໜ້ອຍຄົນເທົ່ານັ້ນ. ເຖິງຢ່າງໃດກໍຕາມ ສິ່ງທີ່ພວກເຮົາໄດ້ຮັບການສອນມານັ້ນ ພວກເຮົາຄວນກວດກາທຸກສິ່ງດ້ວຍພຣະຄຳຂອງພຣະເຈົ້າ. {GC 596.4}
ຫຼາຍໆຄົນເຫັນວ່າ ມັນຍາກທີ່ຈະເຊື່ອໃນຫຼັກຄຳສອນແທ້ຈິງຂອງພຣະຄຳພີ ເພາະໃນການເຮັດເຊັ່ນນີ້ມັນຈະແບ່ງແຍກພວກເຂົາອອກຈາກໝູ່ເພື່ອນ, ຄອບຄົວ, ຜົວ ຫຼື ເມຍຂອງພວກເຂົາ ແລະ ອື່ນໆເປັນຕົ້ນ. ດັ່ງນັ້ນ ພວກເຂົາຈຶ່ງບໍ່ມີຄວາມກ້າທີ່ຈະເຮັດ ຫຼື ຄິດສິ່ງທີ່ແຕກຕ່າງຈາກຄົນທີ່ຢູ່ອ້ອມຂ້າງຂອງພວກເຂົາ ເພາະຢ້ານວ່າຈະສູນເສຍສາຍສຳພັນຂອງພວກເຂົາ. {GC 597.1}
ບາງຄົນຫຼີກເວັ້ນຈາກການຮຽນຮູ້ຄວາມຈິງ ເພາະຢ້ານວ່າ ພວກເຂົາຈະຕ້ອງຮັບຜິດຊອບສຳລັບການທີ່ບໍ່ເຊື່ອຟັງຄວາມຈິງທີ່ໄດ້ສຳແດງໃຫ້ພວກເຂົາເຫັນແລ້ວ. ແຕ່ການບໍ່ເອົາໃຈໃສ່ຮຽນຮູ້ຄວາມຈິງ ຈະບໍ່ສາມາດນຳມາໃຊ້ເປັນຂໍ້ແກ້ຕົວໃຫ້ກັບຄວາມຜິດ ຫຼື ຄວາມບາບ ໃນເມື່ອມີໂອກາດທີ່ຈະຮຽນຮູ້ຄວາມຈິງ. ຍົກຕົວຢ່າງ ເມື່ອຊາຍຄົນໜຶ່ງເດີນທາງມາຈົນເຖິງທາງແຍກ, ທີ່ມີຖະໜົນຫຼາຍເສັ້ນ ແລະ ມີປ້າຍຊີ້ທາງບອກວ່າ ທາງແຕ່ລະສາຍຈະນຳໄປສູ່ສະຖານທີ່ແຫ່ງໃດ, ຖ້າລາວບໍ່ສົນໃຈປ້າຍບອກທາງ ແລະ ຍ່າງໄປຕາມທາງທີ່ລາວຄິດວ່າຖືກຕ້ອງ ລາວອາດຍ່າງໄປດ້ວຍຄວາມຈິງໃຈ ແຕ່ກໍມີຄວາມເປັນໄປໄດ້ສູງທີ່ລາວຈະພົບວ່າ ຕົວລາວເອງຍ່າງຢູ່ເທິງເສັ້ນທາງທີ່ຜິດ. "ທາງທີ່ມະນຸດຄິດວ່າຖືກຕ້ອງ ອາດນຳໄປສູ່ຄວາມຕາຍ" (ສຸພາສິດ 16:25) {GC 597.3}
ພວກເຮົາຄວນສຶກສາພຣະຄຳພີຢ່າງດຸໝັ່ນຂະຫຍັນພຽນໃນແຕ່ລະມື້ ປະເມີນທຸກຄວາມຄິດ ແລະ ປຽບທຽບຂໍ້ພຣະຄຳພີຂໍ້ໜຶ່ງກັບຂໍ້ພຣະຄຳພີຂໍ້ອື່ນໆ. ດ້ວຍການຊ່ວຍເຫຼືອຈາກພຣະເຈົ້າ ທຸກໆຄົນສາມາດເຂົ້າໃຈຄວາມຈິງສຳລັບຕົວຂອງພວກເຂົາເອງ. GC 598.2 ມັນແມ່ນບ່ວງແຮ້ວຂອງຊາຕານທີ່ເຮັດໃຫ້ພວກເຮົາເຊື່ອວ່າ ພຣະຄຳພີແມ່ນເປັນເລື່ອງຍາກຫຼາຍສຳລັບພວກເຮົາທີ່ຈະເຂົ້າໃຈໄດ້. ພຣະຄຳພີຄວນໄດ້ຮັບການອະທິບາຍຄວາມໝາຍທີ່ຊັດເຈນ, ຍົກເວັ້ນການໃຊ້ສັນຍາລັກ ຫຼື ຕົວເລກ. ເມື່ອສັນຍາລັກ ຫຼື ຕົວເລກຖືກນຳມາໃຊ້ ການຄົ້ນຫາສຳລັບຂໍ້ຄວາມອື່ນໆ ທີ່ໃຊ້ສັນຍາລັກ ຫຼື ຕົວເລກນີ້ ແມ່ນຈະຖືກເປີດເຜີຍຄວາມໝາຍຂອງມັນເອງ. ມັນບໍ່ແມ່ນບັນດາອາຈານທີ່ມີຄວາມຮູ້ຫຼາຍກ່ຽວກັບພຣະຄຳພີ ແລະ ຄວາມຈິງຂອງພຣະເຈົ້າ ແຕ່ມັນແມ່ນບັນດາຜູ້ທີ່ຍອມຮັບການສັ່ງສອນຈາກພຣະເຈົ້າ ແລະ ໃຊ້ເວລາສຶກສາພຣະຄຳຂອງພຣະເຈົ້າເປັນປະຈຳ. ຈົ່ງອະທິຖານຂໍໃຫ້ພຣະວິນຍານບໍຣິສຸດນຳທາງທ່ານໃນຂະນະທີ່ທ່ານສຶກສາພຣະຄຳຂອງພຣະເຈົ້າ ເພື່ອທ່ານຈະໄດ້ເຂົ້າໃຈຢ່າງຖືກຕ້ອງເຖິງຄວາມຈິງ ແລະ ຄຳພະຍານທີ່ໄດ້ຮັບການເປີດເຜີຍໃນພຣະຄຳພີ. ພຣະເຢຊູຊົງສັນຍາວ່າ: "ແຕ່ພຣະຜູ້ຊ່ວຍຄື ພຣະວິນຍານບໍຣິສຸດເຈົ້າ ຜູ້ທີ່ພຣະບິດາເຈົ້າຈະໃຊ້ມາໃນນາມຂອງເຮົາ ອົງນັ້ນແຫລະ ຈະສັ່ງສອນພວກເຈົ້າທຸກສິ່ງ..." (ໂຢຮັນ 14:26) {GC 598.2, 599.3}
ພວກເຮົາກຳລັງດຳເນີນຊີວິດຢູ່ໃນຍຸກສຸດທ້າຍທີ່ໃກ້ຈະສິ້ນສຸດ. ຊາຕານຮູ້ວ່າ ມັນມີເວລາເຫຼືອໜ້ອຍທີ່ຈະຕໍ່ສູ້ພຣະເຈົ້າ ແລະ ປະຊາກອນຂອງພຣະອົງ. ຄວາມລອດຂອງພວກເຮົາ ແລະ ຄວາມລອດຂອງຄົນທີ່ຢູ່ອ້ອມຂ້າງພວກເຮົາແມ່ນຂຶ້ນຢູ່ກັບການຍອມຈຳນົນຕໍ່ພຣະເຈົ້າ. ພວກເຮົາຈະຕ້ອງຖ່ອມຕົວຂອງພວກເຮົາລົງຢູ່ຕໍ່ໜ້າອົງພຣະຜູ້ເປັນເຈົ້າ ດ້ວຍການອົດອາຫານ, ການອະທິຖານ ແລະ ສຶກສາພຣະຄຳຂອງພຣະເຈົ້າຢ່າງດຸໝັ່ນຂະຫຍັນພຽນ. ພວກເຮົາບໍ່ມີເວລາທີ່ຈະສູນເສຍອີກແລ້ວ. ເຫດການໃນຍຸກສຸດທ້າຍກຳລັງເກີດຂຶ້ນຢູ່ອ້ອມຮອບພວກເຮົາ ແລະ ກົດໝາຍວັນອາທິດກຳລັງຈະຖືກບັງຄັບໃຊ້ ແລະ ຊາຕານກຳລັງເຮັດທຸກສິ່ງທຸກຢ່າງເພື່ອທີ່ມັນຈະສາມາດນຳພາພວກເຮົາໃຫ້ຫຼົງຜິດ. ຢ່ານອນຫຼັບ ແຕ່ຈົ່ງດຸໝັ່ນຂະຫຍັນພຽນໃນການອະທິຖານ ແລະ ສຶກສາພຣະຄຳຂອງພຣະເຈົ້າ. {GC 601.1}
ຄົນເປັນຈຳນວນຫຼວງຫຼາຍຫຼອກລວງຕົນເອງວ່າ ພວກເຂົາເປັນຄຣິສຕຽນທີ່ດີ. ພວກເຂົາຮູ້ສຶກວ່າ ພວກເຂົາເປັນຄົນດີ. ແຕ່ພຣະເຈົ້າຊົງບັນລະຍາຍເຖິງຄົນເຫຼົ່ານັ້ນວ່າ "ເປັນພຽງອຸ່ນໆ" ແລະ ພຣະອົງກຳລັງຈະຄາຍພວກເຂົາອອກມາຈາກປາກຂອງພຣະອົງ ຍົກເວັ້ນແຕ່ພວກເຂົາຈະປ່ຽນແປງໃໝ່. (ພຣະນິມິດ 3:16) ຄົນເຫຼົ່ານັ້ນບໍ່ໄດ້ລະນຶກເຖິງວ່າ ມີການຕໍ່ສູ້ອັນໂຫດຮ້າຍຢູ່ເບື້ອງໜ້າ ແລະ ພວກເຂົາຈະຕ້ອງຕຽມຕົວໃຫ້ພ້ອມຢ່າງດຸໝັ່ນຂະຫຍັນພຽນ. ໃນບໍ່ຊ້ານີ້ ບັນດາຜູ້ທີ່ບໍ່ມີພື້ນຖານໃນພຣະຄຳຂອງພຣະເຈົ້າຈະຖືກກຳຈັດອອກຈາກປະຊາຊົນຂອງພຣະອົງ. {GC 601.2}
ອ້າງອີງຈາກປຶ້ມ "ປາຍທາງແຫ່ງຄວາມຫວັງ" (ສະບັບພາສາໄທ) {ວັກ 593.1-601.2} ຂຽນໂດຍ ທ່ານ ນາງ ເອເລັນ ຈີ. ໄວທ
ຂ່າວສານສຸດທ້າຍຂອງພຣະເຈົ້າທີ່ປະທານໃຫ້ແກ່ໂລກ
ຂ່າວສານສຸດທ້າຍຂອງພຣະເຈົ້າທີ່ປະທານໃຫ້ແກ່ໂລກ
"ພາຍຫຼັງເຫດການເຫຼົ່ານີ້ ຂ້າພະເຈົ້າກໍໄດ້ເຫັນທູດສະຫວັນອີກອົງໜຶ່ງລົງມາຈາກສະຫວັນ ທ່ານມີອຳນາດຍິ່ງໃຫຍ່ ແລະ ລັດສະໝີຂອງທ່ານໄດ້ເຮັດໃຫ້ແຜ່ນດິນໂລກສະຫວ່າງໄປ. ທ່ານໄດ້ຮ້ອງປະກາດສຽງແຮງກ້າຂຶ້ນວ່າ: "ບາບີໂລນມະຫານະຄອນຫຼົ້ມຈົມແລ້ວ ຫຼົ້ມຈົມແລ້ວ ກາຍເປັນບ່ອນອາໄສຂອງຜີປີສາດ ເປັນບ່ອນຄຸມຂັງຂອງຜີສົກກະປົກທຸກຢ່າງ ແລະ ເປັນຄອກຂອງນົກທຸກຊະນິດທີ່ບໍ່ສະອາດ ແລະ ໜ້າລັງກຽດ. ເພາະວ່າປະຊາຊາດທັງປວງໄດ້ດື່ມເຫຼົ້າອະງຸ່ນແຫ່ງຄວາມໂກດຮ້າຍໃນການລ່ວງປະເວນີຂອງນະຄອນນັ້ນ ແລະ ບັນດາກະສັດເທິງແຜ່ນດິນໂລກໄດ້ລ່ວງປະເວນີກັບນະຄອນນັ້ນ ແລະ ພໍ່ຄ້າທັງຫຼາຍແຫ່ງແຜ່ນດິນໂລກກໍໄດ້ຮັ່ງມີຂຶ້ນດ້ວຍຊັບອັນຟຸ່ມເຟືອຍຂອງນະຄອນນັ້ນ." ແລະ ຂ້າພະເຈົ້າໄດ້ຍິນສຽງອີກສຽງໜຶ່ງປະກາດມາຈາກສະຫວັນວ່າ: 'ຊົນຊາດຂອງເຮົາ, ຈົ່ງອອກມາຈາກນະຄອນນັ້ນເຖີດ ເພື່ອທ່ານທັງຫຼາຍຈະບໍ່ມີສ່ວນໃນການບາບຂອງນະຄອນນັ້ນ ແລະ ເພື່ອທ່ານຈະບໍ່ຕ້ອງຮັບໄພພິບັດທີ່ຈະເກີດແກ່ນະຄອນນັ້ນ'" (ພຣະນິມິດ 18:1-4 KJV)
ພຣະເຈົ້າຊົງສ້າງໂລກພາຍໃນຫົກມື້ ແລະ ໃນມື້ທີເຈັດ ພຣະອົງຊົງຕັ້ງໄວ້ໃຫ້ເປັນວັນບໍຣິສຸດທີ່ສຸດ ແລະ ສຳຄັນກວ່າມື້ໃດໆ. ມື້ທີເຈັດນີ້ ເປັນວັນພິເສດທີ່ພຣະເຈົ້າຊົງຕັ້ງໄວ້ສຳລັບພວກເຮົາເພື່ອທີ່ຈະນະມັດສະການພຣະອົງ. ໂດຍການນະມັດສະການໃນມື້ທີເຈັດນີ້ ພວກເຮົາໄດ້ໃຫ້ກຽດພຣະເຈົ້າຜູ້ທີ່ຊົງສ້າງຟ້າສະຫວັນ ແລະ ແຜ່ນດິນໂລກ. ແຕ່ວ່າຊາຕານບໍ່ຕ້ອງການໃຫ້ພວກເຮົານະມັດສະການພຣະເຈົ້າ ສະນັ້ນ ມັນຈຶ່ງພະຍາຍາມສ້າງວັນອື່ນໃນການນະມັດສະການ ເພື່ອມັນຈະສາມາດລັກເອົາກຽດທີ່ພຣະເຈົ້າສົມຄວນໄດ້ຮັບນັ້ນ. ຄຣິສຕະຈັກໂຣມັນຄາໂຕລິກໄດ້ຍົກຍໍຕົວເອງຂຶ້ນເໜືອພຣະເຈົ້າ ແລະ ໄດ້ປ່ຽນວັນນະມັດສະການຈາກມື້ທີເຈັດທີ່ໄດ້ກຳນົດໄວ້ໃນພຣະຄຳພີໃຫ້ເປັນມື້ທີໜຶ່ງໃນສັບປະດາ. ທົ່ວໂລກໄດ້ຕິດຕາມການປະຕິບັດເຊັ່ນນີ້ ໂດຍບໍ່ຮູ້ວ່າວັນນັ້ນບໍ່ແມ່ນວັນສັກສິດ. ແຕ່ພຣະເຈົ້າເອີ້ນພວກເຮົາໃຫ້ມານະມັດສະການພຣະອົງໃນມື້ນະມັດສະການພຣະອົງ ພຣະເຈົ້າຕ້ອງການໃຫ້ພວກເຮົາລະນຶກເຖິງພຣະອົງຊົງເປັນພຣະເຈົ້າຂອງພວກເຮົາ. ມີພຽງບັນດາຜູ້ທີ່ໃຫ້ກຽດພຣະອົງ ແລະ ຖວາຍກຽດໃນວັນບໍຣິສຸດຂອງພຣະອົງເທົ່ານັ້ນທີ່ຈະໄດ້ຮັບຄວາມລອດໃນຍຸກສຸດທ້າຍ.
ພຣະຄຳພີໄດ້ບອກພວກເຮົາວ່າ ບັນດາຜູ້ທີ່ນະມັດສະການວັນອາທິດຈະໄດ້ຮັບເຄື່ອງໝາຍຂອງສັດຮ້າຍ ແລະ ຮູບຈຳລອງຂອງມັນ. ແຕ່ຜູ້ໃດທີ່ໃຫ້ກຽດວັນເສົາວັນຊະບາໂຕເຊິ່ງເປັນວັນບໍຣິສຸດຂອງພຣະເຈົ້າ ຈະໄດ້ຮັບຕາປະທັບຂອງພຣະເຈົ້າ ແລະ ໄດ້ຮັບຄວາມລອດ.
ຄຣິສຕະຈັກໂຣມັນຄາໂຕລິກກຳລັງຊຸກຍູ້ໃຫ້ທຸກຄົນທົ່ວໂລກຖືຮັກສາວັນຊະບາໂຕຈອມປອມ. ແຕ່ປະຊາຊົນຂອງພຣະເຈົ້າຕ້ອງເຕືອນທຸກໆຄົນທີ່ຖືຮັກສາວັນຊະບາໂຕທີ່ຈອມປອມນີ້. ໃນອະດີດ ປະຊາຊົນໄດ້ອອກຈາກຄຣິສຕະຈັກໂຣມັນຄາໂຕລິກ ເພື່ອຕິດຕາມຫຼັກຄຳສອນຂອງພຣະຄຳພີ ແລະ ໄດ້ກໍ່ຕັ້ງເປັນບັນດາຄຣິສຕະຈັກໂປຣແຕສແຕນ. ແຕ່ປະຊາຊົນໃນຄຣິສຕະຈັກໂປຣແຕສແຕນໃນຍຸກນີ້ມີການປ່ຽນແປງ ແລະ ບໍ່ໄດ້ຕິດຕາມຫຼັກຄຳສອນຂອງພຣະຄຳພີເໝືອນກັບບັນພະບູລຸດຂອງພວກເຂົາທີ່ໄດ້ຕິດຕາມ. ເຖິງແມ່ນວ່າ ບັນດາຄຣິສຕະຈັກໂປຣແຕສແຕນສ່ວນຫຼາຍອ້າງວ່າຕິດຕາມພຣະຄຳພີ ແຕ່ພວກເຂົາໄດ້ປະຕິເສດການໃຫ້ກຽດວັນຊະບາໂຕທີ່ແທ້ຈິງ ແລະ ພວກເຂົາໄດ້ຕິດຕາມວັນຊະບາໂຕທີ່ຈອມປອມ ເຊິ່ງຄຣິສຕະຈັກໂຣມັນຄາໂຕລິກໄດ້ສ້າງຕັ້ງຂຶ້ນ. ໃນການຖວາຍກຽດໃຫ້ວັນຊະບາໂຕທີ່ຈອມປອມນີ້ ບັນດາຄຣິສຕະຈັກໂປຣແຕສແຕນໄດ້ກັບຄືນໄປຫາຄຣິສຕະຈັກໂຣມັນຄາໂຕລິກ ເຊິ່ງເປັນຄຣິສຕະຈັກທີ່ບັນພະບູລຸດຂອງພວກເຂົາໄດ້ແຍກຕົວອອກມາ ແລະ ຕອນນີ້ບັນດາຄຣິສຕະຈັກໂປຣແຕສແຕນໄດ້ກາຍເປັນລູກສາວຂອງຄຣິສຕະຈັກໂຣມັນຄາໂຕລິກ. (ພຣະນິມິດ 17:5) ບັນດາຄຣິສຕະຈັກໂປຣແຕສແຕນໄດ້ກາຍເປັນຍິງໂສເພນີ ແລະ ແມ່ຂອງພວກເຂົາແມ່ນບາບີໂລນ ເຊິ່ງໝາຍເຖິງຄຣິສຕະຈັກໂຣມັນຄາໂຕລິກ. ແຕ່ພຣະເຈົ້າຍັງມີປະຊາຊົນຂອງພຣະອົງຢູ່ໃນຄຣິສຕະຈັກເຫຼົ່ານັ້ນຜູ້ທີ່ປາຖະໜາຈະຕິດຕາມພຣະເຈົ້າຢ່າງແທ້ຈິງ. ນີ້ເປັນເຫດຜົນທີ່ພຣະເຈົ້າເອີ້ນປະຊາຊົນຂອງພຣະອົງອອກມາຈາກບາບີໂລນ. (ໃນພຣະນິມິດບົດທີ 18) ເພື່ອພວກເຂົາຈະໄດ້ຮັບຄວາມລອດ ແລະ ບໍ່ໄດ້ຮັບເຄື່ອງໝາຍຂອງສັດຮ້າຍ. (ໃນພຣະນິມິດບົດທີ 14)
ນີ້ແມ່ນຂ່າວສານສຸດທ້າຍທີ່ຈະຕ້ອງປະກາດກ່ອນພຣະເຢຊູຈະສະເດັດກັບມາຄັ້ງທີສອງ. ໃນໄວໆນີ້ ປະຊາຊົນທົ່ວໂລກຈະຕ້ອງຕັດສິນໃຈເລືອກ ເພາະໃນໄວໆນີ້ຜູ້ນຳຂອງໂລກຈະບັງຄັບທຸກໆຄົນໃຫ້ຖືຮັກສາວັນອາທິດ. (ພຣະນິມິດ 13:16) ແລະ ທຸກຄົນທີ່ປະຕິເສດການຖືຮັກສາວັນອາທິດຈະໄດ້ຮັບໂທດທາງກົດໝາຍບ້ານເມືອງ ແລະ ໃນທີ່ສຸດກໍຈະຖືກກ່າວຫາວ່າ ເປັນຜູ້ສົມຄວນຕາຍ. {GC 603.2, 604.2}
ທຸກໆຄົນຕ້ອງມີຄວາມຮ້ອນຮົນໃນຄວາມຂັດແຍ້ງທີ່ກຳລັງຈະເກີດຂຶ້ນນີ້. ພຣະຄຳພີໄດ້ບອກໄວ້ຢ່າງຊັດເຈນວ່າ ຜູ້ໃດທີ່ລ່ວງລະເມີດພຣະບັນຍັດຂອງພຣະເຈົ້າ ເພື່ອໄປປະຕິບັດຕາມຂໍ້ກຳນົດຂອງມະນຸດ ຈະໄດ້ຮັບເຄື່ອງໝາຍຂອງສັດຮ້າຍ. "ຖ້າໃຜບູຊາສັດຮ້າຍ ແລະ ຮູບຂອງມັນ ແລະ ຮັບເຄື່ອງໝາຍຂອງມັນໄວ້ທີ່ໜ້າຜາກ ຫຼື ທີ່ມືຂອງເຂົາ. ຄົນນັ້ນຈະຕ້ອງດື່ມເຫຼົ້າອະງຸ່ນແຫ່ງຄວາມໂກດຮ້າຍຂອງພຣະເຈົ້າທີ່ຖອກລົງໃນຈອກແຫ່ງຄວາມໂກດຮ້າຍຂອງພຣະອົງໂດຍບໍ່ປົນກັບສິ່ງໃດ" (ພຣະນິມິດ 14:9,10 THSV11) ແລະ ທຸກຄົນຜູ້ທີ່ຮັບເຄື່ອງໝາຍຂອງສັດຮ້າຍຈະໄດ້ຮັບໂທດຈາກຄວາມໂກດຮ້າຍຂອງພຣະເຈົ້າ ເຊິ່ງເປັນໄພພິບັດທີ່ພຣະເຈົ້າຈະຖອກເທເທິງແຜ່ນດິນໂລກ. {GC 605.1}
ແຕ່ພຣະເຈົ້າຈະບໍ່ຖອກເທໄພພິບັດລົງມາ ຈົນກວ່າທຸກໆຄົນຈະໄດ້ຮັບຄຳເຕືອນ ແລະ ມີໂອກາດທີ່ຈະເລືອກປະຕິບັດຕາມພຣະບັນຍັດຂອງພຣະເຈົ້າ ຫຼື ຂໍ້ກຳນົດຂອງມະນຸດ. ວັນຊະບາໂຕຈະເປັນເຄື່ອງທົດສອບຄວາມຈົ່ງຮັກພັກດີ. ບັນດາຜູ້ທີ່ຈົ່ງຮັກພັກດີຕໍ່ພຣະເຈົ້າຈະຖືຮັກສາມື້ທີເຈັດເຊິ່ງເປັນວັນຊະບາໂຕ. ໃນທາງກົງກັນຂ້າມ ຄົນອື່ນໆຈະສຳແດງຄວາມຈົ່ງຮັກພັກດີຂອງພວກເຂົາຕໍ່ມະນຸດແລະຊາຕານ ໂດຍການຖືຮັກສາວັນອາທິດໃຫ້ເປັນວັນຊະບາໂຕຕາມກົດໝາຍຂອງລັດຖະບານ. {GC 605.2}
ໃນແຕ່ລະຍຸກສະໄໝ ພຣະເຈົ້າໄດ້ສັ່ງຜູ້ຮັບໃຊ້ຂອງພຣະອົງໃຫ້ໄປເຕືອນເລື່ອງຄວາມບາບທົ່ວທັງໂລກ ແລະ ຄຣິສຕະຈັກ. ປັດຈຸບັນນີ້ ຜູ້ຮັບໃຊ້ຂອງພຣະເຈົ້າກຳລັງອອກໄປເຕືອນເລື່ອງຄວາມບາບຂອງຄຣິສຕະຈັກ ແລະ ສຳແດງໃຫ້ເຫັນວ່າ ພຣະຄຳຂອງພຣະເຈົ້າໄດ້ກ່າວກ່ຽວກັບເລື່ອງຄວາມຂັດແຍ້ງທີ່ກຳລັງຈະເກີດຂຶ້ນ. ດັ່ງນັ້ນ ຂ່າວສານຂອງທູດສະຫວັນອົງທີສາມຢູ່ໃນພຣະນິມິດບົດທີ 14 ແລະ ຂ່າວສານຂອງທູດສະຫວັນຢູ່ໃນພຣະນິມິດບົດທີ 18 ຈະຕ້ອງໄດ້ປະກາດອອກໄປທົ່ວໂລກ. ບັນດາຜູ້ທີ່ມີຄວາມເຊື່ອ ແລະ ອະທິຖານຈະຖືກກະຕຸ້ນໃຫ້ອອກໄປ ແລະ ປະກາດຂ່າວສານຂອງພຣະເຈົ້າຕໍ່ປະຊາຊົນ. ແລະຄືກັນກັບສະໄໝຂອງພຣະເຢຊູ ຜູ້ນຳຂອງຄຣິສຕະຈັກຈະເຕັມໄປດ້ວຍຄວາມໂກດຮ້າຍໃນຂະນະທີ່ພວກເຂົາເຫັນສາຍຕາຍຂອງປະຊາຊົນເລີ່ມເປີດໃຫ້ເຫັນການຫຼົງຜິດທີ່ພວກເຂົາຖືກສອນມາຕັ້ງແຕ່ດົນນານແລ້ວ. {GC 606.1}
ອ້າງອີງຈາກປຶ້ມ "ພຣະຄຳພີ" ພຣະນິມິດ 17:5; 13:16; ບົດທີ 18 ແລະ 14.
ອ້າງອີງຈາກປຶ້ມ "ປາຍທາງແຫ່ງຄວາມຫວັງ" (ສະບັບພາສາໄທ) {ວັກ 603.2-606.1} ຂຽນໂດຍ ທ່ານ ນາງ ເອເລັນ ຈີ. ໄວທ
ວັນຊະບາໂຕຈອມປອມ
ວັນຊະບາໂຕຈອມປອມ
ໃນຂະນະທີ່ປະຊາຊົນສຶກສາຂ່າວສານຂອງພຣະເຈົ້າ ຊາຕານກໍໂກດຮ້າຍ. ຊາຕານປຸກລະດົມຜູ້ນຳສາສະໜາໃຫ້ຕໍ່ຕ້ານຂ່າວສານຂອງພຣະເຈົ້າ ແລະ ຜູ້ຮັບໃຊ້ຂອງພຣະອົງ. ຜູ້ນຳສາສະໜາຈະອອກໄປ ແລະ ຂໍຄວາມຊ່ວຍເຫຼືອຈາກລັດຖະບານ ເພື່ອບັງຄັບໃຫ້ປະຊາຊົນຖືຮັກສາວັນອາທິດເປັນວັນຊະບາໂຕ. ແລະ ຈະມີການນຳກົດໝາຍມາໃຊ້ຕໍ່ຕ້ານຜູ້ທີ່ບໍ່ຖືຮັກສາວັນອາທິດ. ປະຊາຊົນຈະຖືກຂົ່ມເຫັງໂດຍການຖືກປັບໂທດ, ຖືກຕິດຄຸກ ຫຼື ບາງຄົນຈະໄດ້ຮັບຂໍ້ສະເໜີລາງວັນ ແລະ ຜົນປະໂຫຍດອື່ນໆ ເພື່ອເປັນເຄື່ອງຈູງໃຈໃຫ້ປະຖິ້ມຄວາມເຊື່ອໃນພຣະຄຳພີ. {GC 607.1}
ແຕ່ບັນດາຜູ້ຄົນທີ່ຕິດຕາມພຣະເຈົ້າຢ່າງແທ້ຈິງຈະຕອບວ່າ: "ຈົ່ງໃຊ້ພຣະຄຳຂອງພຣະເຈົ້າບອກຄວາມຜິດຂອງເຮົາ." ແຕ່ບໍ່ມີຜູ້ໃດສາມາດເອົາພຣະຄຳຂອງພຣະເຈົ້າມາຕອບຄຳຖາມຂອງພວກເຂົາໄດ້. ປະຊາຊົນຂອງພຣະເຈົ້າບາງຄົນຈະຖືກນຳຕົວໄປຂຶ້ນສານ. ຢູ່ທີ່ນັ້ນ ພວກເຂົາຈະສາມາດເປັນພະຍານເລື່ອງພຣະເຈົ້າໃຫ້ແກ່ຜູ້ຄົນທີ່ຍັງບໍ່ມີທາງທີ່ຈະຮູ້ຄວາມຈິງເທື່ອ. {GC 607.1}
ບັນດາຜູ້ທີ່ເຊື່ອຟັງພຣະຄຳຂອງພຣະເຈົ້າຈະຖືກເບິ່ງວ່າ ເປັນຄົນກະບົດ. ພວກເຂົາຈະຖືກປະຖິ້ມຈາກຄອບຄົວ ແລະ ໝູ່ເພື່ອນ. ບາງຄົນທີ່ປະຕິເສດການໃຫ້ກຽດວັນອາທິດເປັນວັນສະບາໂຕກໍຈະຖືກຕິດຄຸກ, ບາງຄົນກໍຈະຖືກຂັບໄລ່, ຄົນອື່ນໆຈະຖືກປະຕິບັດເໝືອນເປັນຂ້າທາດ. {GC 608.1}
"ແທ້ຈິງ ບັນດາຄົນທີ່ປາຖະໜາຈະດຳເນີນຊີວິດຄຣິສຕຽນ ເປັນຄົນນັບຖືພຣະເຈົ້າຢ່າງຖືກຕ້ອງ ກໍຈະຖືກກົດຂີ່ຂົ່ມເຫັງ" (2 ຕີໂມທຽວ 3:12)
ອ້າງອີງຈາກປຶ້ມ "ປາຍທາງແຫ່ງຄວາມຫວັງ" (ສະບັບພາສາໄທ) {ວັກ 607.1; 608.1} ຂຽນໂດຍ ທ່ານ ນາງ ເອເລັນ ຈີ. ໄວທ
ຜົນດີຂອງການອາໄສຢູ່ໃນຊົນນະບົດ
ຜົນດີຂອງການອາໄສຢູ່ໃນຊົນນະບົດ
ເມື່ອໃດທີ່ລະບອບການປົກຄອງຂອງສັນຕະປາປາອອກຄຳສັ່ງບັງຄັບໃຊ້ວັນອາທິດເປັນວັນຊະບາໂຕ ເມື່ອນັ້ນກໍຈະເປັນສັນຍານເຕືອນສຳລັບພວກເຮົາ. ມັນເປັນເວລາທີ່ພວກເຮົາຈະຕ້ອງອອກຈາກຕົວເມືອງໃຫຍ່ ຕຽມຕົວສຳລັບການອອກໄປຈາກເມືອງນ້ອຍໄປຍັງບ້ານທີ່ພວກເຮົາຈະຢູ່ໃນຊ່ວງທີ່ເຫຼືອຂອງຊີວິດເຮົາຢູ່ໃນສະຖານທີ່ງຽບສະຫງົບທ່າມກາງພູເຂົາ. {5T 464, 465}
ພຣະເຈົ້າຊົງເອີ້ນປະຊາຊົນຂອງພຣະອົງໃນປັດຈຸບັນນີ້ໃຫ້ອອກຈາກຕົວເມືອງ. ໃນຕົວເມືອງເຕັມໄປດ້ວຍຄວາມຊົ່ວຮ້າຍ ແລະ ການລໍ້ລວງ ແລະ ບັນດາຜູ້ທີ່ຍັງຄົງອາໄສຢູ່ໃນຕົວເມືອງຕ່າງໆ ຈະສູນເສຍຄອບຄົວຂອງພວກເຂົາ ແລະ ບາງທີ່ອາດເປັນໄປໄດ້ທີ່ພວກເຂົາເອງຈະຖືກລໍ້ລວງໂດຍສິ່ງຕ່າງໆທີ່ຢູ່ອ້ອມຂ້າງພວກເຂົາ.
ຜູ້ປະກາດພຣະຄຳທ່ານນາງເອເລັນ ຈີ. ໄວທ ຍັງໄດ້ເຕືອນພວກເຮົາອີກວ່າ ຄວາມຊົ່ວຮ້າຍຢູ່ໃນຕົວເມືອງເພີ່ມຫຼາຍຂຶ້ນ ດັ່ງນັ້ນ ໄພພິບັດກໍຈະເພີ່ມຫຼາຍຂຶ້ນຕາມສົມສ່ວນ. ໃນໄວໆນີ້ ເມືອງຕ່າງໆຈະຖືກທຳລາຍ ແລະ ໄພພິບັດທີ່ໜ້າຢ້ານກົວຈະເກີດຂຶ້ນຢູ່ໃນເມືອງຕ່າງໆ.
ໃນຄວາມເມດຕາຂອງພຣະເຈົ້າ ພຣະອົງໄດ້ສົ່ງຄຳເຕືອນໃຫ້ພວກເຮົາອອກໄປຈາກຕົວເມືອງ ເພາະພຣະອົງຊົງຮູ້ເຖິງຜົນຂອງຄວາມໜ້າຢ້ານກົວທີ່ຈະເກີດຂຶ້ນກັບພວກເຮົາ ຖ້າພວກເຮົາຍັງຄົງອາໄສຢູ່ໃນຕົວເມືອງ. ພວກເຮົາຈະຟັງຄຳແນະນຳຂອງພຣະເຈົ້າບໍ? {LDE 111}
ພວກເຮົາຈະປະກາດຂ່າວປະເສີດຢູ່ໃນຕົວເມືອງໄດ້ແນວໃດ ຖ້າພວກເຮົາບໍ່ອາໄສຢູ່ໃນຕົວເມືອງ? ພຣະເຈົ້າສັ່ງໃຫ້ພວກເຮົາມີໂບດຢູ່ໃນຕົວເມືອງ ແຕ່ສະຖາບັນໃຫຍ່ ບໍ່ວ່າຈະເປັນໂຮງພິມ, ໂຮງຮຽນ, ໂຮງໝໍ ແລະ ອື່ນໆເປັນຕົ້ນ, ຄວນຈະຕັ້ງຢູ່ນອກເມືອງ. {2SM 358}
ອ້າງອີງຈາກປຶ້ມ “Testimonies for the Church” {5T 464, 465} ແລະ ປຶ້ມ “Last Day Events” {LDE 111} ແລະ ປຶ້ມ “Selected Messages.” {2SM 358} ຂຽນໂດຍ ທ່ານ ນາງ ເອເລັນ ຈີ. ໄວທ
ເວລາສັ້ນໆຂອງບັນຫາ
ເວລາສັ້ນໆຂອງບັນຫາ
"ເຫດທີ່ພວກເຮົາເຮັດວຽກຢ່າງໜັກໜ່ວງ ແລະ ອົດສາສູ້ ເພາະວ່າ ພວກເຮົາໄດ້ໄວ້ວາງໃຈໃນພຣະເຈົ້າ ຜູ້ຊົງພຣະຊົນຢູ່, ຜູ້ຊົງໂຜດໃຫ້ພົ້ນຂອງທຸກຄົນ ແລະ ໂດຍສະເພາະແລ້ວຂອງພວກຄົນທີ່ເຊື່ອໃນພຣະອົງ" (1 ຕີໂມທຽວ 4:10)
ໃນຂະນະທີ່ການກົດຂີ່ຂົ່ມເຫັງເກີດຂຶ້ນ ບັນດາຜູ້ທີ່ເຊື່ອໃນຄວາມຈິງ ແຕ່ຍັງບໍ່ໄດ້ກະກຽມຕົວເອງໂດຍການອະທິຖານ ແລະ ສຶກສາພຣະຄຳພີ ພວກເຂົາຈະຢ້ານຕໍ່ຄວາມຂັດແຍ້ງນີ້ ແລະ ຈະປະຖິ້ມບັນດາພີ່ນ້ອງຜູ້ທີ່ເຊື່ອ ແລະ ພວກເຂົາຈະເຂົ້າຮ່ວມກັບຝ່າຍໂລກ. ພວກເຂົາຈະກາຍເປັນສັດຕູທີ່ໂຫດຮ້າຍທີ່ສຸດ. ເພື່ອຮັກສາຄວາມປອດໄພ ແລະ ຄວາມສະດວກສະບາຍຂອງພວກເຂົາເອງ ພວກເຂົາຈະບິດເບືອນຄວາມຈິງ ແລະ ຈະກ່າວໂທດໃສ່ປະຊາຊົນຂອງພຣະເຈົ້າ. ພວກເຂົາຈະເປັນພະຍານບໍ່ຈິງ ແລະ ເວົ້າເອົາໃຈຜູ້ນຳ ເພື່ອມາຕໍ່ສູ້ປະຊາຊົນຂອງພຣະເຈົ້າ. {GC 608.2}
ໃນຊ່ວງເວລາແຫ່ງການກົດຂີ່ຂົ່ມເຫັງນີ້ ຄວາມເຊື່ອຂອງປະຊາຊົນຂອງພຣະເຈົ້າຈະຖືກທົດລອງ. ກ່ອນໜ້ານີ້ ພຣະເຈົ້າຊົງໄດ້ໃຫ້ຈິດໃຈຂອງພວກເຂົາກ້າວເຂົ້າສູ່ການປະກາດຂ່າວປະເສີດ. ຕອນນີ້ ພວກເຂົາໄດ້ຮັບຄວາມທຸກທໍລະມານ ເພາະເປັນພະຍານເພື່ອພຣະເຈົ້າ. ຂະນະທີ່ຝ່າຍຕໍ່ຕ້ານເພີ່ມຄວາມຮຸນແຮງຫຼາຍຂຶ້ນ ປະຊາຊົນຂອງພຣະເຈົ້າກໍມຶນງົງ. ພວກເຂົາຮູ້ສຶກວ່າ ພວກເຂົາເປັນຜູ້ນຳພາບັນຫາເຫຼົ່ານີ້ມາ ແຕ່ຈິດໃຕ້ສຳນຶກຜິດຊອບຂອງພວກເຂົາ ແລະ ພຣະຄຳຂອງພຣະເຈົ້າໄດ້ຊ່ວຍໃຫ້ພວກເຂົາໝັ້ນໃຈວ່າ ພວກເຂົາຢູ່ໃນເສັ້ນທາງທີ່ຖືກຕ້ອງແລ້ວ. ພວກເຂົາບໍ່ກ້າຫຍຸ້ງກ່ຽວກັບພຣະຄຳຂອງພຣະເຈົ້າ ເພື່ອເຫັນແກ່ເປັນທີ່ພໍໃຈຂອງຄົນທົ່ວໂລກ. {GC 608.3}
ອ້າງອີງຈາກປຶ້ມ "ປາຍທາງແຫ່ງຄວາມຫວັງ" (ສະບັບພາສາໄທ) {ວັກ 608.2,3} ຂຽນໂດຍ ທ່ານ ນາງ ເອເລັນ ຈີ. ໄວທ
ເຄື່ອງໝາຍຂອງສັດຮ້າຍ
ເຄື່ອງໝາຍຂອງສັດຮ້າຍ
"ມັນຍັງເຮັດໃຫ້ຄົນທັງປວງ ທັງນ້ອຍ ແລະ ໃຫຍ່, ທັງຮັ່ງມີ ແລະ ຍາກຈົນ, ທັງເສລີ ແລະ ຂ້ອຍຂ້າ ໄດ້ຮັບເຄື່ອງໝາຍໄວ້ທີ່ມືຂວາ ຫຼື ທີ່ໜ້າຜາກຂອງພວກເຂົາ..." ພຣະນິມິດ 13:16
ເມື່ອໃດທີ່ແສງສະຫວ່າງແຫ່ງຄວາມຈິງກ່ຽວກັບເລື່ອງວັນຊະບາໂຕໃນພຣະຄຳພີໄດ້ເຂົ້າເຖິງທຸກຄົນແລ້ວ ຖ້າວ່າພວກເຂົາຍັງຄົງສືບຕໍ່ຢຶດຖືວັນຊະບາໂຕທີ່ຈອມປອມ ແລະ ປະຕິເສດການຮັກສາວັນຊະບາໂຕໃນພຣະຄຳພີ ເມື່ອນັ້ນພວກເຂົາຈະໄດ້ຮັບເຄື່ອງໝາຍຂອງສັດຮ້າຍ. ເມື່ອພວກເຂົາເຊື່ອຟັງຄຳສັ່ງຂອງລັດຖະບານທີ່ຈະຢຸດວຽກໃນວັນອາທິດ ແລະ ນະມັດສະການພຣະເຈົ້າ ເຖິງແມ່ນພວກເຂົາຈະຮູ້ວ່າ ພຣະຄຳຂອງພຣະເຈົ້າສຳແດງໃຫ້ເຫັນແລ້ວວ່າວັນເສົາເປັນວັນຊະບາໂຕທີ່ແທ້ຈິງ ພວກເຂົາກໍຍິນຍອມທີ່ຈະຮັບເຄື່ອງໝາຍຂອງສັດຮ້າຍ ແລະ ປະຕິເສດຕາປະທັບຂອງພຣະເຈົ້າ.
ອ້າງອີງຈາກປຶ້ມ "ພຣະຄຳພີ" ພຣະນິມິດ 13:16.
ບັນຫາກ່ຽວກັບການຊື້ ແລະ ການຂາຍ
ບັນຫາກ່ຽວກັບການຊື້ ແລະ ການຂາຍ
"ເພື່ອບໍ່ໃຫ້ຜູ້ໃດຊື້ ຫຼື ຂາຍໄດ້ ເວັ້ນໄວ້ແຕ່ຜູ້ທີ່ມີເຄື່ອງໝາຍນັ້ນ ເຊິ່ງເປັນຊື່ຂອງສັດຮ້າຍ ຫຼື ເລກທີ່ໝາຍເຖິງຊື່ມັນນັ້ນ" (ພຣະນິມິດ 13:17)
ຄົນຊົ່ວຮ້າຍຈະມາຢູ່ອ້ອມຮອບປະຊາຊົນຂອງພຣະເຈົ້າ, ຈະເຍາະເຍີຍ, ແລະ ຈະຂົ່ມຂູ່ທຳຮ້າຍພວກເຂົາ. ຄົນຊົ່ວຮ້າຍຈະເຍາະເຍີຍຄວາມອ່ອນແອ, ຈະຫົວຂວັນຈຳນວນປະຊາຊົນຂອງພຣະເຈົ້າທີ່ໜ້ອຍ ແລະ ຈະເວົ້າໝິ່ນປະໝາດພວກເຂົາຢ່າງເຈັດປວດໃຈ. ຄົນຊົ່ວຮ້າຍຈະຕັດຊັບສິນຂອງພວກເຂົາເພື່ອບໍ່ໃຫ້ຊື້ ຫຼື ຂາຍໄດ້. ແຕ່ປະຊາຊົນຂອງພຣະເຈົ້າຈະອ້າງພຣະສັນຍາອັນແນ່ນອນຂອງພຣະເຈົ້າ ພ້ອມທັງຮ້ອງໄຫ້ ແລະ ອະທິຖານເພື່ອວ່າ ພຣະເຈົ້າຈະຊົງຮັກສາພວກເຂົາໄວ້.
"ແລ້ວພວກເຈົ້າກໍຈະປອດໄພ; ພວກເຈົ້າຈະໝັ້ນຄົງດັ່ງຢູ່ໃນປ້ອມປ້ອງກັນອັນເຂັ້ມແຂງ. ພວກເຈົ້າຈະມີອາຫານກິນ ແລະ ຈະມີນ້ຳດື່ມ" (ເອຊາຢາ 33:16)
ເຖິງແມ່ນວ່າ ພຣະເຈົ້າຊົງສັນຍາວ່າພຣະອົງຈະຈັດຕຽມໃຫ້ພວກເຮົາ ພຣະອົງຍັງສັ່ງພວກເຮົາໃຫ້ຮ່ວມມືກັບພຣະອົງ. ພຣະອົງປາຖະໜາໃຫ້ພວກເຮົາອາໄສຢູ່ໃນຊົນນະບົດ ເພື່ອພວກເຮົາສາມາດປູກອາຫານຂອງພວກເຮົາເອງໄດ້. ມັນເປັນສິ່ງສຳຄັນທີ່ຈະຕ້ອງຮູ້ຈັກການຝຶກປູກອາຫານຂອງພວກເຮົາ ເພື່ອກະກຽມໃນເວລາທີ່ພວກເຮົາຈະບໍ່ສາມາດເຮັດການຊື້ຂາຍໄດ້.
ອ້າງອີງຈາກປຶ້ມ "ພຣະຄຳພີ" ພຣະນິມິດ 13:17; ເອຊາຢາ 33:16.
“ຈົ່ງລະນຶກເຖິງວັນສະບາໂຕ, ຖືເປັນວັນບໍລິສຸດ. ຈົ່ງເຮັດການງານທັງໝົດຂອງເຈົ້າຫົກມື້. ແຕ່ມື້ທີເຈັດນັ້ນ ເປັນສະບາໂຕຂອງພຣະເຢໂຮວາ ພຣະເຈົ້າຂອງເຈົ້າ, ໃນມື້ນັ້ນ ຢ່າເຮັດການງານໃດໆ ບໍ່ວ່າເຈົ້າເອງ ຫຼື ລູກຊາຍ, ລູກສາວຂອງເຈົ້າ ຫຼື ຄົນຮັບໃຊ້ຂອງເຈົ້າ ຫຼື ສັດໃຊ້ແຮງງານຂອງເຈົ້າ ຫຼື ແຂກທີ່ອາໄສຢູ່ໃນປະຕູເມືອງຂອງເຈົ້າ. ເພາະໃນຫົກມື້ ພຣະເຢໂຮວາຊົງສ້າງຟ້າສະຫວັນ ແລະ ແຜ່ນດິນໂລກ, ທະເລ ແລະ ຊັບພະສິ່ງ ເຊິ່ງມີຢູ່ໃນທີ່ເຫຼົ່ານັ້ນ, ແຕ່ໃນມື້ທີເຈັດຊົງພັກ, ເພາະສະນັ້ນ ພຣະເຢໂຮວາຊົງອວຍພຣະພອນວັນສະບາໂຕ ແລະ ຊົງຕັ້ງມື້ນັ້ນໄວ້ເປັນວັນບໍລິສຸດ.” ອົບພະຍົບ 20:8-11
ການປະທັບກາຂອງພຣະເຈົ້າ
ການປະທັບກາຂອງພຣະເຈົ້າ
ເມື່ອເຫັນໄດ້ຢ່າງຊັດເຈນແລ້ວວ່າ ຜູ້ໃດທີ່ຕັດສິນໃຈຮັກສາພຣະບັນຍັດຂອງພຣະເຈົ້າຄືຮັກສາວັນເສົາເຊິ່ງເປັນວັນຊະບາໂຕ ແລະ ຜູ້ໃດທີ່ຮັກສາກົດໝາຍຂອງມະນຸດຄື ຍອມຮັບກົດໝາຍວັນອາທິດ. ຫຼັງຈາກນັ້ນ ພຣະເຢຊູຈະສັ່ງໃຫ້ທູດສະຫວັນລົງມາປະທັບກາປະຊາຊົນຂອງພຣະອົງ. ທູດສະຫວັນອົງນັ້ນຖືຕາປະທັບຂອງພຣະເຈົ້າ ແລະ ໄດ້ມາຫາທູດສະຫວັນສີ່ອົງທີ່ຢືນຢູ່ສີ່ທິດຂອງແຜ່ນດິນໂລກ ທີ່ຫ້າມລົມທັງສີ່ທິດໄວ້ບໍ່ໃຫ້ພັດມາໃສ່ແຜ່ນດິນ, ໃສ່ທະເລ, ຫລືໃສ່ຕົ້ນໄມ້ໃດໆ. ທູດສະຫວັນອົງນັ້ນຈະກ່າວແກ່ທູດສະຫວັນທັງສີ່ທິດນັ້ນວ່າ: "ຢ່າເຮັດອັນຕະລາຍແກ່ແຜ່ນດິນ, ແກ່ທະເລ, ຫລືຕົ້ນໄມ້ ຈົນກວ່າເຮົາຈະປະທັບກາໄວ້ທີ່ໜ້າຜາກບັນດາຜູ້ຮັບໃຊ້ຂອງພຣະເຈົ້າຂອງເຮົາເສຍກ່ອນ… ຈຳນວນຂອງຜູ້ທີ່ໄດ້ຮັບປະທັບກາມີ 144,000 ຄົນ” (ພຣະນິມິດ 7:4) {GC 613.2}
ໃນຂະນະທີ່ປະຊາຊົນຍັງມີໂອກາດທີ່ຈະເລືອກ ພຣະເຈົ້າບໍ່ອະນຸຍາດໃຫ້ຊາຕານຄວບຄຸມຄົນຊົ່ວຮ້າຍ ແລະ ທຳມະຊາດຢ່າງເຕັມທີ່. ດັ່ງທີ່ພຣະທຳພຣະນິມິດ 7:1 "ທູດສະຫວັນສີ່ອົງຢືນຢູ່ໃນທິດທັງສີ່ຂອງແຜ່ນດິນໂລກ ຫ້າມລົມທັງສີ່ທິດບໍ່ໃຫ້ພັດໃສ່ແຜ່ນດິນ ຫຼື ໃສ່ທະເລ ຫຼື ໃສ່ຕົ້ນໄມ້ໃດໆ." ແຕ່ເມື່ອທຸກຄົນໄດ້ເລືອກຝ່າຍທີ່ພວກເຂົາໄດ້ຢູ່ແລ້ວ ເມື່ອນັ້ນພຣະເຈົ້າຈະຖອນການປົກປ້ອງຂອງພຣະອົງອອກຈາກແຜ່ນດິນໂລກ ແລະ ຈະປົກປ້ອງປະຊາຊົນທີ່ເຫຼືອຢູ່ ຄືຜູ້ທີ່ມີຄວາມເຊື່ອໃນພຣະອົງເທົ່ານັ້ນ. ຈາກນັ້ນ ຊາຕານຈະມີອຳນາດຢ່າງເຕັມທີ່ໃນການເຮັດຕາມໃຈມັກຂອງມັນກັບຄົນຊົ່ວຮ້າຍ. ນີ້ຈະເປັນເວລາອັນໜ້າຢ້ານກົວຂອງຄວາມຊົ່ວຮ້າຍ ເພາະວ່າຊາຕານໄດ້ພົບຄວາມມ່ວນຊື່ນໃນການກໍ່ໃຫ້ເກີດຄວາມທຸກຍາກຕໍ່ມະນຸດຊາດ ແລະ ປາສະຈາກການປົກປ້ອງຄຸ້ມຄອງຂອງພຣະເຈົ້າ, ຈະບໍ່ມີຂີດຈຳກັບໃດໆກັບຄວາມຊົ່ວຮ້າຍທີ່ຈະເຫັນຢູ່ເທິງແຜ່ນດິນໂລກ. ມີພຽງປະຊາຊົນຂອງພຣະເຈົ້າເທົ່ານັ້ນທີ່ໄດ້ຮັບການປົກປ້ອງ ເຖິງແມ່ນວ່າ ພວກເຂົາຈະປະເຊີນກັບຄວາມທຸກຍາກ ແຕ່ພຣະເຈົ້າຈະຊົງຢູ່ທີ່ນັ້ນ ແລະ ຮັກສາພວກເຂົາ. {GC 614.1}
ອ້າງອີງຈາກປຶ້ມ "ພຣະຄຳພີ" ພຣະນິມິດ 7:4.
ອ້າງອີງຈາກປຶ້ມ "ປາຍທາງແຫ່ງຄວາມຫວັງ" (ສະບັບພາສາໄທ) {ວັກ 613.2; 614.1} ຂຽນໂດຍ ທ່ານ ນາງ ເອເລັນ ຈີ. ໄວທ
Page updated
Google Sites
Report abuse